Read Runyoro - rutooro Bag 5 Bible Online

Bag 5 - Runyoro - rutooro bible

Bag 5

¹Kristo akatwiha omu bwiru yatuha obugabe; nahabweki mugume, muleke kugaruka omu kikoligo ky'obwiru.

²Hati nyowe Paulo nimbagambira nti: Kakuba musarwa, Kristo taina eki alisobora kubagasira.

³Ninyongera kukigumya nti: Weena anyakwikiriza kusarwa, asemeriire kukwata Ebiragiro byona.

⁴Baitu inywe abarukugonza kuhikirizibwa Ebiragiro, nimwebaganiza hali Kristo, mwaruga ha mbabazi ze.

⁵Kandi itwe abarukwikiriza, tutegereza kandi tunihira kutunga obuhikiriire oburukuleetwa Mwoyo Ahikiriire.

⁶Obu tuba tuli omu Kristo Yesu, okusarwa n'okutasarwa tikwina mugaso. Eky'omugaso nukwo kwikiriza okurukukozesibwa engonzi.

⁷Mukaba nimugenda kurungi! Hati nooha ayabatangire kworobera amazima?

⁸Okubiihabiihwa oku kutaruge hali ogu ayabeesire, nangwa.

⁹Mwijuke ekitumbisa ekike nkooku kirukutumbisa ihyanga lyona.

¹⁰Nimbeesiga omu Mukama nkooku mutarukwija kwikiriza ebindi ebitali byange. Kandi ogu arukubatuntuza, noobu araaba ali ata, baitu alicwerwa omusango.

¹¹Hati bagenzi bange, kakuba mba ninkyayegesa abantu kusarwa nkooku njunaanwa, habwaki bakyampiiganiza? Baitu obu kiraaba kiri kiti, enyegesa yange ey'omusaraba gwa Kristo eba etakyali nkonge.

¹²Nyowe naakugondeze abo abarukubatuntuza beegoole bonka!

¹³Bagenzi bange, inywe mukateerwa obugabe; kyonka obugabe bwanyu mutabufoora byekwaso by'okukora omubiri ebi gugonza, baitu muherezangane omu ngonzi.

¹⁴Ningira Ebiragiro byona bihikirizibwa omu kiragiro ekigamba kiti: “Ogonzeege mutaahi waawe nkooku oyegonza wenka.”

¹⁵Baitu obu muraaba nimunenangana kandi nimulyangana, mwerinde mutamaranganaho.

¹⁶Nyowe nimbagambira nti: Mugendege nimwebemberwa Mwoyo Ahikiire, muleke kutwalirizibwa omubiri ebi gwegomba.

¹⁷Ebi omubiri gwegomba birwanisa Mwoyo, kandi Mwoyo ebi agonza birwanisa omubiri. Ebi byombi birwanisangana, nukwo mutasobora kukora ebi mwakugondeze.

¹⁸Kakuba mwebemberwa Mwoyo, buli muba mutakyalemwa Biragiro bya Musa.

¹⁹Ebikorwa by'omubiri nibyeyoleka, nibyo binu: obusiihani, eby'obuhemu, orwanju,

²⁰okuramya abacwezi, oburogo, enkungani obunyanzigwa, ihali, ekiniga, okwegonza, empaka, okweyahuranamu,

²¹itima, obutamiizi, ebisimba by'obutamiizi, n'ebindi ebirukusisana biti. Nimbahabura nkooku nabahabwire kara, abo abakora ebintu nk'ebi, tibaligweterwa bukama bwa Ruhanga.

²²Baitu ebirungi ebinyakuzooka omu muntu anyakwina Mwoyo nibyo binu: engonzi, okusemererwa, obusinge, okugumiisiriza, embabazi, oburungi, obwesigwa,

²³obuculeezi n'okwetanga. Ebintu nk'ebi tibiina kiragiro ekirukubitanga.

²⁴Abantu ba Kristo Yesu, bakabamba ha musaraba omubiri gwabo n'okwegomba kwagwo okubi, hamu n'amairu gaagwo.

²⁵Obu turaaba nitwomeezibwa Mwoyo, leka nuwe atwebembere mu byona.

²⁶Baitu tuleke kwekuliriza, kwenderezangana, n'okugirrangana ihali.