Read Runyoro - rutooro Yos 10 Bible Online

Yos 10 - Runyoro - rutooro bible

Yos 10

¹Adonizedeki omukama wa Yerusaalemu obuyahuliire nkooku Yoswa akwasire orubuga Ai aruhwerekeriize, arukozire hamu na mukama warwo nkooku yakozire Yeriko na mukama warwo, abantu ab'omurubuga Gibbyoni nkooku basabire Abaisirairi obusinge kandi bali hamu nabo,

²yatiina muno, habwokuba Gibbyoni rukaba ruli rubuga rukooto nk'embuga ezindi zoona ez'abakama, kandi orubuga oru, rwakiraga Ai obukooto, abantu barwo bakaba bali b'amaani.

³Nubwo Adonizedeki omukama wa Yerusaalemu yatumaho Hohamu omukama wa Hebburoni, Piramu omukama wa Yaramusi, Yafaaya omukama wa Lakisi na Debiri omukama wa Eguroni naagamba ati:

⁴“Mwije munkonyere turwanise abantu ab'orubuga Gibbyoni, habwokuba basabire Yoswa obusinge n'abantu ba Isirairi boona.”

⁵Aho abakama abataano ab'Abamooli: owa Yerusaalemu, owa Hebburoni, owa Yaramuti, owa Lakisi, nowa Eguroni, baazinisa amahe gaabu, baagenda baagota orubuga Gibbyoni, baarurwanise.

⁶Abantu ab'orubuga oru, baatumaho Yoswa omurukande orwa Girigaali nibagamba bati: “Otatunaga, itwe abairu bawe otabandaara, orahuke bwango otuhikeho, otujune otukonyere; habwokuba abakama boona Abamooli abanyakwiikara omunsi ey'ensozi, beekobere kuturwanisa.”

⁷Yoswa ataikaleho, uwe n'abantu be boona abakwata engabu, abasaija emanzi kandi ab'amaani, baaruga Girigaali.

⁸MUKAMA yagambira Yoswa ati: “Otabatiina, mbakuhaire obasingule; tihabeho noomu arakwerengerra.”

⁹Yoswa obuyarubasire n'abaserikale be ekiro kyona okuruga Girigaali, yabagwera ahonaaho batamwetegekere.

¹⁰MUKAMA yaburanganiza Abamooli omumaiso g'Abaisirairi, Yoswa yabaita muno ha rusozi Gibbyoni, yabairukya n'abatomya omuhanda ogurukutemba Besi-horoni, yabarwanisa okuhikya Azeka na Makeda.

¹¹Obubakaba nibasirimuka Besi-horoni nibairuka Abaisirairi, MUKAMA yabanagira orubaale rwingi, rwagenda nirubateera okuhikya Azeka, rwabaita. Abamooli abaakizire obwingi, bakaitwa orubaale okukira abaisirwe empirima eby'Abaisirairi.

¹²Ha kiro eki Ruhanga yaheeriireho Abaisirairi okusingura Abamooli, Yoswa akagambira MUKAMA omumaiso g'Abaisirairi ati: “Iwe izooba, yemerra ha rusozi Gibbyoni, kandi iwe kwezi, otaruga omukihanga ekya Aiyaroni.”

¹³Izooba lyayemerra, n'okwezi kwaikara nambere kwasangirwe, okuhikya ihanga obulyamazire kuhoora abanyanzigwa balyo enzigu. Eki, kitahandiikwe omukitabu kya Yasara ngu: Izooba likaikara hagati y'iguru, lyamara ekiro kyona litagwire?

¹⁴Okuruga ira lyona kuhika ha kiro eki, n'okuruga obu, hakaba hatakabahoga ekiro nkeeki, Ruhanga ekiyahuliirireho omuntu, kandi eki yarwaniriireho Isirairi.

¹⁵Yoswa hamu n'Abaisirairi boona, baagaruka omurukande orwa Girigaali.

¹⁶Abakama bali abataano, baasingurwa, baayesereka omu bwingira bwa Makeda.

¹⁷Abantu baagambira Yoswa nkooku abakama bali babasangire beeserekere omu bwingira bwa Makeda.

¹⁸Yoswa yagamba ati: “Mukwate amabaale amakooto, mukinge obwingira, muteho abasaija baikale ha bwingira obu babulinde;

¹⁹baitu inywe, mutaikara aho. Muhondere abanyanzigwa banyu, mubaturuke enyuma, mutabaikiriza kutaaha omu mbuga zaabbu, habwokuba MUKAMA Ruhanga wanyu ababahaire mubasingule.”

