Read Runyoro - rutooro 1Bat 4 Bible Online

1Bat 4 - Runyoro - rutooro bible

1Bat 4

¹Eky'okumalirra, bagenzi bange, nitubeesengerereza kandi nitubateererra omu ibara lya MUKAMA Yesu tuti: nkooku mwatwegiireho okuba n'engeso enungi n'okukora ebisiimwa Ruhanga, mweyongere muno, kukira nkooku murukukora hati.

²Mumanyire ebiragiro ebi twabahaire habwa MUKAMA Yesu.

³Ningira kinu nikyo Ruhanga agonza: mube abarukwera, mwetantale obusiihani.

⁴Buli omu omuli inywe amanye okulema omubiri gwe gwikale nigwera kandi gwina ekitiinisa;

⁵mutatwarwa okwegomba okw'omubiri nk'abakafiiiri abatamanya Ruhanga.

⁶Nukwo haleke kubaho muntu weena anyakusobeza mugenzi we akamusiisira oburungi bwe obu, habwokuba MUKAMA nuwe muhoozi w'enzigu omuli ebi byona, nkooku twabahabwire kara nitubakomeetereza.

⁷Ningira Ruhanga atatwetere eby'obugwagwa, baitu akatwetera oburukwera.

⁸Weena anyakugaya enyegesa enu, tagaya muntu, baitu agaya Ruhanga anyakubaha Mwoyo we Ahikiriire.

⁹Baitu ha kigambo ky'okugonza ab'oruganda, timurukwetaaga muntu n'omu kubahandiikira, habwokuba inywe inywenka Ruhanga akabeegesa okugonzangana;

¹⁰kandi mazimakwo nimugonza ab'oruganda boona abali omu Makedoniya. Baitu nitubateererra bagenzi baitu, mweyongere muno okukora muti.

¹¹Muteho omutima kwikara mutaina bwogo, mwekambire emirimo yanyu, kandi mukole n'emikono yanyu nkooku twabahabwire,

¹²nukwo abantu b'aheeru babahe akitiinisa, kandi mwemale inywenka mutarukukwatirirwa muntu n'omu.

¹³Bagenzi bange, tirurukwenda inywe okutamanya ha by'abaagwijagiire nukwo muleke kusaalirwa nk'abandi abataina kunihira oku basaalirwa.

¹⁴Baitu obu turaaba nitwikiriza Yesu nkooku yafiire kandi yahumbuuka, nukwo n'abo abaagwijagiriire omu Yesu, Ruhanga alibaleeta hamu nawe obu aligaruka.

¹⁵ Ka tubaijukye MUKAMA ngu, itwe aboomire abaliba baroho MUKAMA haaligarukira, titulibanza abo abaagwijagiire.

¹⁶Habwokuba MUKAMA wonyini alisirimuka naaruga omwiguru, naaragira n'iraka ery'obusobozi, na mukuru wa bamalaika aliba naayamirra, kandi n'engwara ya Ruhanga eriba neegamba. Nubwo abaafeeriire omu Kristo balibanza kuhumbuuka.

¹⁷Hanyuma na itwe aboomiire abaliba bakyaroho, tulitwarwa hamu nabo omu bicu okutangirra MUKAMA omu mwanya; nukwo tuliikara tuti nawe ebiro byona.

¹⁸Nahabweki muhuumuzangane n'ebigambo ebi.