Read Runyoro - rutooro Yos 13 Bible Online

Yos 13 - Runyoro - rutooro bible

Yos 13

¹Omukasumi ako, Yoswa akaba akuzire muno agurusire; MUKAMA akamugambira ati: “Okuzire muno, kandi hakyaroho ensi nyingi muno ezinyakusigaliire kusingurwa.

²Ensi ezi nizo zinu: ensi zoona ez'Abafiristi n'ez'Abagesura, zoona

³okuruga Sihora enyakuli harubaju orwa Burugaizooba obwa Misiri ha bukiizi obw'emoso, okugarukira ha mutaano gwa Ekuroni, egi yoona enyakwetwa Kanaani. Haroho abalemi Abafiristi bataano, nubo banu: Abagazi, Abasidodi, Abasikeroni, Abagaasi, Abakuroni, n'Abaavimu,

⁴abanyakuli ha bukiizi obw'olulyo; ensi yoona ey'Abanyakanaani na Mehara ey'Abasidoni, okuhika Affeki ha mutaano ogw'Abamooli,

⁵n'ensi ey'Abagebali, na Lebbanooni yoona habukiizi obwa Burugaizooba. Okuruga Baali-gaadi, ifo y'orusozi Herumooni okuhika ha ntaaho ya Hamasi,

⁶abantu boona abanyakuli omunsi ey'ensozi okuruga Lebbanooni okuhika Misirefosi-maimu n'Abasidoni boona, nyowe nyenka ninyija kubabinga Abaisirairi batakahikire omunsi yabo; ngihe Abaisirairi bube butaka bwabo nkooku nakuragiire.

⁷Hati ensi enu, ogigabire enganda mwenda eza Isirairi n'ekicweka eky'oruganda rwa Manaase.”

⁸Ab'oruganda rwa Rubbeni n'orwa Gaadi n'ekicweka eky'oruganda rwa Manaase, bakatunga itaka lyabo, Musa eri yabahaire obuseeri bwa Yorudaani ha bukiizi obwa Burugaizooba.

⁹Musa akaba asingwire abantu boona, kandi ababingire omunsi okuruga Aroheri ha mutaano ogw'ekihanga Arunooni, hamu n'orubuga orunyakuli hagati y'ekihanga n'ekyeeya kyona ekya Medeba okuhika Diboni.

¹⁰Otaireho n'embuga zoona ez'omukama ow'Abamooni ayaalemaga Hesiboni, okugarukira hamutaano ogw'Abamooni.

¹¹Na Giryadi, n'ensi ey'Abagesura n'Abamakasi; n'orusozi Herumooni rwona, Basani yoona okugarukira Saleka.

¹²Obukama bwona obwa Ogi owa Basani ayalemaga Asitarosi na Edereyi, nuwe wenka yasigaireho hali Abalefaimu abatarasingirwe.

¹³Baitu abantu ba Isirairi, batabinge Abagesura n'Abamakasi omunsi, bakyali nabo okuhika na hati.

¹⁴Oruganda orwa Leevi rwonka, Musa nurwo atarahaire itaka; habwokuba ebihongwa ebinyakwokeze ebinyakuhongerwa MUKAMA, nugwo gwabaga mugabo gwabo nkooku MUKAMA yamuragiire.

¹⁵Musa yaha oruganda rwa Rubbeni itaka, yamarayo ebitabu byabo byona.

¹⁶Ensi yabo yarugirraga Aroheri enyakuli harubaju orw'ekihanga Arunooni, n'orubuga orunyakuli hagati y'ekihanga, n'ekyeeya kyoona ekinyakuherraine na Medeba.

¹⁷Ensi enu ekaba erumu Hesiboni, n'embuga zaayo zoona ezinyakuli omukyeeya; Diboni na Bamosi-baali, Besi-baali-meyoni,

¹⁸Yahazi na Kedemosi, Mefaasi,

¹⁹Kiryasaimu, Sibuma, Zeresi-sahara eya harusozi orunyakuli omu kihanga.

²⁰Besi-peyora n'obweculiko obwa Pisiga na Besi-yesimosi,

²¹ezi nizo ensozi zoona ez'omukyeya, n'obukama bwona obwa Sihoni omukama w'Abamooli ayaalemaga ali Hesiboni. Musa ouyabingire hamu n'abeebembezi aba Midyani: Evi, Rekemu, Zura, Hura na Reba abalemi ba Sihoni abaikaraga omunsi egi.

²²Balaamu mutabani wa Beyora omuraguzi, na uwe Abaisirairi bakamwita n'empirima hamu n'abandi boona abaisirwe.

²³Ekyambu Yorudaani, nugwo gukaba guli mutaano gw'abantu ba Rubbeni. Obu nubwo bwabaire bugwetwa obw'abantu ba Rubbeni nkooku bakaba bali omubika byabo, omumbuga zaabbu noomu byaro byabo.

²⁴Kandi Musa yayongera yaha Abagaadi obugwetwa bwabo nkooku bakaba bali omu bika byabo.

²⁵Ensi ei baahairwe, niyo: Yazere n'embuga zoona eza Giryadi, ekicweka eky'ensi ey'Abaamooni okugarukira Aroheri enyakuli Burugaizooba bwa Rabba,

²⁶kandi yatandikiraga Hesiboni egarukira Ramasi-mizipe na Betonimu. Kandi etandikira Mahanaimu ehika hansi eya Debiri,

²⁷noomu bihanga Besi-haramu, Besi-nimura, Sukosi, na Zafoni, ekicweka ekikaba kisigaireho ky'obukama bwa Sihoni omukama wa Hesiboni. Ha bukiizi obwa Burugaizooba yagarukiraga ha kyambu Yorudaani, hamutaano ogw'enyanja eya Kineresi, obuseeri bwa Yorudaani.

²⁸Egi niyo ensi eyahairwe abaana ba Gaadi nkooku bali omu bika byabo, omu mbuga zaabbu noomu byaro byabo.

²⁹Kandi Musa yayongera yaaha obugwetwa bw'ensi ekicweka eky'oruganda rwa Manaase nkooku bakaba bali omu bika byabo.

³⁰Ensi yabo ekatandikira Mahanaimu, yayasaamu Basani yoona, nubwo obukama obwa Ogi omukama wa Basani n'embuga zoona eza Yairi ezinyakuli omunsi Basani, embuga nkaaga;

³¹Ekicweka ekya Giryadi, Asitarosi na Edereyi, embuga ezinyakuli omu bukama bwa Ogi owa Basani, ezi ikaheebwa abantu ba Makiri, itwarwe ekicweka eky'abaana ba Makiri baijukuru ba Manaase.

³²Egi niyo ensi ey'ekaba eri omubyeya ebya Mowabbu, Musa ei yagabire obuseeri bwa Yorudaani, Burugaizooba bwa Yeriko.

³³Baitu oruganda rwa Leevi, Musa ataruhe itaka; MUKAMA Ruhanga owa Isirairi nuwe yabaire bugwetwa bwabo nkooku yabagambiire.