Read Runyoro - rutooro Bak 3 Bible Online

Bak 3 - Runyoro - rutooro bible

Bak 3

¹Nukwo nu, obu muraaba mwahumbuukire hamu na Kristo, mute omutima ha by'omwiguru, Kristo nambere ali, anyakwikaliire ha mukono gw'obulyo ogwa Ruhanga.

²Muteekerezeege ebintu eby'omwiguru, bitali eby'omunsi.

³Habwokuba mukafa, kandi obwomeezi bwanyu buserekerwe na Kristo omu Ruhanga.

⁴Kristo obwomeezi bwaitu obu aligaruka kuzooka, nubwo na inywe mulizooka hamu nawe omu kitiinisa.

⁵Nahabweki mucwe engeso ez'ensi ezinyakuli omuli inywe: obusiihani, obugwagwa, ebiteekerezo ebibi, okwegomba okubi, n'omukoijo gw'itungo ly'abandi, itungo eri mwafoire embandwa zanyu ez'okuramya.

⁶Habwokuba ebi nibyo birireetera Ruhanga kubakayukira.

⁷Kandi ebi nibyo mwakoraga obu mukaba mukyabirumu.

⁸Baitu hati mucwe engeso zinu: ekiniga, okubiihirwa, itima okuhangirra, n'okubaza eby'ensoni.

⁹Mutabiihangana ebisuba, habwokuba mukaleka obwomeezi obwa ira n'engeso zaabwo,

¹⁰mwatandika obundi obunyakwikara nibuhindurwa buhyaka nukwo bubahikye ha magezi na ha nsisana by'Ogu ayabuhangire.

¹¹Obu, nihaba hatakyaroho Omugiriiki n'Omuyudaaya, asazirwe n'atasazirwe, omunyaihanga n'ow'ihanga eriteegesibwe, omwiru n'ow'obugabe, baitu Kristo nuwe byona omu byona.

¹²Inywe abaakomerwe Ruhanga, abarukwera kandi abagonzibwa, mube n'okuganyira, embabazi, okwebundaaza, obuculeezi, n'okugumiisiriza.

¹³Obu haraaba haroho anyakwina akahyeme hali mutaahi we, mugumiisirizangane kandi muganyirangane. MUKAMA nkooku yabaganyiire, na inywe nukwo musemeriire kuganyirangana.

¹⁴Kandi ekirukukira byona, mube n'engonzi eziteeraniza hamu ebintu byona omu kwikirraniza okw'amazima.

¹⁵Obusinge bwa Kristo obu mwayetiirwekwo kuba ebicweka by'omubiri gumu buleme omu mitima yanyu. Kandi musiimege Ruhanga.

¹⁶Ekigambo kya Kristo kiikalege nikyeyongera omuli inywe, obu muraabaga nimwegesangana kandi nimuhaburangana omu magezi goona, noobu muraabaga nimuzina zabbuli, ebizina by'okukugiza, n'ebizina ebiruga mu mwoyo, nimusiima Ruhanga omu mitima n'ebizina ebiruga mu mwoyo, nimusiima Ruhanga omu mitima yanyu.

¹⁷Kandi kyona eki muraagambaga rundi eki muraakoraga, mukikolege omu ibara lya MUKAMA Yesu, omuli uwe nimusiimiramu Ruhanga Ise.

¹⁸Banyinabwenge muhurrege baiba-inywe nkooku MUKAMA asiima.

¹⁹Banyinaamaka mugonzeege bakazi banyu kandi muleke kubagirra omwaga.

²⁰Abaana muhurrege bazaire banyu omu byona, habwokuba eki nikyo MUKAMA asiima.

²¹Baise-baana muleke kutuntuza abaana banyu, bataharaza emitima.

²²Abairu muhurrege bakama banyu ab'omunsi omu byona. Kandi eki muleke kukikora obu baba babataireho eriiso, nk'abarukwenda kusiimwa abantu; baitu mubaheereze n'omutima gumu nimutiina MUKAMA.

²³Buli mulimo gwona ogu mukora, mugukole n'okusemererwa, nk'abarukuheereza MUKAMA batali bantu.

²⁴Nimumanya ngu, obugwetwa niyo mpeera yanyu ei muliheebwa MUKAMA; habwokuba nimuheereza MUKAMA Kristo.

²⁵Ningira enkozi y'ebibi erisasurwa habw'ebibi yakozire. Ruhanga tasoroora mu bantu.