Read Runyoro - rutooro Bef 3 Bible Online

Bef 3 - Runyoro - rutooro bible

Bef 3

¹Nahabweki, nyowe Paulo omunyankomo wa Kristo Yesu habwanyu Abanyamahanga

²ningumya mumanyire nkooku nahairwe obukeeto bw'embabazi za Ruhanga ezi nakwasiibwe habwanyu.

³Nkamanyisibwa ensita egi omu kusuukulirwa, nkooku ndugire kubasoborra omu bigufu.

⁴Obu muraabisoma nimwija kumanya nkooku nyetegeriize ensita ya Kristo.

⁵Niyo nsita etaramanyirwe bantu ab'akasumi akandi, nkooku hati Mwoyo Ahikiriire agisuukuliire abakwenda be abarukwera n'abarangi.

⁶Nukwo kugamba ngu, Abanyamahanga nabo bali bagwetwa hamu na itwe, bicweka by'omubiri gumu, nibabagana ebyaraganiziibwe Kristo Yesu omu Makuru Amarungi.

⁷Ekisembo eky'embabazi Ruhanga ezi yangiriire, habw'amaani ge agarukukorra omuli itwe, nikyo kyanfoire muheereza w'Amakuru Amarungi ago.

⁸Nyowe obu ndaaba ndi w'okumalirra omu bantu be boona, baitu nkaheebwa omugisa ogw'okumanyisa Abanyamahanga ebirungi byona ebya Kristo, ebirungi ebitakira kwetegerezibwa.

⁹N'okumanyisa abantu boona entegeka ey'ensita ye eyaserekerwe kuruga kara omu Ruhanga, ayahangire byona.

¹⁰Nukwo hati abamalaika abalemi n'ab'obusobozi abali omu biikaro eby'omwiguru basobora kurorra ha kitebe ky'abaikiriza amagezi goona aga Ruhanga.

¹¹Eki akakitegeka kuruga kara koona kandi yakihikiririza omu Kristo Yesu MUKAMA waitu,

¹²ou tutungiramu obumanzi n'obwesige obutuhikya hali Ruhanga habw'okwikiriza.

¹³Nukwo nu, nimbasaba muleke kuterebuka habw'emihito ei ndukubona habwanyu, emihito egi neebahaisa ekitiinisa.

¹⁴Habw'obulyo obu, ninteereza Isiitwe amaju

¹⁵nambere haruga enganda zoona ez'omwiguru n'omunsi,

¹⁶kandi nimmusaba habw'ekitiinisa kye ekingi emitima yanyu agigumye n'amaani ga Mwoyo we.

¹⁷Nukwo Kristo ogu aikale omu mitima yanyu habw'okumwikiriza Na inywe obu mulikamara kuhamira kimu kandi mukagumibwa omu ngonzi,

¹⁸nubwo mulisobora okwetegereza hamu n'abahikiriire boona: obugazi, obura okugenda ha iguru, n'okuhama kw'engonzi ze.

¹⁹Ego, kandi n'okumanya engonzi za Kristo ezitasobora kwetegerezibwa magezi g'abantu, nukwo mwijurre kimu Ruhanga.

²⁰Ogu anyakusobora kukora bingi kukira byona ebi tumusaba rundi ebi tuteekereza,

²¹aheebwe ekitiinisa ebiro byona omu kitebe ky'abaikiriza n'omu Kristo Yesu, ebiro n'ebiro. Amiina.