Read Runyoro - rutooro Baf 3 Bible Online

Baf 3 - Runyoro - rutooro bible

Baf 3

¹Eky'okumalirra bagenzi bange, mukyanganuke omu MUKAMA. Na hati tikirukunjwahya kubahandiikira ebintu ebirukusisana na biri. Na inywe nikibaleetera obusinge.

²Mwerinde embwa ezi! Mwerinde enkozi z'ebibi! Mwerinde abo abasara omubiri!

³Itwe tuli abasazirwe b'amazima, Mwoyo nuwe atuhabura nkooku turaaramya Ruhanga. Okwenyumiza kwaitu kuli omu Kristo Yesu. Titwesiga emikoro ya ha mubiri.

⁴Noobu baakujuliire emikoro egi, baitu nyowe tinyina eki ndukutiina. Obu buraaba buli bulyo obw'okwesiga emikoro ya ha mubiri, nooha araabunkiza?

⁵Nkasarwa ha kiro kya munaana, ndi Omunyaisirairi, ow'oruganda rwa Benyamiini, Omuhebburaayo ayazairwe Abahebburaayo, kandi omu kukuraatira Ebiragiro, ndi Mufalisaayo.

⁶Nkooleka obwekambi bwange nimpiiganiza ekitebe ky'abaikiriza. Omu kuhikirra okurukusigikira ha Biragiro, tinyina musango.

⁷Ebirungi byona ebi natungire, nkabyeta kuferwa habwa Kristo.

⁸Mazimakwo, ebintu byona nimbirora nk'ebitaina mugaso obu mbirengesaniza n'oburungi obw'okumanya Kristo Yesu MUKAMA wange. Habwe nkaikiriza kuferwa ebintu byona kandi mbirora nk'ebitaina mugaso, nukwo ntunge Kristo,

⁹kandi nyikale omuli uwe. Tinkyaserra obuhikiriire bwange habwange obusigikira ha Biragiro, kwihaho obu oburukuleetwa okwikiriza Kristo. Nubwo obuhikiriire oburukuruga hali Ruhanga kandi oburukuleetwa okwikiriza kwaitu.

¹⁰Eki ndukwenda nukwo kumanya Kristo n'okumanya amaani g'okuhumbuuka kwe, mbagane nawe omu kubonabonesibwa kwe, nsisane nawe n'omu kufa kwe.

¹¹Nukwo obu kiraaba nikisoboka, na nyowe mpike ha kuhumbuuka omu bafu.

¹²Tindukugamba ngu, eki mmazire kukitunga; rundi ngu, mmazire kuhikirra; baitu ninyekamba kukyetungira, Kristo Yesu nkooku yanyetungire.

¹³Bagenzi bange, tindukugira ngu, eki nkakyetungira; kwihaho eki ndukukora kiri kimu kyonka: nukwo kwebwa ebindi enyuma n'okwitanira ebindi omumaiso,

¹⁴ninyekamba kuhika ha kigendererwa, nukwo ntunge empeera ey'omwiguru Ruhanga ei yanyetiire omu Kristo Yesu.

¹⁵Abo abeetwa abakuru omuli itwe, nukwo tusemeriire kuteekereza tuti. Obu haba haroho ekintu eki murukuteekereza okundi, nakyo Ruhanga naija kukibasuukurra.

¹⁶Kyonka nambere tuhikire, muho tugendere tutarukugarukirra.

¹⁷Bagenzi bange mwikirranize kandi munkuraatire. Itwe nkooku tuli kyokurorraho kyanyu, mwetegereze abo abarukukora nka itwe.

¹⁸Habwokuba baingi omu Baisirairi abo, aba nabagambiireho emirundi nyingi, na hati aba ndukubagambira ntaireho n'okurra, baikara bali banyanzigwa b'omusaraba gwa Kristo.

¹⁹Empero yabo nukwo okuhwerekerra; ruhanga waabo niyo enda, kandi beenyumiriza ha bintu ebirukubahemura, emitima yabo bagimaliza ha bintu by'ensi.

²⁰Baitu itwe, obwikaro bwaitu buli omwiguru, nambere haliruga Omujuni, MUKAMA Yesu Kristo ou turukulindirra.

²¹Nuwe alihindura emibiri yaitu etaina kitiinisa, esisane nk'ogwe ogw'ekitiinisa habw'amaani agamusoboza kulema ebintu byona.