Read Runyoro - rutooro Yos 17 Bible Online

Yos 17 - Runyoro - rutooro bible

Yos 17

¹Hanyuma Manaase yaheebwa omugabo gwe, habwokuba nuwe akaba ali muzigaijo gwa Yosefu. Giryadi na Basani, ikaheebwa Makiri, omuzigaijo gwa Manaase ise Giryadi, habwokuba akaba ali musaija omurwani.

²Ab'oruganda rwa Manaase abandi, nabo bakaheebwa emigabo yabo, ebika byabo nkooku bikaba biri: Abyezeri, Hereki, Asiryeri, Sekemu, Hefere, Semida, banu bakaba bali baana aboojo baijukuru ba Manaase mutabani wa Yosefu nkooku ebika byabo bikaba biri.

³Baitu Zerofehadi mutabani wa Hefere, mutabani wa Giryadi, mutabani wa Makiri, Makiri mutabani wa Manaase atazaale baana aboojo, akazaara abaisiki bonka. Ganu nugo mabara ga bahara be: Mahara, Noha, Hogira, Mirika na Tiruza.

⁴Abaisiki abo bakaija omumaiso ga Eryeza nyakatagara na Yoswa mutabani wa Nuuni, n'omumaiso g'abeebembezi baagamba bati: “MUKAMA akaragira Musa atuhe itaka hamu na bagenzi baitu.” Habweki nkooku MUKAMA yaragiire Musa, yabaha itaka omubagenzi baabu abaazairwe baisebo.

⁵Eki nikyo kyatungisize Manaase emigabo ikumi otabaliireho Giryadi na Basani ezinyakuli busi bwa nseri obwa Yorudaani;

⁶habwokuba abaijukuru ba Manaase abaisiki bakatunga obugwetwa bwabo hamu na abaijukuru be aboojo. Ensi Giryadi ekaheebwa abaana ba Manaase abaasigaireho.

⁷Ensi eya Manaase yarugirraga Asere, ehika Mikimetati enyakuli Burugaizooba bwa Sekemu; irrayo ha bukiizi bw'obulyo, ihayo abantu abanyakwikara Entapuha.

⁸Ensi eya Tapuha ekaba eri ya Manaase, baitu orubuga Tapuha orukaba ruli ha mutaano gwa Manaase, rukaba ruli rwa batabani ba Efuraimu.

⁹Okuruga aho, omutaano gwairrayo okuhika ha kasaaru Kana. Embuga ezikaba ziri omukiikaro eki, ha bukiizi obw'obulyo obw'akasaru, nobwakubaire zikaba ziri omunsi ya Manaase, zikaba ziri za batabani ba Efuraimu. Kandi omutaano gwa Manaase gweyongerayo ha bukiizi obw'emoso obw'akasaaru, gugarukira ha nyanja.

¹⁰Ensi eya ha bukiizi obw'obulyo ekaba eri ya Efuraimu, kandi egi eya ha bukiizi obw'emoso, ekaba eri ya Manaase, ensi zaabbu zaataanisibwaga enyanja. Aseri ekaba eri ha bukiizi obw'emoso obwa Bugwaizooba, Isakara ekaba eri ha bukiizi obw'emoso obwa Burugaizooba.

¹¹Kandi omunsi Isakara na Aseri, Manaase akaba ainamu ensi Besi-seyani n'ebyaro byayo, Ibuleyamu n'ebyaro byayo, n'ebyaro ebya Dora n'abantu baarwo, ebyaro bya Enidora n'abantu baamwo, ebyaro ebya Taanaki n'abantu baamwo, abantu aba Megido n'ebyaro byamwo; n'embuga ezigyehinguliriize.

¹²Baitu batabani ba Manaase, embuga ezi batasobole kuzitunga; Abakanaani bakangira omunsi egi baagiikaramu.

¹³Baitu abantu ba Isirairi obu baayeyongiire kuba b'amaani, baatandika kukoza Abanyakanaani emirimo nka abairu, baitu batababinge omunsi.

¹⁴Batabani ba Yosefu baayeterra enduuru nibagamba bati: “Kiki ekikutuhaisize omugabo gw'ensi erukwingana n'ey'abandi, kandi kunu MUKAMA akatuha omugisa twaba bantu baingi?”

¹⁵Yoswa yabagarukamu ati: “Obu muraaba muhinguraine obwingi ensi y'ensozi eya Efuraimu etarukubamara, iroko mugende omukibira eruguru oku nuho muteme, mwetungire omwanya omunsi ey'Abaperezi, n'Abarafaimu, ensi ey'ensozi ey'Efuraimu obweraaba etarukubamara.”

¹⁶Ab'oruganda rwa Yosefu baagamba bati: “Ensi ey'ensozi terukutumara. Abanyakanaani abarukwikara omukyeya, naabo aba Besi-seyani, naabo abomukihanga kya Yezereeri baine ebigaali ebyobulemu eby'ebyoma.”

¹⁷Nubwo Yoswa yagarukiremu abantu ab'oruganda rwa Yosefu, ati: “Muli bantu baingi muno kandi muli b'amaani; timurukwija kutunga ensi enu yonka,

¹⁸baitu ensi ey'ensozi nayo ebe yanyu, noobu eraaba eri y'ekibira, mukiteme muhikire kimu ha mitaano; ogurukukirra kimu kuba hara, habwokuba Abanyakanaani noobu baraaba baina ebigaali eby'ebyoma, kandi bali b'amaani, nimwija kubasingura.”