²⁰Yoswa n'Abaisirairi obubaamazire kwita Abamooli, okuhikya obubaababingiire kimu, kandi abo abaasigaireho, obubaataahire omu mbuga ezigumire,

²¹abantu ba Yoswa boona baagaruka omu rukande orwa Mekeda. Hatabeho muntu n'omu ayasoboire kubaza kubi ha bantu ba Isirairi.

²²Nubwo Yoswa yagamba ati: “Mukingule obwingira, mwihemu abakama bali abataano, mubandeetere.”

²³Baakingura obwingira, baihamu abakama bali abataano: omukama wa Yerusaalemu, omukama owa Hebburoni, omukama owa Yaramusi, omukama owa Lakisi, n'omukama wa Eguroni.

²⁴Obubaamazire kumuleetera abakama abo, yayeta abantu ba Isirairi boona yabagambira, yagambira abakuru b'abantu abarwani abakaba baramagire na uwe ati: “Mwirre haihi, murubate abakama banu ha bikya.” Bairra haihi baabarubata ha bikya nkooku Yoswa yabaragiire.

²⁵Yoswa yagambira Abaisirairi ati: “Muleke kutiina n'okuhoibwamu amaani; MUKAMA nukwo arukwija kubakora ati abamurukurwanisa.”

²⁶Hanyuma Yoswa yateera abakama bali yabaita, emitumbi yagihanika ha miti etaano buli mutumbi hamuti gwagwo, yaikaraho okuhikya orwebagyo.

²⁷Baitu izooba obulikaba nirirenga, yaragira abantu baahanuura emitumbi, baagihungura omubwingira nambere abakama abo bakaba beeserekere, baagaruka baabukinga, Obwingira obu bukyaliyo na hati.

²⁸Ha kiro eki, Yoswa yahamba orubuga Makeda, yaruseesa, mukama warwo yamwisa empirima; abantu baamwo boona yabahwerekereza, hatasigaleho muntu noomu; omukama owa Makeda, yamwita nkooku yaisire owa Yeriko.

²⁹Kandi Yoswa yaruga Makeda hamu n'Abaisirairi boona yaramagira orubuga Libuna, yarurwanisa;

³⁰ensi egi nayo n'omukama wayo, MUKAMA yagihayo okusingurwa Abaisirairi Yoswa yaseesa orubuga Libuna na boona abakaba barumu, yabahwerekereza n'empirima, atasigeho muntu noomu; nkooku yaisire omukama owa Yeriko, nukwo yakozire n'omukama w'orubuga oru.

³¹Yoswa yayeyongera omumaiso hamu n'Abaisirairi boona kuruga Libuna baagenda Lakisi, orubuga yarugota yaruseesira.

³²MUKAMA, orubuga Lakisi, narwo yarubaha kurusingura, Yoswa yaruhamba ha kiro ekya kabiri, yaruseesa, boona abakaba barumu yabaita n'empirima nkooku yakozire Libuna.

³³Nubwo Horamu omukama wa Gezere, yaija kwirukirra orubuga Lakisi, Yoswa yamwita hamu n'abantu be boona yabamaraho.

³⁴Yoswa yayeyongera omumaiso hamu n'Abaisirairi boona kuruga Lakisi baagenda Eguroni, baarugota baaruseesira;

³⁵baaruhamba ha kiro eki, baruhwerekereza nkooku yakozire Lakisi.

³⁶Nubwo Yoswa yaruga Eguroni hamu n'Abaisirairi boona baagenda Hebburoni, baaruseesira;

³⁷baaruhamba, baaruseesa n'embuga zaabbu ezindi, omukama warwo na boona abakaba barumu, babaita n'empirima, baruhwerekereza nkooku yakozire Eguroni.

³⁸Kandi Yoswa n'Abaisirairi boona baakubuutukira orubuga Debiri, baaruseesira,

³⁹baaruhamba n'omukama warwo, n'embuga zarwo ezindi. Abantu barwo baabaita n'empirima baabahwerekereza, batasigeho muntu noomu nkooku baakozire Hebburoni na Libuna n'abakama baazo, nukwo baakozire Debiri n'omukama warwo.

⁴⁰Yoswa nukwo yasingwire ati ensi yoona, ensi ey'ensozi na Negebbu, n'ekyeya n'obukonkomoko, n'abakama baayo boona. Akahwerekereza abantu boona, atasigeho muntu n'omu MUKAMA Ruhanga owa Isirairi nkooku yaragiire.

⁴¹Yoswa akasingura kuruga Kadesi-Barineya, okuhika Gaaza n'ensi yoona eya Goseni, okuhikira kimu Gibbyoni.

⁴²Yahamba abakama boona n'ensi zaabbu omukasumi ako, habwokuba MUKAMA Ruhanga owa Isirairi nuwe yarwaniriire Abaisirairi.

⁴³Hanyuma Yoswa hamu n'Abaisirairi boona, baagaruka omurukande orwa Girigaali.