Read Runyoro - rutooro Baf 2 Bible Online

Baf 2 - Runyoro - rutooro bible

Baf 2

¹Nukwo nu, obu haraaba haroho okugumyangana omu Kristo, okwimukyangana okuleetwa engonzi, n'okukwataniza omu Mwoyo, rundi okuganyira n'okugirrangana enbabazi,

²munyijuze omuhimbo mwina ebiteekerezo bimu, n'engonzi ez'omulingo gumu, nimwikirraniza omu byona n'omutima gumu.

³Mutalikora kintu kyona habw'okwegonza rundi okwekuliriza, baitu mwebundaaze, nimumanya abandi nkooku barukubakira oburungi.

⁴Buli omu hali inywe aleke kuta omutima hali ebi arukugonza wenka, baitu agute na ha birukugonzibwa abandi.

⁵Omwoyo Kristo Yesu ogu akaba ainagwo, nugwo musemeriire kuba nagwo.

⁶Uwe nobu araaba yasisanaaga Ruhanga, baitu okwingana kwe na Ruhanga atakire kukufaho.

⁷Akeemaramu ekitiinisa yayefoora mwiru, yazaarwa nk'abantu.

⁸Habw'okuzaarwa nk'omuntu, akeebundaaza kandi yaba muhulizi, kuhika ha kufa, nangwa n'okufa okwa ha musaraba.

⁹Nikyo Ruhanga yamunyumiriize, yamuruka ibara erirukukira agandi goona.

¹⁰Nukwo boona abanyakuli omu iguru, n'ab'omunsi, n'ab'okuzimu, obu bahurra ibara lya Yesu, bateeze amaju,

¹¹kandi buli rulimi rwatule Yesu Kristo nkooku ali Mukama, nukwo Ruhanga Ise aheebwe ekitiinisa.

¹²Habweki, bagenzi bange abagonzibwa, nkooku mwabaire bahulizi kara, na hati nukwo mube, hatali kumpurra obu mba ndoho, baitu mukire kumpurra obu mba ntaroho, mwekambire okujunwa kwanyu nimutina kandi nimutukumira.

¹³Habwokuba Ruhanga naakorra omuli inywe, naabakoonyera okugonza n'okuhikiriza ebi asiima.

¹⁴Mukole ebintu byona mutarukutontorroma kandi mutarukuteera mpaka,

¹⁵nukwo mube abataina musango kandi abeezibwe; abaana ba Ruhanga abataina kamogo hagati y'abantu ab'obusinge bunu oburamaire kandi obuhabire aba murukwakiramu nk'enyunyuuzi ezirukwakira ab'omu nsi,

¹⁶nimugumiza kimu ebigambo by'obwomeezi. Nukwo ha Kiro kya Kristo nsobole kwenyumiza nkooku ntarairukiire busa, kandi ntaratalibaniire busa.

¹⁷Esagama yange noobu eraaba eri y'okuseeswa ha kyonzira ekiruhongwa-nukwo okwikiriza kwanyu kweyongere, baitu ninsemererwa kandi ninkyanganuka hamu na inywe inywena.

¹⁸Na inywe nukwo musemererwe muti kandi mukyanganuke hamu na nyowe.

¹⁹Ninihira omu MUKAMA Yesu kubatumira bwango Timoteho, nukwo omutima gungwe omu nda mmazire kumanya amakuru g'owaanyu.

²⁰Tinyina ondi weena amwingana mu kutunturra muno obwomeezi bwanyu.

²¹Abandi boona beeserurra ebyabu, bitali bya Yesu Kristo.

²²Baitu omugaso gwa Timoteho mugumanyire, habwokuba omu by'Amukuru Amarungi tukaheereza hamu nk'omwana oku arukukoonyera ise.

²³Nikyo ndukunihirra kumutuma ahonaaho, obu ndakarora ebyange nambere biraagarukira;

²⁴kandi ninyesiga MUKAMA ngu, na nyowe nyenka ndiija oku bwango.

²⁵Hati nyetegeriize nkooku kirukwetaagwa kubatumira Epafurodito mugenzi wange, omukozi kandi omuserikale nyakyaitu; nuwe mukwenda wanyu arukumpa ebi ndukwetaaga;

²⁶habwokuba inywena, abaire abainaho ekihika, kandi omutima gukamusarra kumanya nkooku mwahuliire eby'endwara ye.

²⁷Akarwarakwo mali, kake afe. Baitu Ruhanga akamugirra embabazi, atazigirre uwe wenka baitu na nyowe, nukwo obujune obu nyina buleke kunyongerwaho.

²⁸Nikyo ndukuteeraho muno omutima kumubatumaho, mukyanganuke habw'okugaruka kumurora, kandi na nyowe omutima gungaruke omunda.

²⁹Habweki, mumutangirre omu MUKAMA n'omuhimbo gwona; kandi abantu nk'abo mubatemuga ekitiinisa.

³⁰Ningira akaba ali haihi n'okufa habw'omulimo gwa Kristo, naahayo obwomeezi bwe okuhikiriza inywe ebi mwakunkolire.