Read Runyoro - rutooro 1Bat 3 Bible Online

1Bat 3 - Runyoro - rutooro bible

1Bat 3

¹Nahabweki obu twarozire tutakyasobora kugumiisiriza, tukacwamu tusigale Aseni itwenka,

²nukwo kutuma Timoteho mugenzi waitu kandi omuheereza wa Ruhanga omu kurangirra Amakuru Amarungi ga Kristo, abagumye omu kwikiriza kwanyu kandi abateererre,

³haleke kubaho n'omu arukutengesibwa emihito egi. Na inywe inywenka nimumanya ebi nkooku bikaba biri by'okutuhikaho.

⁴Tukabagambira kara, obu tukaba tukyali na inywe, nkooku tuli b'okubona emihito; kandi nukwo kyabairekwo, nkooku murukumanya.

⁵Habweki obu narozire ntakyasobora kwikara ntaina eki mbahuliireho, nabatumaho Timoteho, mmanye okwikiriza kwanyu nkooku kuli, habwokuba nkaba nintiina nti, rundi omwohi ataakuba abooheze, kandi omulimo gwaitu gukafa busa.

⁶Hati Timoteho obu yagarukire naaruga owaanyu, yatuleetera amakuru ag'okwikiriza kwanyu n'okugonza kwanyu. Kandi yatumanyisa nkooku mutwijuka butoosa n'okusemererwa, nimugonza muno kuturora, nka itwe oku turukugonza kubarora.

⁷Nahabweki ab'oruganda, okwikiriza kwanyu kutuhuumwize omu bujune bwaitu bwona n'omu mihito yaitu.

⁸Okumanya inywe nkooku mugumire hali MUKAMA, nikyo kitugumya omutima.

⁹Ruhanga turaamusiima tuta habw'okusemererwa oku kwona oku twinakwo habwanyu omumaiso ge?

¹⁰Tukataho muno omutima kusaba nyamusana n'ekiro, nukwo tusobole kurorangana twongerereze ebirukubura omu kwikiriza kwanyu.

¹¹Nitusaba Ruhanga waitu kandi Isiitwe wonyini, hamu na MUKAMA waitu Yesu, batwebembere batuhikye owaanyu.

¹²Kandi MUKAMA abongere okugonzangana muno, n'okugonza abantu boona, nka itwe oku tubagonza,

¹³nukwo asobole kugumya emitima yanyu, mwemerre omu maiso ga Ruhanga kandi Isiitwe nimwera kandi mutaina kamogo ha kiro MUKAMA waitu obw'aliija aina abahikiriire be boona.