Read Runyoro - rutooro Yos 11 Bible Online

Yos 11 - Runyoro - rutooro bible

Yos 11

¹Yabini omukama wa Hazora obu yahuliire Abaisirairi nkooku basingwire, yatumaho Yobabu omukama wa Madoni, noowa Simurooni, noowa Akisaafu,

²n'abakama abandi abakaba bali omunsi ey'ensozi eya ha bukiizi obw'emoso, noomu Araba habukiizi obw'obulyo obwa Kinerosi.

³Yayongera yatumaho naabo ab'omu byeya, naaba hambaju za Nafasi-dora ha bukiizi obwa Bugwaizooba, Abamooli, Abahiiti, Abaperezi, Abayebusi ab'omunsi ez'ensozi n'Abahiivi abaaikaraga hansi ey'ensozi Herumooni, omunsi ya Mizipa.

⁴Abakama abo, baija n'amahe gaabu, ihe erikooto ery'abantu abaingi muno nk'omusenyi ogwa ha musa gw'enyanja, baija n'embaraasi n'ebigaali bingi muno.

⁵Abakama abo baateeraniza amahe gaabu, kurwanisa Abaisirairi, baateera orukande haihi n'akasaaru Meromu.

⁶MUKAMA yagambira Yoswa ati: “Otabatiina, habwokuba nyenkya omukasumi nka kanu, abo boona ninyija kubaha Abaisirairi babaite; embaraasi zaabbu oziteme ebiteega, ebigaali byabo obyokye n'omurro.”

⁷Ahonaaho Yoswa yaija n'abantu be abarwani, yabagwera batamwetegekere ha kasaaru Meromu.

⁸Abantu abo, MUKAMA yabaha Abaisirairi babasingule, abamu baabaita, abandi baabairukya okubahikya Sidoni orubuga orukuru na Misirefosi-Maimu, noomu kihanga ekya Mizipa, habukiizi obwa Bugwaizooba; baabaita batasigeho noomu.

⁹Yoswa, akabakora nkooku MUKAMA yamuragiire; yatema embaraasi zaabbu ebiteega, kandi yayokya ebigaali byabo.

¹⁰Yoswa n'abasaija obubagarukire bahamba Hazora, omukama warwo bamwita n'empirima. Hazora nubwo bukaba buli bukama obukuru obwakiraga amakama agandi gali goona.

¹¹Boona abakaba bali omunsi egi, babacumita empirima baabaita, baabahwerekereza; hatabeho noomu ayasigaireho, orubuga rwa Hazora yarwokya.

¹²Yoswa embuga ezi zoona, yazihamba, yaziseesa abakama baazo yabahwerekereza, nkooku Musa omwiru wa MUKAMA yamuragiire.

¹³Baitu embuga zoona ezikaba zombekerwe habusozi, Abaisirairi batazookye, okwihaho Hazora, oru rwonka, nurwo Yoswa yayokeze.

¹⁴Ebintu byona eby'embuga ezi n'ente, Abaisirairi baabinyaga baabitwara; baitu abantu boona bakabaita n'empirima baabahwerekereza.

¹⁵MUKAMA nkooku yaragiire Musa omwiru we, Musa na uwe nukwo yaragiire Yoswa, Yoswa yakora eki yaragiirwe; byona MUKAMA ebi yaragiire Musa, Yoswa akabihikiriza.

¹⁶Nubwo Yoswa yahamba ensi egi yoona ey'ensozi na Negebbu, ensi ey'ekyeeya na Araba n'ensi ey'ensozi n'ey'ekyeeya ebya Isirairi,

¹⁷okuruga ha rusozi Haraki orunyakuli ha bukiizi bwa Seiri, okuhikira kimu Baali-gaadi omukihanga ekya Lebbanooni, ifo y'orusozi Herumooni; abakama ab'ensi ezi, yabakwata yabaita.

¹⁸Abakama abo boona, Yoswa akabarwanisa okumara omwanya mukooto.

¹⁹Hatabeho rubuga orw'asabire Abaisirairi obusinge okwihaho Abahiivi abaikaraga omunsi Gibbyoni; embuga ezindi zoona, bakaihamba omu bulemu.

²⁰MUKAMA nuwe yabagumanganiize emitima, nukwo barwanise Abaisirairi, n'Abaisirairi babahwerekereze. Baleke kubaganyira, baitu babahwerekereze, nkooku MUKAMA yaragiire Musa.

²¹Omu kasumi ako, Yoswa akaija yahwerekereza Abaanaki abakaba bali omunsi ey'ensozi, abakaba bali Hebburooni, Debiri, Anabu n'abakaba bali omunsi yoona ey'ensozi eya Yuda, n'omunsi eya Isirairi yoona ey'ensozi; abo boona, Yoswa akabahwerekereza hamu n'embuga zaabo.

²²Omunsi y'Abaisirairi, hatasigalemu Omwanaki noomu; omunsi Gaaza, Gaasi na Asidoodi, nuho haasigaire abantu bake.

²³Yoswa, nukwo yahambire ensi yoona ati, nkooku MUKAMA yaragiire Musa, yagiha Abaisirairi bube butaka bwabo nkooku enganda zaabbu zikaba nizibaganizibwamu. Okuruga obu, ensi yateekaana etarumu bulemu.