Read Runyoro - rutooro 1Bat 5 Bible Online

1Bat 5 - Runyoro - rutooro bible

1Bat 5

¹Bagenzi bange, eby'obusumi n'emyaka timurukwetaaga kubihandiikirwa.

²Habwokuba inywe inywenka nimumanya kurungi ekiro eky'okugaruka kwa MUKAMA kiriija nk'omusuma oku aija omu bwire bw'ekiro.

³Abantu obu baba nibagamba bati: “Haroho obusinge n'okuteekaana”, nubwo bahikwaho okuhwerekerra okwa bwango nkooku ebisa bihikaho omukazi anyakwina enda, kandi tihalibaho ow'alitabuka.

⁴Inywe bagenzi bange, timuli omu mwirima, ekiro eki kubahikaho nk'omusuma.

⁵Habwokuba inywena muli baana b'omusana kandi muli baana b'ekyerezi; tituli b'ekiro rundi b'omwirima.

⁶Nukwo nu, tuleke kugwijagira abandi nkooku bakora; baitu twikale niturora kandi tuleke kutamiira.

⁷Ningira abo abagwijagira, bagwijagira ekiro, kandi n'abo abatamiira, batamiira ekiro.

⁸Baitu itwe nkooku tuli baana b'omusana, tuleke kutamiira, twekingire ha kifuba engabu y'okwikiriza n'okugonza, kandi ha mutwe tuteho enkofiira y'okunihira okujunwa.

⁹Ningira Ruhanga atatuteereho kufubirwa, baitu akatuteeraho kujunwa MUKAMA waitu Yesu Kristo,

¹⁰ayatufeeriire nukwo twomere hamu nawe, obu tuba niturora rundi tugwijagiire.

¹¹Habweki muhuumuzangane kandi mugumyangane nkooku murukukora hati.

¹²Bagenzi bange nitubeesengereza, mutemu ekitiinisa abo abarukukora omuli inywe, abeebembezi kandi abahabuzi banyu omu MUKAMA,

¹³kandi mubahe ekitiinisa kingi nimubagonza habw'omulimo babakorra. Mwikarane n'obusinge.

¹⁴Bagenzi bange nitubateererra, muhabule abagara, mugumye abataina maani omu mutima, mukonyere abaceke. Kandi abo boona mubagumiisirize.

¹⁵Mwerinde, haleke kubaho n'omu omuli inywe arukuhoora enzigu habw'obubi obu akoliirwe; baitu obutoosa mulengeho okukorrangana oburungi n'okubukorra abandi boona.

¹⁶Musemererwege obutoosa,

¹⁷musabege obutalekerra,

¹⁸musiime Ruhanga omu byona ebinyakubaho; habwokuba eki nikyo Ruhanga abagondeza omu Kristo Yesu.

¹⁹Muleke kubundiika Mwoyo Ahikiriire,

²⁰muleke kugaya eby'oburangi;

²¹baitu mwetegereze buli kintu, kandi mugumire ha birungi.

²²Mwetantale ekibi ky'omulingo gwona.

²³Ruhanga, MUKAMA ow'obusinge, abeereze kimu. Emitima yanyu, emyoyo yanyu, n'emibiri yanyu ikale kurungi etaina kamogo okuhika ha kiro eky'okugaruka kwa MUKAMA waitu Yesu Kristo.

²⁴Ruhanga ayabeesire aba mwesigwa kandi alihikiriza ebi yaraganiize.

²⁵Bagenzi bange, mutusabire!

²⁶Muramukye ab'oruganda boona n'omwoyo omurungi nimubagwa omu kifuba.

²⁷Nimbateererra omu ibara lya MUKAMA, ebbaruha enu esomerwe ab'oruganda boona.

²⁸Embabazi za MUKAMA waitu Yesu Kristo ziikale na inywe.