Read Runyoro - rutooro Bef 6 Bible Online

Bef 6 - Runyoro - rutooro bible

Bef 6

¹Abaana muhurrege abazaire banyu habwa MUKAMA, habwokuba kihikire.

²“Otiinege sso na nyoko” eki nikyo kiragiro ky'okubanza ekyayongiirweho okunihiza ngu:

³“Noija kuba kurungi n'okugundagunda omu nsi.”

⁴Na inywe baise-baana muleke kubiihiza abaana banyu, baitu mubooroole omu ngeso nungi nimubeegesa ebya MUKAMA.

⁵Abairu muhurrege bakama banyu ab'omunsi munu, nimutiina kandi nimwebundaaza n'omutima gumu nk'abarukuhurra Kristo.

⁶Eki muleke kukikora obu baba babataireho eriiso, nk'abarukwenda kusiimwa abantu, baitu mukikole nk'abairu ba Kristo, nimukora Ruhanga ebi agonza n'omutima gumu.

⁷Muheereze n'obwekambi nk'abarukukorra MUKAMA hatali bantu.

⁸Kandi muheereze nimumanya ngu, buli kirungi kyona omuntu eki akora nikyo MUKAMA alimusasurra, noobu araaba ali mwiru rundi w'obugabe.

⁹Na inywe bakama b'abairu nukwo mubakole muti, muleke kubakanga, mumanye ngu, MUKAMA waabo kandi owaanyu ali omwiguru kandi tasoroora.

¹⁰Eky'okumalirra mube b'amaani omu MUKAMA, nimugumibwa obusobozi obw'amaani ge.

¹¹Mujwale eby'okurwanisa byona ebya Ruhanga, nukwo musobole kwemera obugobya bwa Sitaani.

¹²Itwe titurukurwanisa abantu abaina omubiri n'esagama, baitu niturwanisa amahe ag'emyoyo emibi agali omu biikaro ebya ha iguru, emyoyo ey'abakuru, ey'ab'obusobozi, n'ey'abarukulema ensi enu ey'omwirima.

¹³Habweki mukwate eby'okurwanisa byona ebya Ruhanga, nukwo musobole kwemera ebiribaho ha kiro ekibi, kandi obu mulimara kukora byona, mwemerre mugumire.

¹⁴Nahabweki, mwemerre mwetegere amazima omu nda, kandi mujwaire ha kifuba obuhikiriire nk'ekizibaho ky'ekyoma.

¹⁵Mujwale enkaito omu bigere byanyu, mweteekaniize okurangirra Amakuru Amarungi ag'obusinge.

¹⁶Okukira byona, mukwate engabu y'okwikiriza ei musobora kuzimisa emyambi yoona ey'Omubi erukwaka omurro.

¹⁷Mujwale enkofiira ey'ekyoma ey'okujunwa, kandi mukwate n'empirima eya Mwoyo Ahikiriire, nikyo kigambo kya Ruhanga.

¹⁸Obutoosa musabege nimwesengereza Ruhanga okubakoonyera, kandi nimusabira omu Mwoyo Ahikiriire. Eki mukikolege obutalekerra, nimusabira abaikiriza boona,

¹⁹kandi na nyowe munsabirege, nukwo ntunge ebi ndaagamba obu ndaabaga nindangirra n'obumanzi ensita ey'Amakuru Amarungi,

²⁰aga ndi ngabwa yago, mboherwe omu njegere; nukwo nsobole kugarangirra n'obumanzi nkooku kinsemeriire.

²¹ Tikiko mugenzi waitu omugonzibwa kandi omuheereza omwesigwa omu MUKAMA araabamanyisa byona; nukwo mumanye nkooku ndi, n'ebi ndukukora.

²²Nikyo mmutumiire, mumanye nkooku tuli, kandi abagarre omutima omu nda.

²³Obusinge n'engonzi hamu n'okwikiriza ebiruga hali Ruhanga Isiitwa na MUKAMA Yesu Kristo bibe hali ab'oruganda boona.

²⁴Kandi Ruhanga agirre embabazi boona abagonza MUKAMA waitu Yesu Kristo n'engonzi ezitafa.