Read Runyoro - rutooro Yos 14 Bible Online

Yos 14 - Runyoro - rutooro bible

Yos 14

¹Zinu nizo ensi, abantu ba Isirairi ezi baatungire omunsi Kanaani, ezi baagabiirwe Eryeza nyakatagara, Yoswa mutabani wa Nuuni n'abakuru b'ebika by'enganda b'abantu ba Isirairi.

²Ensi ezi, bakaitunga nibaiterra akaruuru, nkooku MUKAMA yaragiire Musa kuziha enganda mwenda, n'ekicweka eky'oruganda orwa ikumi.

³Habwokuba, enganda ibiri n'ekicweka, Musa akaba amazire kuzigabira ensi enyakuli obuseeri bw'ekyambu Yorudaani, baitu Abaleevi batatunge mugabo.

⁴Abantu ba Yosefu, bakaba bali b'enganda ibiri, orwa Manaase n'orw'Efuraimu. Omunsi, busaho kacweka akaahairwe Abaleevi, baitu bakaheebwa embuga ez'okwikaramu n'amaliisizo ag'amagana gaabu, na h'okuta ebintu byabo ebindi.

⁵Abantu ba Isirairi baakora nkooku MUKAMA yaragiire Musa, baabagana ensi egi.

⁶Nubwo abantu ba Yuda bagenzire hali Yoswa bamusanga Girigaali. Kalebbu mutabani wa Yefune Omukenezi yagambira Yoswa ati: “Nomanya MUKAMA ebi yagambiire Musa omuheereza wa Ruhanga ali Kadesi-baraneya, ebirukukwata hali iwe na hali nyowe?

⁷Musa omuheereza wa MUKAMA kwija kuntuma ali Kadesi-barineya ngende ntate ensi, nkaba mpikize emyaka makumi ana ey'obukuru; namugarurra ekigambo nkooku nayetegeriize.

⁸Baitu bagenzi bange abaagenzire na nyowe bakatiina abantu; nyowe nakoraga kyona Mukama Ruhanga wange ekyarukugonza.

⁹Kandi ha kiro eki, Musa akarahira naagamba ati: ‘Mazima kwo, ensi eri ei orubasiremu eriba yawe n'abaijukuru baawe ebiro byona, habwokuba, oyesigiire kimu MUKAMA Ruhanga wange.’

¹⁰Mukama nkooku yagambiire omuheereza we Musa, obu Isirairi akaba naakyarubata omwirungu, ayongiire yanyomeeza emyaka enu ana n'etaano, baitu hati, dora kiro kinu, nahikya emyaka kinana n'etaano ey'obukuru.

¹¹Na ha kiro kinu, nkyaina amaani nk'aga nkaba nyina ha kiro eki Musa yantumiiremu, ndi w'amaani nkooku nkaba ndi buli, obu nabaga ningenda kutabaara ha bulemu, kandi ningaruka.

¹²“Habweki, hati mpa ensi enu ey'ensozi MUKAMA ei yagambireho ha kiro kiri. Biro biri okahurra nkooku hakaba haliyo Abaanaki abamaani bakaba baina embuga ezombekerwe zaaguma; rundi MUKAMA nasobora kunkonyera nkooku yagambire, ninyija kubabinga.”

¹³Nubwo Yoswa yasabira Kalebbu mutabani wa Yefune omugisa, yamuha ensi Hebburoni, ebe nsi ye.

¹⁴Hebburoni nukwo yafookere eti nsi ya Kalebbu mutabani wa Yefune Omukenezi okuhikya na hati, habwokuba, yakoraga ebi MUKAMA Ruhanga owa Isirairi yagonzaaga.

¹⁵Hebburoni egi, kara yayetwaga Kiryasi-araba; Araba ogu nuwe akaba ali muntu w'ekitiinisa omu Baanaki. Obulemu bwaculeera, ensi yateekaana.