Read Runyoro - rutooro 2 Abakor 5 Bible Online

2 Abakor 5 - Runyoro - rutooro bible

2 Abakor 5

¹Nitumanya ngu, orusiisira oru turukwikaramu omu nsi obu ruliseeswa, tulinda ekyombeko ekindi Ruhanga eki alituha. Niyo nju etombekerwe mikono, baitu ey'omwiguru kandi ey'ebiro n'ebiro.

²Kyamazima, omu mubiri gunu nitusinda, nitwegomba kujwekwa omubiri gwaitu ogw'omwiguru.

³Obu tuliba tumazire kugujwara, tutalisangwa tuli busa.

⁴Obu tuba tukyali omu rusiisira runu, tusinda habw'omwetunturo, tutarukwenda kujuurwa nangwa, baitu nitwenda kwongerwaho ekijwaro ekindi, nukwo ekijwaro kinu ekirukufa kisobole kuhigiza kiri ekirukwomeera.

⁵Ayatutekaniriize ekintu eki nuwe Ruhanga, ayatuhaire mwoyo, abe mukwato gwaitu gw'ebi ebirukwija.

⁶Eki nikyo kitugumya omutima butoosa; nitumanya ngu, obu tuba tukyali owaitu omu mubiri, tuba tuli hara na MUKAMA.

⁷Itwe tugenda nitwikiriza kwonka, tutarukurora bwerebwere.

⁸Twikara tugumize omutima, baitu twakugondeze kwahukana n'omubiri gunu, nukwo tugende twikale na MUKAMA.

⁹Nahabweki, noobu turaaba tukyali omu mubiri rundi tugurugiremu, baitu tugenderrege kumusemereza.

¹⁰Habwokuba itwena tulizooka omumaiso g'ekitebe kya Kristo eky'okucweraho emisango, nukwo buli omu asasurwe habw'ebirungi rundi ebibi ebi yakozire akyali omu mubiri ogu.

¹¹Itwe habw'okumanya MUKAMA nkooku ali w'okutiinwa, nikyo twekambisiza abantu; baitu Ruhanga nuwe arukumanya nkooku tuli, kandi ninihira na inywe, emitima yanyu eki neekimanya.

¹²Titurukugaruka kweyumiza hali inywe, baitu nitubaha obulyo bw'okwenyumiza habwaitu, nukwo musobole kugarukamu abo abarukwenyumiza ha bya haruguru, ebitali by'omu mutima omu nda.

¹³Itwe obu turaaba tuhungutukire, tuhungutukire habwa Ruhanga; obu turaaba tuteekaine, tuteekaine habwanyu.

¹⁴Habwokuba engonzi za Kristo zituhambiriza, kandi nitugumiza kimu: omu nkooku yaferiire boona, nahabweki boona bakafa.

¹⁵Kandi akafeera boona nukwo abarukwomeera babe batakyayomeera habwabu bonka, baitu boomere habw'ogu ayabaferiire kandi ayabahumbuukire.

¹⁶Nahabweki, okuruga hati titukyatonda muntu weena habw'obuzaale bw'omubiri. Noobu turaaba twamanyire Kristo omu buzaale bw'omubiri, baitu hati titukyamumanya tuti.

¹⁷Ningira omuntu weena obu aikara omu Kristo, aba kihangwa kihyaka. Ebya kara biba bihoire, aho byona bifookere bihyaka.

¹⁸Ebi byona biruga hali Ruhanga ayatwegaruliire naaraba omu Kristo, yatuha obukwenda obw'okugarukanizaamu abantu na Ruhanga.

¹⁹Nukwo kugamba: omu Kristo, Ruhanga akeegarurra abali omunsi, atakyabajunaaniza ebibi byabu; na itwe akatukwasa obukwenda obu obw'okugarukanisaamu.

²⁰Hati tuli ngabwa za Kristo, Ruhanga naateererra abantu naaraba omuli itwe. Nikyo turukubeesengerereza omu ibara lya Kristo, mugarukanganemu na Ruhanga.

²¹Ogu ataramanyire kibi, Ruhanga akamufoora kibi habwaitu; nukwo omuli uwe tubagane ha buhikiriire bwa Ruhanga.