Read Runyoro - rutooro 2 Abakor 6 Bible Online

2 Abakor 6 - Runyoro - rutooro bible

2 Abakor 6

¹Itwe abarukukora hamu nawe, nitubeesengereza muleke kutungira busa embabazi za Ruhanga.

²Ningira nuwe arukugamba ati: “Nkakuhuliiriza omu kasumi akasemeriire, kandi naakukoonyera hakiro ky'okujunirwaho.” Nkako akasumi akasemeriire; kandi kinu nikyo kiro ky'okujunirwaho.

³Titurukwenda kutalibaniza omuntu weena, omulimo gwaitu guleke kusangwamu ensobi yoona;

⁴baitu omu byona nitweyoleka nk'abaheereza ba Ruhanga. Nitugumiisiriza muno: omu kubonabonesibwa, omu bulemeezi, omu mihito,

⁵omu kuteerwa enkoba, omu nkomo, omu kwimukirirwa, omu kutalibana, omu kuraara ha muro, n'omu kurumwa enjara.

⁶Tuli baheereza ba Ruhanga omu kwerinda, omu kumanya, omu kugumiisiriza, omu mbabazi, omu Mwoyo Ahikiriire, omu kugonzangana okutarumu bugobya,

⁷omu kubaza amazima, n'omu maani ga Ruhanga; tukwasire eby'okurwanisa eby'obuhikiriire omu mukono gw'obulyo n'ogw'emoso.

⁸Tuli baheereza be omu kuheebwa ekitiinisa n'omu kugaywa, omu kugambwaho kubi n'omu kugambwaho kurungi. Nitubarwa nk'abagobya, kunu tuli b'amazima;

⁹nk'abatamanyirwe, kunu nitumanywa kurungi; nk'abarukufa, kunu tuli boomeezi; nk'abafubiirwe, kunu titwisirwe;

¹⁰nk'abali omu bujune, kunu nitusemererwa; nk'abanaku, kunu nituguudahaza baingi; nk'abataina kantu, kandi kunu twina byona.

¹¹Bakorinto inywe, tubabaliize bbwa; tubanjuruliire emitima yaitu.

¹²Itwe tutabatangire kutwehikya, baitu ebiteekerezo byanyu nibyo bibatangire kutwehikya.

¹³Nimbahana nk'abaana bange, na inywe emitima yanyu mugyanjurre nkooku tubanjuruliire ogwaitu.

¹⁴Muleke kuteerana n'abatarukwikiriza. Obuhikiriire bwina bukwatane ki n'obubi? Rundi ekyererezi n'omwirima biina bukwatane ki?

¹⁵Kristo aina bukwatane ki embandwa Beliyaali? Rundi arukwikiriza ateerana ata n'atarukwikiriza?

¹⁶Enju ya Ruhanga ikirraniza eta n'ibandiro? Itwe tuli Nju ya Ruhanga omwomeezi; nkooku Ruhanga yagambire ati: “Ndabaikaramuga nimbagenderamu. Ndiba Ruhanga wabu, kandi bbo baliba bantu bange.

¹⁷Nikyo Ruhanga arukugambira ati: Mubarugemu, mubeecwaho, kandi mutalikwataho kintu kyona ekitasemeziibwe. Nubwo na nyowe ndibatangirra.

¹⁸Ndiba isiinywe, na inywe muliba batabani bange n'abahara bange; MUKAMA w'obusobozi bwona nukwo arukugamba ati.”