Read Runyoro - rutooro Bag 4 Bible Online

Bag 4 - Runyoro - rutooro bible

Bag 4

¹Eki ndukugenderra nkinu: omugwetwa, obu aba akiri mwana muto, taina eki akiza omwiru, kandi kunu nuwe aliba mukama w'ebintu byona.

²Baitu aikara naaroleererwa abaleezi n'abakuza okuhika ha kasumi ise yataireho.

³Na itwe nukwo tuli tuti. Obu tukaba tuli abaana bato, twalemwaga embandwa za kara ez'ensi.

⁴Baitu akasumi obu kaahikire, Ruhanga yatuma Omwana we, ayazairwe omukazi. Akazaarwa naalemwa Ebiragiro,

⁵nukwo acungule abo abaalemwaga Ebiragiro, tusobole kufoorwa baana b'omu ka ya Ruhanga.

⁶Kandi itwe, habw'okuba baana, Ruhanga akatuma Mwoyo wa Mwana we omu mitima yaitu nayamirra ati: “Abba! Isiitwe!”[1]

⁷Nahabweki tokyali mwiru, baitu oli mwana, kandi nkooku oli mwana, buli oli mugwetwa, nukwo Ruhanga naija kukuha ebi ayaahurra abaana be.

⁸Kara obu mukaba mutamanyire Ruhanga, mwali bairu b'ebitaroho;

⁹baitu hati nkooku murukumanya Ruhanga kandi nawe naabamanya, musobora muta kugarukira embandwa eza ira ezitaina maani kandi ensungamirizi? Nimwenda kwefoora bairu baazo obwakabiri?

¹⁰Inywe abarukuta omutima ha biro, ha meezi, ha busumi, na ha myaka!

¹¹Ninsaalirwa kurora nkooku, natalibaniire busa habwanyu.

¹²Bagenzi bange nimbeesengereza, mube nka nyowe; habwokuba na nyowe nkeefoora nka inywe. Timwina kabi aka mwankoliire.

¹³Kandi mukimanyire kurungi ngu, endwara yange egi, niyo yandeeteriize kubarangirra Amakuru Amarungi omurundi gw'okubanza.

¹⁴Endwara egi noobu eraaba yabatalibaniize, baitu mutannuge kandi mutanyekanase. Kyonka mukanjwahukirra nka malaika wa Ruhanga, rundi nka Kristo Yesu wonyini.

¹⁵Okusemererwa oku mwagizire omu mitima yanyu kukagya nkaha? Nyowe ningumya nti: Mwakubaire mweihiremu amaiso ganyu mugampa, kakuba kyasobokere.

¹⁶Mara hati nfookere munyanzigwa wanyu habw'okubagambira amazima?

¹⁷Abantu abo babahaahira kwonka, baitu tibabagondeza birungi. Benda kubaanyahukanizaho, nukwo na inywe mubagonze.

¹⁸Kirungi kugonzebwa abantu habw'ebi murukukora, baitu leka babagonze butoosa, hatali kubasoonasoona obu mba ndi na inywe bwonka.

¹⁹Niinywe baana bange, aba ngarukire kusaalirirwa nk'omukazi arukuzaara, okuhika Kristo obu araatondeka omuli inywe.

²⁰Naakugondeze kuba na inywe hati, nukwo mpingiseho emigambire yange, habwokuba nintuntura muno habwanyu.

²¹Inywe abarukwenda kulemwa Ebiragiro, kinu mukingambire: Timuhurra Ebiragiro ebi bigamba?

²²Ningira kikahandiikwa kiti: Abburahamu akaba aina abatabani babiri: omu akamuzaara ha muzaana, ondi yamuzaara ha mukazi ow'obugabe.

²³Baitu omwana w'omuzaana akazaarwa habw'endagaano eyakozirwe Ruhanga.

²⁴Amakuru g'ekyokurorraho eki nugo ganu: abakazi abo ababiri nibamanyisa endagaano ibiri. Omukazi omu akaruga ha rusozi Sinai, yazaara abaana b'obwiru; nuwe Hagari.

²⁵Habwokuba Sinai nurwo rusozi oruli omunsi ya Arabbiya; kandi Hagari naasisanizibwa na Yerusaalemu orw'ebiro binu, na hati ali omu bwiru hamu n'abaana be

²⁶Baitu Yerusaalemu orw'omwiguru, nurwo mukazi w'obugabe kandi nurwo nyinaitwe.

²⁷Nimwijuka nkooku kyahandiikirwe kiti: “Kyanganuka iwe engumba, etazaara; haguka, otoke iwe atakakwatwaga bisa eby'okuzaara; habwokuba omukazi ayanagaizirwe aina abaana baingi okukira anyakwikara na musaija we.”

²⁸Hati bagenzi bange, na itwe tuli baana abaaraganizibwe nka Isaaka.

²⁹Baitu oli ayazairwe habw'okwegomba kw'omubiri omu kasumi kali, nkooku yahiiganiize ondi ayazairwe habwa Mwoyo Ahikiriire, na hati hoona nukwo kiri.

³⁰Ebihandiko Ebirukwera bigamba bita? Bigamba biti: “Binga omuzaana n'omwana we, habwokuba omwana w'omuzana taligwetwa hamu n'omwana w'omukazi ow'obugabe.”

³¹Habweki bagenzi bange, tituli baana b'omuzaana, baitu tuli b'omukazi ow'obugabe.