Read Runyoro - rutooro 2 Abakor 7 Bible Online

2 Abakor 7 - Runyoro - rutooro bible

2 Abakor 7

¹Abagonzibwa, nkooku twina ebyaraganiziibwe ebi, katwoge oburofu bwona obw'omubiri n'obw'omwoyo, tube bahikiriire mali, tutiine Ruhanga.

²Mutatiina kutwanjururra emitima yanyu. Tiharoho muntu n'omu ou twakozire kubi, tiharoho n'omu ou twasiisire, tiharoho n'omu ou twagobiize.

³Kinu tindukukigamba kubacwera omusango, habwokuba mbagambiire ira nkooku mutuli ha mutima; tuliba tuli hamu omu kufa rundi omu kwomeera.

⁴Nimbeesiga muno; nimunyehuliza muno; mumpumwize muno. Noobu turaaba twina enaku ezirukwingana ki, baitu nyina omuhimbo ogutagambwa.

⁵Nangwa noobu twahikire Makedoni, emibiri yaitu etahuumule naakake, baitu twabonaga enaku embaju zoona-aheeru bwabaga bulemu, omu nda butiini.

⁶Baitu Ruhanga anyakuhuumuza abasobirwe, akatuhuumuza habw'okwija kwa Tito.

⁷Tikuli kwija kwe kwonka, baitu n'okuhuumuzibwa oku mwamuhuumwizemu. Akatutebeza ekihika kyanyu, okuganya kwanyu, n'obwekambi mwayolekere habwange. Bikanyongera kusemererwa.

⁸Noobu ndaaba nababihiize habw'ebbaruha ei nabahandiikiire, tindukukyeijukya. Nkabanza kukyeijukya, habwokuba nindora ebbaruha egi ekabasaaliza okumara akasumi kake.

⁹Baitu hati ninsemererwa, tihali habw'okusaalizibwa kwanyu, baitu okusaalizibwa oku mwatungire kukabaleetera okwegarukamu. Inywe mukasaalizibwa nka Ruhanga oku yagondeze; itwe titwina eki twabaferiize.

¹⁰Okusaalirwa Ruhanga nkooku agonza kuleeta okwegarukamu okurukuhikya ha kujunwa, kandi okusaalirwa oku timukweijukya; baitu okusaalirwa kw'ensi enu kurugwamu okufa.

¹¹Hati nu murole okusaalirwa oku Ruhanga yabagondiize nkooku kwabeekambisiize: nkooku mwataireho muno omutima okwetonganirra, nkooku mwasaalirwe, oku mwatiinire, oku mwagizire ekihika, oku mwayekambiire, oku mwafubire abaasobeze! Omuli ebi byona mukeeyoleka nkooku mutaina musango omu bigambo ebi nabahandiikiire.

¹²Nahabweki obu ndaaba nabahandiikiire, ntabahandiikire habw'ogu ayasobeze, rundi habw'ogu ou baasobezeho; baitu nkabahandiikira nukwo mbooleke obwekambi obu mwatugiriire nkooku Ruhanga abwetegeriize.

¹³Eki nikyo kyatuhuumwize. Tikuli okuhuumuzibwa kwaitu oku kwonka, baitu tukeeyongera kusemererwa muno habw'okurora omuhimbo gwa Tito, habwokuba inywena mukamugarra omutima omu nda.

¹⁴Obu ndiba nnamwolekere nkooku ndukwesiima habwanyu, eki kitankwase nsoni. Ningira buli kintu kyona eki twabahaisizeho kyali ky'amazima, n'okwehaisa kwaitu omu maiso ga Tito nikweyoleka nkooku kuli kw'amazima.

¹⁵Omutima gwe gwona guhweriire hali inywe obu arukwijuka obuhulizi bwanyu, n'oku mwamutangiriire nimutiina kandi numutukumira.

¹⁶Na nyowe ninsemererwa habwokuba nimbeesigira kimu.