Read Runyoro - rutooro Bak 1 Bible Online

Bak 1 - Runyoro - rutooro bible

Bak 1

¹Nyowe Paulo, Ruhanga ou yagondeze mbe mukwenda wa Kristo Yesu, hamu na Timoteho mugenzi waitu,

²nitubahandiikira inywe abantu ba Ruhanga kandi bagenzi baitu abeesigwa abali Kolosai. Nitubagondeza omugisa n'obusinge ebiruga hali Ruhanga iitwe.

³Butoosa obu tuba nitubasabira, tusiima Ruhanga, Ise MUKAMA waitu Yesu Kristo,

⁴habwokuba tukahurra nkooku murukwikiriza Kristo Yesu, n'oku murukugonza abantu ba Ruhanga boona,

⁵nimusigikira ha kunihira oku mwina nukwo mutunge ebirungi ebimwahuliirwe omwiguru. Okunihira oku mwahuliireho kara omu nyegesa y'amazima.

⁶Nugo Amakuru Amarungi agabahikireho, kandi agarukweyongera muno nigararanga omunsi yoona. Gakeeyongera gati omuli inywe okuruga ha kiro eki mwabandiizeho kuhurra n'okwetegereza kwo embabazi za Ruhanga,

⁷nkooku mwayegesiibwe Epafura, omuheereza mugenzi wange omugonzibwa. Habwange nuwe muheereza omwesigwa wa Kristo,

⁸ayaizire okutumanyisa engonzi Mwoyo Ahikiriire ezi yabatairemu.

⁹Nahabweki okuruga obu twakihuliire, titukoosaga kubasabira, nukwo mwetegerereze kimu Ruhanga ebi agonza, kandi mwijule amagezi goona n'okumanya kwona okurukuleetwa Mwoyo wa Ruhanga,

¹⁰mugire engeso ezisemeriire MUKAMA, mukole ebi asiima, mweyongere omu birungi byona ebi murukukora, kandi mweyongere kumanya Ruhanga.

¹¹Ruhanga ow'obusobozi bwona abagumye habw'amaani ag'ekitiinisa kye, nukwo mugire obumanzi bwona kandi mugumiisirize n'okusemererwa.

¹²Musiime Isiitwe ayatusoboize kubagana ha bugwetwa bw'abahikiriire abali omu bukama bw'omusana.

¹³Nuwe yatwihire omu bukama obw'omwirima, yatutaahya omu bukama bw'Omwana we omugonzibwa,

¹⁴anyakutucungura kandi anyakutuganyira ebibi.

¹⁵Kristo nuwe kisisani kya Ruhanga atarorwa, omuzigaijo gw'ebihangwa byona;

¹⁶habwokuba omuli uwe, byona nuho byahangiirwe: eby'omu iguru n'eby'omu nsi; ebiboneka n'ebitaboneka; rundi ebitebe by'abamalaika abakuru, ab'obusobozi, n'abalemi-ebintu byona bikahangirwa omuli uwe kandi bikahangwa habwe.

¹⁷Nuwe yabandize kubaho byona bitakabaireho, kandi ebintu byona biteeranira omuli uwe.

¹⁸Nuwe mutwe gw'omubiri-kandi omubiri ogu nikyo kitebe ky'abaikiriza. Nuwe ntandiko kandi omuzigaijo ogw'abahumbuukire omu bafu, nukwo omu byona nuwe abe w'okubanza.

¹⁹Habwokuba Ruhanga akagonza Kristo we aijurre kimu obwa Ruhanga bwe,

²⁰kandi akacwamu kwegarurra ebintu byona, eby'omu nsi rundi eby'omu iguru naaraba omuli uwe, obu yaleesire obusinge habw'esagama y'omwana we eyasirwe ha musaraba.

²¹Inywe kara, mukaba mwebaganiize na Ruhanga, mwina obunyanzigwa omu mitima yanyu kandi, nimukora ebibi.

²²Baitu hati mugarukangainemu na Ruhanga omu mubiri gw'omwana we habw'okufa kwe, nukwo abahikye omumaiso ge nimwera, mutaina kamogo, kandi mutaina eki murukujunaanwa.

²³Kyonka mwikale omu kwikiriza, mugumire kandi mutarukutengeeta, mutarukuruga ha kwesiga Amakuru Amarungi aga mwahuliire, agaarangiriirwe buli kihangwa ekinyakuli omunsi, amakuru nyowe Paulo aga nafookere omuheereza waago.

²⁴Hati ninsemererwa kurora nimbonabona habwanyu, habwokuba nimpikiriza n'omubiri gwange ebirukubura ha mabone Kristo aga yaboine habw'omubiri gwe-nikyo kitebe ky'abaikiriza.

²⁵Ekitebe eki nikyo nakomiirwe kuba muheereza wakyo nk'omulimo gwa Ruhanga ogu naahairwe habwanyu oku guli, nukwo mmanyisize kimu ekigambo kya Ruhanga.

²⁶Egi niyo nsita eyaserekerwe ira lyona n'obusinge bwona, baitu hati enyakwolekerwe abantu be.

²⁷Nubo Ruhanga yagondeze kwoleka ensita egi nkooku ina ekitiinisa kingi omu Banyamahanga. Ensita egi nuwe Kristo anyakuli omuli inywe, omukwato gwaitu ogulitutungisa ekitiinisa.

²⁸Nuwe turukurangirra, nitwegesa kandi nituteererra buli muntu n'amagezi goona, nukwo weena anyakuhikire tusobole kumuleeta hali Kristo.

²⁹Eki nikyo ndukutalibanira kandi nikyo ndukwekambira n'amaani goona Ruhanga aga arukunnyijuza.