Read Runyoro - rutooro Bef 4 Bible Online

Bef 4 - Runyoro - rutooro bible

Bef 4

¹Habweki, nyowe omunyankomo habwa MUKAMA, nimbeesengereza: mube n'engeso ezinyakusemeriire omulimo ogu mwayetiirwe,

²nimwebundaaza muno kandi nimuculeera, nimugumiisiriza kandi nimuganyirangana habw'engonzi,

³nimutaho omutima kugumya obumu bwa Myoyo Ahikiriire anyakututeeraniza omu businge.

⁴Haroho omubiri gumu na Mwoyo omu, nkooku mwina okunihira kumu oku mwayetiirwe.

⁵MUKAMA ali omu, enyikiriza eri emu, okubatiza kumu.

⁶Ruhanga nuwe omu kandi Ise boona, anyakukira boona, anyakukora omu boona kandi anyakuli omu boona.

⁷Baitu buli omu omuli itwe akaheebwa ebisembo nkooku Kristo omu mbabazi ze yamulengiire.

⁸Nikyo kyagambiirwe kiti: “Obu yatembere omwiguru, akeebembera ihe ly'abo aba yaihire omu bunyagwa, kandi yabaha ebisembo.”

⁹(Okugamba ngu: “Akatemba”, nikimanyisa ki? Tikirukumanyisa ngu, nawe akabanza kusirimuka okuzimu?

¹⁰Ogu ayasirimukire, nuwe omu ayatembere yahingura iguru lyona nukwo aijule hoona hoona.)

¹¹Ebisembo bye akabigaba ati: Abamu babe bakwenda, abamu barangi, abamu barangirizi b'Amakuru Amarungi, abamu baliisa kandi beegesa.

¹²Ebi nibyo bisembo abaikiriza ebi beetaaga habw'omulimo ogw'obuheereza nukwo bombeke omubiri gwa Kristo

¹³okuhika itwena obu tulikatunga enyikiriza emu n'okumanya Omwana wa Ruhanga, tukakura kuhika ha bukuru bwonyini obw'orulengo oruhikire orw'obukuru bwa Kristo.

¹⁴Nukwo tulekere aho kuba baana abarukutwarwa hanu na hali, abarukuzongazongibwa omuyaga ogwa buli nyegesa enyakuruga omu bukurungutaniza obw'abantu n'omu bucwangya bwabu obw'ebisuba.

¹⁵Baitu katubaze aby'amazima ebinyakurumu engonzi. Nukwo tukule omu miringo yoona, tube nk'ogu anyakuli omutwe, nuwe Kristo,

¹⁶anyakuteeraniza kandi yasumiikaniza buli rugiga rwona omubiri oru rwahairwe. Nahabweki buli rugiga obu ruba nirukora kurungi, omubiri gukura kandi nigwombekwa omu ngonzi.

¹⁷Hati kinu ninkigamba kandi ninkigumya omu MUKAMA nti: Mutongera kwikara nk'Abanyamahanga oku baikara, omu biteekerezo byabu ebitaina mugaso.

¹⁸Amagezi gaabu gaswekeriirwe omwirima kandi baahukaniziibwe ha bwoomeezi bwa Ruhanga habw'obutamanya obu bainabwo, obunyakuruga omu kugumangana kw'emitima yabu.

¹⁹Bakagumangana baayeheera kimu obusiihani, nibeegomba kukora ekibi kya buli mulingo.

²⁰Inywe, Kristo mutamwege muti,

²¹rundi buli mukalemwa kumwetegereza kurungi obu mwayegesiibwe amazima agali omu Yesu.

²²Mucwe engeso zanyu eza ira ezi mwinazo ezisiisirwe okwegomba okubi okurukuhabisa.

²³Mufooke bahyaka omu biteekerezo byanyu n'omu mitima yanyu.

²⁴Mube n'obwomeezi obuhyaka Ruhanga obu arukubahangamu oburukuzookwamu obuhikiriire obw'amazima n'oburukwera.

²⁵Nahabweki mufuuhize kimu ebisuba, buli muntu abazeega amazima na mutaahi we, habwokuba tuli bicweka by'omubiri gumu.

²⁶Kakuba mukwatwa ekiniga, nwerinde mutaasiisa; mutalinaga izooba mukyaina ekiniga.

²⁷Kandi muteeretereza Sitaani mukamuha omwanya ogw'okuboohya.

²⁸Omusuma alekere aho kwiba. Haakire akozese emikono ye emirimo y'omugaso, nukwo asobole n'okugabira abaseege.

²⁹Ekigambo kyona ekibi kitaliruga omu kanwa kanyu. Mubazeege ebirungi byonka ebirukwombeka n'ebirukuhikaana n'ekintu eki muroho, nukwo kireetere omugisa abo abakihurra.

³⁰Kandi muleke kurumya Mwoyo Ahikiriire wa Ruhanga, habwokuba nuwe manyikirizo ei mwatairweho kwoleka nkooku muli ba Ruhanga okuhika ha kiro ky'okucungurwa.

³¹Obunyanzigwa bwona, ekiniga, okubiihirwa, obwogo, okuhangirra n'itima lyona bibarugiremu kimu.

³²Mugirranganege embabazi, mube benda, muganyiranganege nkooku Ruhanga yabaganyiriire omu Kristo.