Read Runyoro - rutooro Bag 2 Bible Online

Bag 2 - Runyoro - rutooro bible

Bag 2

¹Kandi obu haahingwireho emyaka ikumi n'ena, nkagaruka Yerusaalemu hamu na Baranaba, naatwara na Tito.

²Ekyantwaireyo nukwo kusuukururwa, nasoborra abakwenda Amakuru Amarungi aga ndangirra Abanyamahanga (nagasoborra omu nsita kandi omu maiso g'abo abakaba bali baarangaanwa muli bo) ntaikara kuba nk'arukwirukira busa rundi ayairukiire busa.

³Kandi na Tito ou nkaba nyinawe, atahambirizibwe kusarwa noobwakubaire yali Mugiriiki.

⁴Baitu eky'okusarwa kikaleetwa bagenzi baitu ab'ebisuba abaatutaahiremu tutamanyire, batate obugabe bwaitu obu twina omu Kristo Yesu, nukwo batugarre omu bwiru.

⁵Abo tutaboorobere naakake konka, nukwo amazima g'Amakuru Amarungi gasobole kulindwa habwanyu gatahindukire.

⁶Kandi hali abo abakaba bali baarangaanwa omuli bo, (okurangaanwa kwabu oku nyowe ntakufeeho, habwokuba Ruhanga tasoroora) ningamba nti: Abo abakaba nibarangaanwa muli bo tibaina eki baayongiireho kumpabura.

⁷Kimu kyonka bakamara kwetegereza nkooku nakwasiibwe Amakuru Amarungi kugarangirra abatasazirwe, nka Petero oku yagakwasiibwe habw'abasazirwe.

⁸(Ningira ogu ayasoboize Petero okuhikya obukwenda ha basazirwe, nuwe yasoboize nyowe kubuhikya ha Banyamahanga.)

⁹Yakobbo, Keefa, na Yohaana abakaba bamanyirwe nkooku bali nyomyo z'ekitebe, obu baayetegeriize omugisa ogu nahairwe, bakaikirraniza na nyowe nibagamba ngu, itwe na Baranaba tugende omu Banyamahanga, kandi bbo bagende omu basazirwe.

¹⁰Kyonka eki baatuteeriire nukwo kwijuka abanaku, eki na nyowe nikyo natahoga omutima kukora.

¹¹Baitu Keefa obu yahikire Antyokiya nkamuhakaniza nimmugambira burole, habwokuba akazooka asobeze muno.

¹²Abantu abamu abaatumirwe Yakobbo obu bakaba batakaizire, uwe yalyaga n'Abanyamahanga. Baitu obu bamazire kwija, yayehinya, yabeecwaho habw'okutiina ab'ekitebe ky'abasazirwe.

¹³Abayudaaya abandi nabo bakahondera obucwangya bwe; nangwa na Baranaba yabagenderamu.

¹⁴Baitu obu naboine batarukugendera ha mazima ag'Amakuru Amarungi, nagambira Keefa omumaiso g'abo boona nti: “Baitu iwe Omuyudaaya, obu oraaba noohondera engeso z'Abanyamahanga otarukukora nk'Omuyudaaya, osobora ota kuhambiriza Abanyamahanga kuhondera engeso ez'Abayudaaya?”

¹⁵Itwe abaasazirwe, tuli Bayudaaya nyakabara, tituli Banyamahanga abasiisi.

¹⁶Kandi tumanyire omuntu nkooku atahikirizibwa kworobera Ebiragiro, baitu ahikirizibwa okwikiriza Yesu Kristo; kandi na itwe tukaikiriza Yesu Kristo, nukwo tuhikirizibwe Ruhanga habw'okwikiriza Kristo, hatali kworobera Ebiragiro. Ningira busaho muntu alihikirizibwa okworobera Ebiragiro.

¹⁷Nangwa na itwe noobu turaaba nitwekambira okuhikirra habw'okwikiriza Kristo, nabwo tukyali basiisi. Nukwo kugamba ngu, Kristo nuwe muleesi w'ebibi? Nikikafuuhe!

¹⁸Nyowe kakuba ningaruka hati kwombeka ebi naseesire ira, buli ninkigumya nkooku nkaba ncwire Ebiragiro.

¹⁹Habwokuba omu Biragiro nkaba nfiire; gamba Ebiragiro nibyo byanyisire, nukwo nyongere nyomeere hali Ruhanga.

²⁰Nkabambwa ha musaraba hamu na Kristo; takyali nyowe arukwomeera, baitu Kristo nuwe arukwomerra omuli nyowe. Kandi obwomeezi obu nyinabwo hati omu mubiri, nyinabwo habw'okwikiriza Omwana wa Ruhanga ayangondeze kandi yayehayo habwange.

²¹Tindukwija kunagaija mbabazi za Ruhanga; habwokuba obuhikiriire obu buliba bwarabire omu Biragiro, buli Kristo akafeera busa.