Read Runyoro - rutooro Bef 5 Bible Online

Bef 5 - Runyoro - rutooro bible

Bef 5

¹Nukwo nu, mwesisanizeege Ruhanga nk'abaana be abagonzibwa.

²Mweyongere kugonzangana, Kristo nkooku yatugondeze, yayehayo habwaitu ali kihongwa ekirukuboya kurungi kandi kyonzira hali Ruhanga.

³Baitu obusiihani, obugwagwa bwona, rundi okwegomba okubi tibisemeriire okugambwaho omuli inywe, habwokuba ebi tibisemeriire abantu ba Ruhanga.

⁴Muleke embazo mbi, rundi embazo ez'obudoma, rundi ez'okusandaara okutahikire. Ebi byona tibibasemeriire.

⁵Kinu mukimanyiire kimu, nkooku hataroho musiihani, rundi omugwagwa, rundi omwegombi (anyakufoora itungo lye embandwa y'okuramya) arukwija kugwetwa omu bukama bwa Kristo na Ruhanga.

⁶Mutaikiriza muntu weena kubabiihabiiha n'ebigambo ebitarumu nsa, habwokuba ebi nibyo Ruhanga asigikiraho kukayukira abantu abatamuhurra.

⁷Nahabweki muleke kuteerana nabo;

⁸habwokuba ira mukaba muli omu mwirima, baitu hati muli omu musana gwa MUKAMA; mugendege nk'abaana b'omusana.

⁹(Nambere hali musana nuho hasangwa ebirungi byona, ebihikire kandi eby'amazima.)

¹⁰Mwekambire kumanya MUKAMA ebi arukugonza.

¹¹Muteetaba omu bikorwa by'omwirima ebitaina mugaso, baitu mubyoleke bwere bwere.

¹²Habwokuba ebi bakora omu nsita, bikwasa ensoni n'okubibazaaho;

¹³baitu ekintu kyona ekirukuturukibwa omu musana kizooka; habwokuba kyona ekizooka kifooka omusana.

¹⁴Nikyo kyagambiirwe kiti: “Sisiimuka iwe anyakugwijagiire, kandi ohumbuuke omu bafu, nubwo Kristo araakumulikira.”

¹⁵Nahabweki mwerinde muno ebi murukukora, mutaba nk'abantu abataina magezi, baitu mube b'amagezi.

¹⁶Mukozese kurungi obusumi obu mwinabwo habwokuba ebiro binu bibi.

¹⁷Nukwo nu muleke kuba badoma, baitu mwetegereze MUKAMA ebi arukwenda.

¹⁸Kandi muleke kutaamira amarwa, habwokuba galeeta okwenagiriza; baitu mwijule Mwoyo Ahikiriire.

¹⁹Nambere mwesorooleza, muzinire hamu zabbuli, ebizina, n'eby'okuhaisaniza Ruhanga, nimuzinira MUKAMA kandi nimumukugiza n'emitima yanyu yoona.

²⁰Obutoosa n'omu byona musiimege Ruhanga Isiitwe, nimujurra ibara lya MUKAMA waitu Yesu Kristo.

²¹Mworoberangane habw'okutamu Kristo ekitiinisa.

²²Baanyinabwenge, muhurrege baiba-inywe nkooku muhurra MUKAMA.

²³Habwokuba nyineeka nuwe mutwe gwa nyinabwenge nka Kristo oku ali mutwe gw'ekitebe ky'abaikiriza, nugwo omubiri gwe, kandi nuwe Mujuni wakyo.

²⁴Ekitebe ky'abaikiriza nkooku kiremwa Kristo, nukwo na banyinabwenge balemwege bati baibabo omu byona.

²⁵Baanyinamaka mugonzeege bakazi banyu nka Kristo oku yagondeze ekitebe kye, yayehayo habwakyo,

²⁶nukwo asobole kukihikiriza amazire kukisemeza naakyogya n'amaizi ago hamu n'ekigambo ky'omurwa ogu.

²⁷Nukwo akyereetere omu kitiinisa, kitaina kabara noobu gwakuba mugonya, rundi ekindi nk'eki; kiikale kiri kirukwera kandi kitaina kamogo.

²⁸Abasaija nabo nukwo basemeriire kugonza bakazi baabo nkooku bagonza emibiri yabo yonyini. Ogu anyakugonza mukazi we, buli aba ayegondeze wenka.

²⁹Busaho muntu aranobere omubiri gwe; baitu aguliisa kandi agurolerra muno nkooku Kristo arolerra ekitebe ky'abaikiriza.

³⁰Na itwe tuli bicweka by'omubiri gwe.

³¹“Nikyo omusaija araalekeraga ise na nyina agumire hali mukazi we, kandi ababiri abo bafooke mubiri gumu.”

³²Enu niyo nsita nkuru, ei ndukugamba nti: Neemanyisa Kristo n'ekitebe kye.

³³Nukwo nu, buli omu omuli inywe agonze mukazi we nkooku ayegonza wenka, kandi n'omukazi atemuga iba ekitiinisa.