Read Runyoro - rutooro Bak 4 Bible Online

Bak 4 - Runyoro - rutooro bible

Bak 4

¹Inywe bakama b'abairu, abairu banyu mubakorre eby'obwinganiza kandi ebihikire, nimumanya na inywe nkooku mwina MUKAMA omwiguru.

²Mweyongere omu kusaba mutarukugarukirra, mutarukuhungira kandi musiime Ruhanga.

³Na itwe mutusabire, nukwo Ruhanga asobole kutukingurra omuhanda ogw'okurangirra Amakuru Amarungi n'okumanyisa ensita ya Kristo eyankwasize omu nkomo,

⁴nukwo nsobole kugisoborra kurungi nkooku nsemeriire.

⁵Abantu ab'aheeru mubakwatege n'amagezi, mutarukusiisa akasumi aka mwina.

⁶Obutoosa ebigambo byanyu bibege birungi, binurrege abandi nk'ebirungirwemu ekisura, nukwo musobole kumanya eki musemeriire kugarukamu buli omu.

⁷ Tikiko, ow'oruganda omugonzibwa, omukozi omwesigwa kandi omuheereza mugenzi waitu omu kukorra MUKAMA, araabagambira ebyambaireho.

⁸Bunu nubwo bulyo bwonyini obu mmutumiire hali inywe, nukwo musobole kumanya nkooka tuli, kandi na inywe abagumye emitima.

⁹Namutumayo hamu na Oneesimo mugenzi waitu omwesigwa kandi omugonzibwa, omuntu ow'owaanyu. Baraabagambira byona ebyabaire kunu.

¹⁰Alisitaako, omunyankomo mugenzi wange, naabaramukya; na Mariko mwihwa wa Baranaba (ou nabamanyisizeho kara obu alibahikaho, mumutangirre kurungi).

¹¹Na Yesu, anyakwetwa Yusito, naabaramukya. Omu bakozi bataahi bange abarukukorra obukama bwa Ruhanga, banu bonka nubo abaasazirwe, kandi bakampuumuza.

¹²Epafura ow'owaanyu, omuheereza wa Kristo Yesu, naabaramukya. Obutoosa abaijuka n'omutima gumu omu kusaba kwe, nukwo musobole kwemerra mugumire, mweheriireyo kimu okukora byona Ruhanga ebi agonza.

¹³Ndi kaiso arukugumya nkooku yabakoliire n'amaani, inywe hamu n'abo abali Layodikeeya n'abali Hieraapoli.

¹⁴Luka, omufumu omugonzibwa, na Deema nibabaramukya.

¹⁵Mundamukize ab'oruganda abali Layodikeeya. Mundamukize Nimfa, n'ekitebe ky'abaikiriza ab'omu nju ye.

¹⁶Ebbaruha enu obu erikamara kubasomerwa, mugitwekere ab'ekitebe ky'abaikiriza aba Layodikeeya bagisome; kandi na inywe musome ebbaruha eriruga Layodikeeya.

¹⁷Muteererre Arakiipo muti: “Oyekambe okuhikiriza obuheereza MUKAMA obu yakuhaire.”

¹⁸Nyowe Paulo okuramukya kunu nkuhandiikire n'omukono gwange. Muteebwa nkooku nkiri omu nkomo. Embabazi za Ruhanga ziikale na inywe.