Read Runyoro - rutooro Bag 3 Bible Online

Bag 3 - Runyoro - rutooro bible

Bag 3

¹Inywe Abagalatiya abadoma! Nooha ayabarogere? Inywe abayolekerwe bwerebwere Kristo nkooku yabambirwe ha musaraba!

²Kambakaguze kimu kyonka: Mukaheebwa Mwoyo habw'okuhikiriza Ebiragiro rundi habw'okwikiriza Amakuru Amarungi aga mwahuliire?

³Muli badomakwo? Mukatandika omu Mwoyo, hati nimwija kumalirra omu mubiri?

⁴Ebingi byona ebi mwarabiremu, mukabigumiisiririza busa? Obu kiraaba kiri kiti, mazimakwo mukagumiisiririza busa.

⁵Ruhanga anyakubaha Mwoyo kandi akakorra ebyamahano omuli inywe, ebi si abibakorra nukwo muhikirize Ebiragiro rundi Amakuru Amarungi aga mwahuliire?

⁶Abburahamu nawe nukwo “yaikiriize ati Ruhanga, kandi kyamubalirwa kuba muhikiriire.”

⁷Nahabweki nimurora abaikiriza nkooku nubo bali baana b'Abburahamu.

⁸Kandi Ebihandiiko Ebirukwera obu byarangire kara nkooku Ruhanga alihikiriza Abanyamahanga habw'okwikiriza, byamanyisa Abburahamu, Amakuru Amarungi ganu gatakabaireho, nibigamba biti: “Omuli iwe amahanga goona numwo galiheerwa omugisa.”

⁹Nukwo kiti abo abaina okwikiriza baheebwa omugisa nk'ogwa Abburahamu ayaikiriize ira.

¹⁰Boona abeesiga okworobera Ebiragiro, bali b'okukyenwa; habwokuba kikahandiikwa kiti: “Weena atakwata byona ebihandiikirwe omu kitabu kyebiragiro kandi akabihikya ogu akyeenwe!”

¹¹Baitu nikizookera kimu nkooku hataroho muntu ahikirra omumaiso ga Ruhanga habw'Ebiragiro; habwokuba: “Ogu anyakuhikirizibwa okwikiriza, nuwe alyomeera.”

¹²Ebiragiro tibisigikira ha kwikiriza: “Habwokuba ogu anyakuhikiriza Ebiragiro, nibyo birimwomeeza.”

¹³Baitu Kristo akatucungura yatwiha omu mukyeno gw'Ebiragiro obu yafookere mukyenwa habwaitu habwokuba kikahandiikwa kiti: “Weena anyakuhanikwa ha muti, buli akyenerwe.”

¹⁴Eki kikakorwa kiti, nukwo omu Kristo Yesu omugisa gw'Abburahamu gusobole kuhikaho Abanyamahanga, na itwe habw'okwikiriza tusobole kutunga Mwoyo ou twaraganiziibwe.

¹⁵Bagenzi bange, kambahe ekyokurorraho ekya buli kiro. Tiharoho anyakudibya engwetano y'omuntu noobwakubaire kugyongeraho, emazire kuteebwaho omukono.

¹⁶Nukwo ebyaraganiziibwe, Ruhanga akabiraganiza Abburahamu n'omwijukuru we. Hatali kugamba ngu: “N'abaijukuru”, nk'abaingi; baitu nikigamba hali omu, kiti: “N'omwijukuru waawe.” Ogu nuwe Kristo.

¹⁷Eki ndukumanyisa nikyo kinu: Ebiragiro ebyaizire haahingwireho emyaka bikumi bbina n'asatu, tibirukudibya endagaano Ruhanga ei yagumize ira, kandi tibirukuburanganiza ekyaraganizibwe.

¹⁸Habwokuba obugwetwa, obu buraaba buroho habw'Ebirago, nibuba butakyali bw'endagaano; baitu Ruhanga akabuheera Abburahamu omu ndagaano.

¹⁹Hati nu, Ebiragiro bikateerwaho ki? Bikateebwaho habw'okusiisa kw'abantu, okuhika omwijukuru ayahairwe endagaano egi, obu aliija. Kandi Ebiragiro ebi bikarangirirwa bamalaika nibaraba omu muteeraniza (nuwe Musa).

²⁰Omuteeraniza abaho habw'abaingi, baitu Ruhanga ali omu.

²¹Aho nu Ebiragiro nibihakaniza Ruhanga ebi yaraganiize? Naakake konka. Kakuba twahairwe Ebiragiro ebisobora kwomeeza, mazimakwo obuhikiriire bwakurugure omu Biragiro.

²²Baitu Ebihandiiko Ebirukwera, ebi byona bikabibarra omu bwiru bw'ekibi, nukwo eki ekyaraganiziibwe habw'okwikiriza Yesu Kristo, kiheebwe abo abamwikiriza.

²³Nukwo nu, okwikiriza obu kukaba kutakaizire, tukaba nitulemwa Ebiragiro. Tukaikara nitulemwa tuti okuhika okwikiriza obu kwatusuukuliirwe.

²⁴Habweki, Ebiragiro bikatulinda okuhika Kristo obu yaizire, nukwo tusobole kuhikirizibwa okwikiriza.

²⁵Baitu hati okwikiriza obu kwizire, titukyalemwa omulinzi ogu owa ira;

²⁶habwokuba inywena muli baana ba Ruhanga omu Kristo Yesu habw'okwikiriza.

²⁷Baingi omuli inywe nkooku mwabatiziibwe omu Kristo, hati nimusisanira kimu Kristo omu ngeso ze.

²⁸Tihakyaroho Muyudaaya rundi Mugiriiki, tihakyaroho mwiru rundi ow'obugabe, tihakyaroho musaija rundi omukazi; habwokuba inywena muli kimu omu Kristo Yesu.

²⁹Obu muraaba muli ba Kristo, muli baijukuru b'Abburahamu, bagwetwa nkooku endagaano erukugamba.