Read Runyoro - rutooro 2 Abakor 9 Bible Online

2 Abakor 9 - Runyoro - rutooro bible

2 Abakor 9

¹Tikirukunyetaagisa kubahandiikira ha by'okukoonyera abantu ba Ruhanga,

²habwokuba nimmanya nkooku mwikara mweteekaniize kukikora. Nikyo ndukubeehaisizaamu omu Bamakedoni nimbagambira nti: Abaakaaya bamazire omwaka beeteekaniize kukoonyera. Kandi obwekambi bwanyu nubwo bwekambisize baingi omuli bo.

³Nimbatumira bagenzi baitu banu, nukwo okwehaisa kwaitu habwanyu omu kukoonyera abaikiriza kuleke kufa busa, baitu babasange mweteekaniize nkooku nabagambiire.

⁴Abamakedoni abamu bataikara kwija na nyowe bakabasanga muteeteekaniize, tukahemuka-nangwa na inywe mukahemuka-kandi kunu tukabeesiga muno.

⁵Nikyo naroliire nikyetaagwa kusaba bagenzi baitu banu baije owaanyu ntakaizire, bateekanize kara ekisembo kyanyu eki mwaraganiize ira. Kisangwe kiteekaniziibwe, kitali ky'okuhambirizibwa, baitu habw'okwehayo kwanyu.

⁶Eki ndukugamba nkinu: anyakusiga bike, aligesa bike; kandi anyakusiga bingi, aligesa bingi.

⁷Buli muntu leka agabe nkooku acwiremu omu mutima gwe, atarukubalirra rundi atarukuhambirizibwa; habwokuba Ruhanga asiima omuntu omwenda.

⁸Inywe, Ruhanga naasobora kubaha emigisa ya buli mulingo, nukwo mwikale nimutunga byona ebi murukwetaaga, kandi nimwija kusaagisaho eby'okukoonyera buli mulimo gwona omurungi.

⁹Nkooku kyahandiikirwe kiti: “Agaba n'obwenda, kandi agabira abaseege; obuhikiriire bwe bwikaraho ebiro byona.”

¹⁰Ogu anyakuha omusigi embibo, akamuha n'ebyokulya, na inywe alibaha embibo yanyu kandi agyeze. Asobole n'okukanyisa ebikorwa by'obwenda ebi mukora.

¹¹Nimwija kuguudahara omu byona habw'obwenda bwanyu bwingi obulireetera Ruhanga okusiimwa habwaitu.

¹²Ningira okugabira abaseege tikurukukoonyera abantu ba Ruhanga bonka, baitu kukoonyera baingi okusiima Ruhanga.

¹³Habw'okukora omulimo ogu ogw'embabazi mukaguhikya, mulihaisa Ruhanga ekitiinisa nimujurra kandi nimwikiriza Amakuru Amarungi ga Kristo. Kandi mulimuhaisa ekitiinisa habw'obwenda bwanyu omu bintu mwabagabiire n'ebi mwahaire abandi boona.

¹⁴Nabo baraabatahoga omutima nibabasabira habw'embabazi nyingi za Ruhanga ezikora omuli inywe.

¹⁵Ruhanga asiimwe habw'ekisembo kye ekitagambwa.