Read Runyoro - rutooro Bef 2 Bible Online

Bef 2 - Runyoro - rutooro bible

Bef 2

¹Kandi na inywe akabomeeza bu mukaba mufeeriire omu nsobi n'omu bibi,

²ebi mwakoraga ira nimuhondera emihanda y'ensi enu, nimukuraatira omukuru ow'emyoyo emibi ey'omu mwanya gw'iguru, hati nugwo mwoyo ogurukukorra omu baana entahurra.

³Ira na itwe tukaba tubarumu nitukuraatira okwegomba okw'omubiri, nitukora ebi ebyegombwa omubiri n'ebiteekerezo byaitu. Nahabweki omu buzaaranwa tukaba tuli bantu b'okukyenwa Ruhanga nk'abandi boona.

⁴Baitu Ruhanga ow'embabazi nyingi, habw'engonzi ezitagambwa ezi yatugondezeemu,

⁵noobu tukaba tuferiire omu nsobi zaitu, baitu akatwomeeza hamu na Kristo, (embabazi ze nizo zaabajunire).

⁶Akatuhumbuura nawe, yatwikaliza hamu omu biikaro eby'omu iguru,

⁷nukwo omu businge obuliija asobole kwoleka obwingi bw'embabazi ze habw'ebirungi ebi arukutukorra omu Kristo Yesu.

⁸Inywe mukaikiriza mwajunwa habw'embabazi za Ruhanga. Eki mutakyekorre inywenka, baitu kisembo kya Ruhanga.

⁹Atakibahe habw'ebi mwakozire, haleke kubaho arukwenyumiza.

¹⁰Habwokuba nuwe yatubumbire. Tukahangirwa omu Kristo Yesu nukwo tukole ebikorwa ebirungi Ruhanga ebi yategekere kara. Nibyo twikalege nitukora.

¹¹Habweki, inywe Abanyamahanga omu buzaarwa, mwijuke abo abaakozirweho kara omukoro ogw'okusarwa omubiri nkooku baabeetaga abatasazirwe.

¹²Kandi mwijuke omu kasumi ako nkooku mukaba mutaina Kristo, mwahukaine n'oruganda rwa Isirairi, mutaina bukwatane n'endagaano ezaaraganizibwe, mutaina kunihira kandi mutaina Ruhanga omu nsi enu.

¹³Baitu hati, habwa Kristo Yesu, inywe abakaba bali hara muno, esagama ye ebairiize haihi,

¹⁴habwokuba nuwe businge bwaitu, ayatufoire itwembi Abayudaaya n'Abanyamahanga kuba omu. Kandi nuwe yaseesire ekisiika eky'obunyanzigwa ekyatubaganizaaga.

¹⁵Akahayo omubiri gwe okudibya Ebiragiro n'ebindi ebyatairweho, nukwo omu Banyamahanga n'omu Bayudaaya ahangemu omuntu omuhyaka, kandi omuli uwe abakaba bali babiri abafoole muntu omu, naagarra ati obusinge,

¹⁶Kandi itwembi atugarukanganizemu na Ruhanga, tube mubiri gumu habw'omusaraba nambere yahwerekeriize obunyanzigwa.

¹⁷Akaija yarangirra obusinge hali inywe abakaba bali hara, na hali abo abakaba bali haihi;

¹⁸habwokuba itwembi abaina Mwoyo omu, turaba omu Kristo kuhika hali Isiitwe.

¹⁹Nukwo nu, timukyali banyamahanga rundi bagonyi, baitu muli abaikazi hamu n'abantu ba Ruhanga boona, kandi muli b'omuka ya Ruhanga.

²⁰Muli kicweka ky'ekyombeko ekirukwombekwa ha musingi gw'abakwenda n'abarangi. Kristo Yesu niryo ibaale erikuru ery'obugumizo bw'enju.

²¹Omuli uwe nuho ekyombeko kyona kiteeranirizibwa kifooka Enju erukwera ya Ruhanga, nambere MUKAMA asinga.

²²Omuli uwe, na inywe numwo mwombekiirwe omunju nambere Ruhanga aikara hamu na Mwoyo Ahikiriire.