Read Runyoro - rutooro Yos 18 Bible Online

Yos 18 - Runyoro - rutooro bible

Yos 18

¹Hanyuma ekitebe kyona eky'abantu ba Isirairi kyayesorooleza Siiro, nuho baateera Eheema ey'okutangatanganiramu; ensi baagiikaramu eculiire.

²Omubantu ba Isirairi, hakaba hasigairemu enganda musanju ezikaba zitakahairwe bugwetwa bwazo.

³Nubwo Yoswa yakaguza abantu ba Isirairi ati: “Muligenda di kulya ensi MUKAMA Ruhanga owa baisenkuru inywe ei abahaire?”

⁴Mukome abasaija basatu omubuli ruganda, mbatume bagende barabanganemu ensi egi, bateere ekisisani ky'ensi ei barukwija kugweterwa, nukwo bagaruke nambere ndi.

⁵Ensi egi bagicwemu ebicweka musanju, Yuda aikale omunsi ye ha bukiizi obw'obulyo, kandi aba Yosefu baikale omu yabo ha bukiizi obw'emoso.

⁶Ebicweka ebi omusanju, mwoleke ensisana yabyo, mugindeetere hanu: mbaterre akaruuru hanu omumaiso ga MUKAMA Ruhanga waitu.

⁷Abaleevi tibaina mugabo omuli inywe, habwokuba omugabo gwabo, nukwo kuheereza nibakora omulimo ogw'obunyakatagara; Gaadi na Rubbeni n'ekicweka eky'oruganda rwa Manaase, bakamara ira kutunga omugabo gwabo, Musa omwiru wa MUKAMA ogu yabahaire obuseeri bwa Yorudaani ha bukiizi obwa Burugaizooba.

⁸Nubwo abasaija baimukya baagenda; Yoswa yabateererra muno ati: “Mugende mwetegereze ensi egi, muhandiike ensisana yayo mugindeetere, mbaterre akaruuru hanu Siiro omumaiso ga MUKAMA.”

⁹Nubwo abasaija baimukize baagenda, ensi baagyetegereza, baateera ekisisani kyayo nibooleka nkooku baagicwiremu ebicweka musanju; baahadiika n'amabara g'embuga; hanyuma baagaruka hali Yoswa omu rukande orwa Siiro.

¹⁰Yoswa yabaterra akaruuru omumaiso ga MUKAMA; ensi yagigabira Abaisirairi buli ruganda yaruha ekicweka kyarwo.

¹¹Oruganda orwa Benyamiini nurwo rwabandize kugabirwa ensi, nkooku ebika byabo bikaba biri. Ensi yabo niyo egi ey'ekaba eri hagati y'oruganda rwa Yuda n'orwa Yosefu.

¹²Ha bukiizi obw'emoso, omutaano gwabo gukarugirra ha kyambu Yorudaani gwahika habukiizi obw'emoso obwa Yeriko, gwayeyongerayo omunsi ey'ensozi ha bukiizi obwa Bugwaizooba, gwagarukira ha irungu erya Besi-aveni.

¹³Kandi gwayeyogerayo ha bukiizi obw'obulyo oroleriire Luzi (enyakwetwa Beseri), gwasirimuka okuhika Atarosi-adara ha rusozi orunyakuli harubaju orw'obulyo obwa Besi-horoni eya ifo.

¹⁴Okuruga aho gwagaruka harubaju orundi, gwatoma harubaju orwa bugwa izooba, ha bukiizi obw'obulyo okuruga ha rusozi orunyakuli ha bukiizi obw'obulyo, oroleriire Besi-horoni, gwagarukira Kiryasi-baali (ibara erindi eyetwa Kiryasi-yalimu) nurwo orubuga orw'oruganda rwa Yuda. Aho, omutaano ogwa Bugwaizooba nuho gwagarukiire.

¹⁵Omutaano ogwa ha mukono ogw'obulyo, gukarugiirra Kiryasi-yalimu; gwagarukira Efuroni ha kasaaru ka Nefutoha.

¹⁶Gwairrayo okuhika ha rusozi orunyakuroleriire ekihanga ekya mutabani wa Hinomu ekinyakuli ha bukiizi obw'emoso obw'ekihanga ekya Refaimu. Gusirimuka omukihanga ekya Hinomu ha bukiizi obw'obulyo obw'Abayebusi, gugendera kimu okuhika Eni-rogeri.

¹⁷Aho gwayekuba gwatoma ha bukiizi obw'emoso, gwairrayo okuhika Eni-semesi, gwairrayo okuhika Gerirosi enyakuroleriire amatemba ga Adumimu; gwairrayo okuhika ha ibaale erya Bohani mutabani wa Rubbeni.

¹⁸Gweyongera guhika ha bukiizi obw'emoso harubaju orwa Besi-araba, gusirimuka okuhika Araba;

¹⁹gwairrayo ha bukiizi obw'emoso obwa harubaju orwa Besi-hogura; gugarukira ha mukono ogw'Enyanja ey'Ekisura ha bukiizi obw'obulyo obwa Yorudaani; aho omutaano ogw'obukiizi obw'obulyo, nuho gwagarukiire.

²⁰Harubaju orwa Burugaizooba, ekyambu Yorudaani nugwo gwabaire mutaano. Obu nubwo obugwetwa obw'oruganda rwa Benyamiini, nkooku bakaba bali omu bika byabo okuruga ha mutaano ogumu okuhika ha gundi, okwehinguliriza.

²¹Embuga ez'oruganda orwa Benyamiini nkooku bakaba bali omu bika byabo nizo zinu: Yeriko, Besi-hogura, Emeki-kezizi,

²²Besi Araba, Zemaraimu, Beseri,

²³Avimu, Para, Ofura,

²⁴Kefarammoni, Ofuni na Geba, embuga ikumi na ibiri n'ebyaro byazo ikumi na bibiri.

²⁵Gibbyoni, Rama, Berosi,

²⁶Mizipe, Kefira, Moza,

²⁷Rekemu, Iruperi, Tarala,

²⁸Zera, Herefu, Yebusi (niyo Yerusaalemu) Gibeha, Kiryasi-yalimu, embuga ikumi na ina hamu n'ebyaro byazo. Obu nubwo obugwetwa obw'oruganda orwa Benyamiini, nkooku ebika byabo bikaba biri.