Read Runyoro - rutooro Yos 1 Bible Online

Yos 1 - Runyoro - rutooro bible

Yos 1

¹Musa omuheereza wa MUKAMA obuyamazire kufa, MUKAMA yagambira omuheereza wa Musa, Yoswa mutabani wa Nuuni ati:

²“Musa omuheereza wange afiire, habweki, hati iwe n'abantu banu boona aba Isirairi, mwimuke mwambuke ekyambu kinu Yorudaani, mutaahe omunsi ei ndaabaha,

³nkooku naragaanize Musa. Ensi ei muraarubataho ndaagibaha.

⁴Kuruga ha irungu lya Lebbanoni enu okuhikira kimu ha kisaaru ekikooto Efuraate, ensi yoona ey'Abahiiti okuhika ha nyanja Enkooto ha bukiizi obwa Bugwaizooba, eraaba nsi yanyu.

⁵Obwoliba okyali mwomeezi, busaho muntu alisobora kukusingura; nkooku naikaraga na Musa, nukwo ndaikaraga na iwe.

⁶Ogume kandi obe manzi, habwokuba niiwe oraayebembera abantu banu kutunga ensi egi ei narahiire baisenkurubo kugibaha.

⁷Kimu kyonka; ogume kandi obe manzi muno, oteho omutima okukora ebiragiro eki birukugamba Musa omwiru wange ebiyakuhaire; otagirra akacweka kaabyo na kamu obugara, nubwo olitunga obusinge hoona h'oligenda.

⁸Akasumi koona, ekitabu kinu eky'ebiragiro, okisomerege abantu, okiteekerezehoga nyamusana n'ekiro, nukwo oyegendereze kukora byona ebinyakuhandikirwemu; obu nubwo oliheebwa omugisa, kandi otunge obusinge omu byona ebyokora.

⁹Ninyowe nkuragiire. Ogume kandi obe manzi; oleke kutinisirizibwa rundi noobu hakuba kukangwa, nyowe MUKAMA Ruhanga wawe ndaikaraga na iwe hoona h'oraagendaga.”

¹⁰Yoswa yaragira abalemi b'abantu naagamba ati:

¹¹“Murabe omurukande, muragire abantu muti: ‘Muteekanize ebintu byanyu; hasigaire ebiro bisatu mwambuke ekyambu kinu Yorudaani mutaahe kandi mutunge ensi MUKAMA Ruhanga wanyu ei arukwija kubaha.’ ”

¹²Yoswa yagambira ab'oruganda rwa Rubbeni, orwa Gaadi n'ekicweka eky'oruganda orwa Manaase ati:

¹³“Mwijuke ekigambo Musa omuheereza wa MUKAMA ekiyabaragiire naagamba ati: ‘MUKAMA Ruhanga wanyu naija kubaha ensi ey'okuhuumurramu.’

¹⁴Abakazi n'abaana banyu, nibaija kusaagaana hamu n'amagana omunsi Musa ei yabahaire, baitu abasaija boona abarwani omuli inywe, baraayebeembera bagenzi banyu babakonyere kurwaana

¹⁵okuhikya obubaratunga ensi eya Bugwaizooba bwa Yorudaani MUKAMA Ruhanga wanyu arukubaha. Obwaliha obusinge enganda zoona eza Isirairi nubwo muligaruka hanu mulye ensi yanyu, Musa omuheereza wa MUKAMA ei yabahaire enyakuli busi bwa nseeri obw'ekyambu Yorudaani, ha bukiizi obwa Burugaizooba.”

¹⁶Baamugarukamu bati: “Byona ebi oturagiire turaabikora, kandi hoona h'oraatutumaga, turaagendayoga. Nkooku twaahurraga Musa omu buli kintu, na iwe nukwo turakuhurraga.

¹⁷Katusabe, MUKAMA aikale na iwe nkooku yaikaraga na Musa.

¹⁸Omuntu weena araagayaga ekiragiro kyawe, akanga kuhurra ebi ogambire, aitwege. Baitu, fooka w'amaani kandi ogume omutima.”