Read Runyoro - rutooro Bag 6 Bible Online

Bag 6 - Runyoro - rutooro bible

Bag 6

¹Bagenzi bange, kakuba omuntu agwa omu nsobi, inywe abaina Mwoyo Ahikiriire mumwimukye n'omutima gw'embabazi. Mwerinde, na inywe timwikara kwohebwa muti.

²Mujunangane obulemeezi bwanyu, nukwo muhikirize Ekiragiro kya Kristo.

³Kakuba omuntu ayebara kuba w'omugaso, kandi kunu talikwo, aba naayebiiha.

⁴Baitu leka buli omu ayekebiije ebikorwa bye, nukwo abe n'obulyo obw'okwenyumiza, hatali kwenyumiriza hali mutaahi we.

⁵Habwokuba buli omu alyetweka omugugu gwe.

⁶Leka ogu arukwega ekigambo kya Kristo, abagane ebirungi bye byona n'ogu arukumwegesa.

⁷Muleke kubiihwabiihwa; Ruhanga tateburwa. Kyona omuntu eki asiga, nikyo aligesa.

⁸Habwokuba ogu anyakusiga omu mubiri gwe, omu numwo aligesa okufa; baitu ogu anyakusiga omu Mwoyo wa Ruhanga, omu Mwoyo numwo aligesa obwomeezi obutahwaho.

⁹Tuleke kugarukirra omu kukora ebirungi, habwokuba akasumi obu kalihika tuligesa, kusangwa tutaterebuka.

¹⁰Nukwo nu, obu tukyaina omwanya, tukorre abantu boona ebirungi, kandi okukira muno abo ab'oruganda orw'abaikiriza.

¹¹Murole nkooku ndukubahandiikira omu nyuguta enkooto n'omukono gwange nyenka.

¹²Abo abagonza okwezookesa kurungi omu by'omubiri, nubo babahambiriza kusarwa. Eki bagenderra kiri kimu kyonka ngu, baleke kuhiiganizibwa habw'omusaraba gwa Kristo.

¹³Nangwa n'abaasazirwe abo bonyini nabo tibahikiriza Ebiragiro bya Musa; baitu bagonza inywe musarwe, nukwo basobole kwenyumiriza habw'emibiri yanyu.

¹⁴Nikikafuuhe nyowe kwenyumiza, ntenyumiriize omu musaraba gwa MUKAMA waitu Yesu Kristo, ogwaleetiire ensi kubambwa habwange, na nyowe kubambwa habwayo.

¹⁵Okusarwa rundi okutasarwa tikwina mugaso, baitu eky'omugaso nukwo kufooka kihangwa ekihyaka.

¹⁶Obusinge n'embabazi bibe hali boona abarukuhondera eki mbahabwire, nubo Abaisirairi ba Ruhanga.

¹⁷Okuruga hati haleke kubaho n'omu arukuntuntuza; habwokuba nyowe nyina enkojo za Yesu ha mubiri gwange.

¹⁸Bagenzi bange, omugisa gwa MUKAMA waitu Yesu Kristo gwikale na inywe. Amiina.