Read Runyoro - rutooro 1Bat 2 Bible Online

1Bat 2 - Runyoro - rutooro bible

1Bat 2

¹Bagenzi bange, inywe inywenka nimumanya okubunga kwaitu omuli inywe nkooku kutarafiire busa.

²Noobu turaaba twabonesiibwe kandi twaswaziibwe omu Filipi nkooku murukumanya; baitu Ruhanga waitu akatuha obumanzi obw'okubarangirra Amakuru Amarungi nituhakanizibwa muno.

³Kandi binu ebi turukubeegesa tibirugwamu nsobi, tibiri bibi, tibirumu bugobya.

⁴Baitu Ruhanga nkooku yakukomere, akatukwasa Amakuru Amarungi ganu, na itwe nukwo tugarangirra tutarukugenderra kusiimwa abantu, baitu kusiimwa Ruhanga anyakumanya emitima yaitu.

⁵Mukimanyire kurungi, kandi Ruhanga nuwe kaiso waitu, itwe titukabazaaga bigambo by'okunwekanweka, rundi eby'okuswekerra omururu gwaitu.

⁶Titwaserraga kitiinisa omu bantu: omuli inywe rundi omu bandi, kunu nk'abakwenda ba Kristo twakusoboire kukisaba.

⁷Baitu tukabakwatirwa embabazi, nk'omulezi arukulera abaana be.

⁸Nukwo habw'okubagonza muno, tukamalirra kubagana na inywe, tikuli kubagana Amakuru Amarungi ga Ruhanga gonka, baitu n'obwomeezi bwaitu bwonyini, habwokuba mukaba mumazire kufooka nganjani zaitu mali.

⁹Bagenzi bange, nimwijuka omulimo n'okutalibana kwaitu; twakoraga nyamusana n'ekiro nukwo tuleke kulemerra omuntu weena omuli inywe, obu tukaba nitukyabarangirra Amakuru Amarungi ga Ruhanga.

¹⁰Inywe muli bakaiso, kandi Ruhanga nawe kaiso, engeso zaitu nkooku ziikara ziri nungi, zihikiriire kandi itarukunyoomwa inywe abaikiriza.

¹¹Nimumanya nkooku twateererraga buli omu omuli inywe, n'oku twayekambisaaga boona kandi twahanaga nka isebaana oku akora abaana be,

¹²nukwo mube n'engeso ezirukusiimwa Ruhanga, anyakubeeta kutaaha omu bukama bwe n'omu kitiinisa kye.

¹³Kandi na itwe nikyo tusiimira Ruhanga obutoosa, habwokuba obu mwahuliire ekigambo kya Ruhanga eki twabatebiize, mutakiikirize nk'ekigambo ky'abantu, baitu mukakiikiriza nk'ekigambo kya Ruhanga ekirukukora omuli inywe abaikiriza. Kandi mazimakwo nukwo kiri.

¹⁴Ab'oruganda, inywe mukasisana ebitebe by'abaikiriza Ruhanga omu Kristo Yesu ebiri Buyudaaya; habwokuba abantu ab'ihanga lyanyu bakababonesa enaku ezirukusisana nk'ez'abaikiriza ba Buyudaaya baabonesiibwe ab'ihanga lyabo.

¹⁵Nubo abaisire MUKAMA Yesu n'abarangi, nubo baatubingire, baabiihiza Ruhanga kandi baahakaniza abantu boona.

¹⁶Bakatutanga kwegesa Abanyamahanga ebigambo ebisobora kubaleetera okujunwa, nukwo Abayudaaya kuhikiriza bati ebikorwa byabo ebibi. Baitu ekifubiro kya Ruhanga kirinzirwe kyabahikaho.

¹⁷Bagenzi bange, obu tukaba twakabarugaho akacu kake twahukaniize emibiri etali myoyo, tukeekamba muno, twina ekihika kingi eky'okugaruka kubarora;

¹⁸habwokuba tukagonza kwija owaanyu. Nyowe Paulo nkalengaho emirundi nyingi, baitu Sitaani akantanga.

¹⁹Baitu nu, MUKAMA waitu Yesu obu aliija, okunihira kwaitu, okusemererwa kwaitu, n'ekondo yaitu ebirukutusiimisa omumaiso ge nibyo biha? Ti niinywe?

²⁰Habwokuba niinywe kitiinisa kyaitu n'okusemererwa kwaitu.