Read Runyoro - rutooro Baf 4 Bible Online

Baf 4 - Runyoro - rutooro bible

Baf 4

¹Habweki nu, bagenzi bange, aba ngonza kandi aba nyinaho ekihika, okusemererwa kwange kandi ekondo yange, mugumire muti hali MUKAMA, inywe enganzi zange.

²Ninyesengereza Evodiya na Sintike, baikirranize omu MUKAMA.

³Kandi na iwe mugenzi wange mali, ninkusaba okoonyere abakazi abo, habwokuba tukatalibanira hamu okurangirra Amakuru Amarungi, kandi nimbabara na Kelementi n'abakozi abandi bagenzi bange ab'amabara gaabu gali omu kitabu eky'obomeezi.

⁴Mukyanganukege omu MUKAMA obutoosa; ningaruka kugamba nti: Mukyanganuke.

⁵Okugumiisiriza kwanyu kumanywe abantu boona. Ningira MUKAMA ali haihi kugaruka.

⁶Mutaharaza omutima habw'ekintu kyona, baitu omu buli kintu mwikale nimumanyisa Ruhanga ebi murukwetaaga, nimumusaba, nimumwesengereza kandi nimumusiima.

⁷Obusinge bwa Ruhanga obuhinguraine okwetegereza kwona, bulirinda emitima yanyu n'ebiteekerezo byanyu omu Kristo Yesu.

⁸Eky'okumalirra, bagenzi bange, byona eby'amazima, byona eby'ekitiinisa, byona eby'obulyo, byona ebirukwera, byona ebirungi, byona ebirukusiimwa nibyo muteekerezeho, hamu n'engeso enungi n'ebindi ebisemeriire kunyumizibwa.

⁹Ebi mwanyegereho, ebi mwanyihireho, ebi mwampuliireho, n'ebi mwandozireho, nibyo mukolege; kandi Ruhanga ow'obusinge araikaraga na inywe.

¹⁰Ninkyanganuka muno omu MUKAMA, habwokuba mulinzirwe mwagaruka mwanyijuka. Mazimakwo mukaba muntaireho omutima, baitu mukaba mutakatungire mwanya.

¹¹Tikuli kugira ngu, eki ninkigambisibwa obuburwa, habwokuba nkeega okwenihira omu mulingo gwona ogu mbamu.

¹²Nimmanya kukeeherwa ebintu n'okubisaagirirwa; omu buli kintu n'omu miringo yoona nkeega amagezi ag'okwekoonyera: omu mweru n'omu njara, omu itungo n'omu bunaku.

¹³Ninsobora kukora byona habw'Ogu anyakumpa amaani.

¹⁴Baitu mukakora kurungi kunyirukirra omu muhito gwange.

¹⁵Na inywe Abafilipi nimumanya ngu, obu natandikire kurangirra Amakuru Amarungi ninduga Makedoni, hatabeho kitebe ky'abaikiriza na kimu ekyayeteeraine na nyowe omu kurolerra entaahya n'enturukya ya sente, okwihaho inywe inywenka.

¹⁶Noobu nkaba ndi Teesalonika, mwantwekerega eby'okunkoonyera.

¹⁷Tikuli kugira ngu, ninserra ebisembo; baitu ninserra amagoba Ruhanga aga alibongeramu.

¹⁸Nyowe, emperra yange mmazire kugitunga kandi nsaagisizeho! Ntungire ebirukumara habwokuba Epafurodito amazire kumpa ebisembo ebi mwantwekiire, nikyo kihongwa ekirukuboya kurungi kandi ekyonzira ekirukusiimwa Ruhanga kandi eki agonza.

¹⁹Ruhanga wange alibaha byona ebi murukwetaaga nk'obwingi bw'obwenda bwe omu Kristo Yesu oku buli.

²⁰Ekitiinisa kibe hali Ruhanga Isiitwe ebiro n'ebiro. Amiina.

²¹Mundamukize abantu ba Ruhanga boona omu Kristo Yesu. Bagenzi bange aba nyinabo hanu, nibabaramukya.

²²Abantu ba Ruhanga boona nibabaramukya, muno muno ab'omu kikaali kya Kaisaali.

²³Emigisa ya MUKAMA Yesu Kristo ikale n'emyoyo yanyu.