Read Runyoro - rutooro 1Bat 1 Bible Online

1Bat 1 - Runyoro - rutooro bible

1Bat 1

¹Nyowe Paulo, hamu na Silivaano na Timoteho, nituhandiikira ab'ekitebe ky'abaikiriza ba Teesalonika abali omu Ruhanga Isiitwe na MUKAMA Yesu Kristo: Nitubagondeza omugisa n'obusinge.

²Obutoosa tusiima Ruhanga habwanyu inywena, nitubaijuka obutalekerra omu kusaba kwaitu.

³Nitwijuka omumaiso ga Ruhanga waitu kandi Isiitwe ebi murukukora habw'okwikiriza kwanyu, n'ebi murukwekambira habw'engonzi zanyu, n'ebi murukugumiisiriza habw'okunihira oku mwina omu MUKAMA waitu Yesu Kristo.

⁴Bagenzi bange, nitumanya Ruhanga nkooku abagonza kandi nkooku yabakomere;

⁵ningira Amakuru Amarungi aga twabarangiriire gakabahikaho kwo. Gatabahikeho omu bigambo byonka, baitu omu maani n'omu Mwoyo Ahikiriire kandi gakabahwitura. Mumanyire enyikara yaitu omuli inywe nkooku ekaba eri nitugenderra kubagasira.

⁶Na inywe mukahondera engeso zaitu n'eza MUKAMA, mwaikiriza Amakuru Amarungi nimubonesibwa muno, baitu mwina okusemererwa habw'okukoonyerwa Mwoyo Ahikiriire.

⁷Nukwo mwafookere muti kyokurorraho ky'abaikiriza boona abali Makedoniya n'Akaaya.

⁸Ekigambo kya MUKAMA mutakirangaanize omu Makedoniya n'Akaaya honka, baitu amakuru g'okwikiriza oku mwina omu Ruhanga gakaranganwa hoona. Nikyo ntarukugondeza kukibazaaho muno;

⁹habwokuba bbo bonyini bamanyisa buli hantu nkooku mwatutangiriire kurungi kandi nkooku mwahindukiire kwo Ruhanga, mwaleka embandwa, nukwo muheereze Ruhanga omwomeezi kandi ow'amazima,

¹⁰n'oku murukulindirirra Omwana we kuruga omu iguru, ou yahumbwire omu bafu, nuwe Yesu anyakutujuna ekifubiro ekiri ky'okwija.