Read Runyoro - rutooro Yos 19 Bible Online

Yos 19 - Runyoro - rutooro bible

Yos 19

¹Oruganda orwakurasireho okuheebwa omugabo, nurwo orwa Simyoni nkooku bakaba bali omu bika byabo.

²Ensi ei baahairwe ekaba eri hagati y'ensi ey'oruganda rwa Yuda. Ensi egi ekaba erumu Beeri-seba, Seba, Morada

³Hazara-swali, Bara, Ezemu,

⁴Eritoradi, Besuli, Horuma,

⁵Zikuragi, Besi-makabosi, Hazara-susa,

⁶Besi-leboyosi, na Saruheni, embuga ikumi na isatu hamu n'ebyaro byazo.

⁷Hakabamu na zinu: Aini, Rimoni, Eseri, na Asani embuga ina hamu n'ebyaro byazo;

⁸hamu n'ebyaro byona ebinyakuheerraine n'embuga ezi okugarukira Baarasi-beere, Rama eya Negebbu. Egi niyo ensi eyahairwe oruganda rwa Simyoni nkooku bakaba bali omu bika byabo.

⁹Ensi eyahairwe Yuda, habwokuba ekaba eri ngazi muno, ekacwibwaho ekicweka kyaheebwa oruganda rwa Simyoni.

¹⁰Ensi eyakasatu eyagabirwe, niyo ey'oruganda orwa Zeburuni nkooku bakaba bali omu bika byabo. Ensi ei baahairwe, egarukira Salidi;

¹¹omutaano gwayo gukeeyongerayo ha bukiizi obwa Bugwaizooba, gwahikira kimu Malyeri gwakwataho Dabesesi n'akasaaru akanyakuli Buturukaizooba bwa Yokinehamu.

¹²Okuruga Salidi, gwaraba harubaju orundi ha bukiizi obwa Burugaizooba gwagenda ha mutaano ogwa Kisirosi-tabora;

¹³okuruga aho, gwayeyoongera ha Buturukaizooba, gwagarukira Gasi-hefere na Es-ikazini; obu gwahikire Rimoni, gwayeheta guroleriire Neeya.

¹⁴Ha mukono ogw'emoso, gwayekuba guroleriire Hanasoni, gwagarukira ha kihanga ekya Ifutaheri;

¹⁵Katasi, Naharali, Simuroni, Idara na Beterehemu embuga ikumi na ibiri n'ebyaro byazo ikumi na bibiri.

¹⁶Egi niyo ensi eyahairwe oruganda rwa Zeburuni, nkooku ebitabu byabo bikaba biri, embuga ikumi na ibiri n'ebyaro byazo ikumi na bibiri.

¹⁷Ensi eya kana eyagabirwe, niyo eyahairwe oruganda rwa Isaakara nkooku bali omu bika byabo.

¹⁸Omutaano gwayo gwihayo Yezereeri, Kisyoni, Sunemu,

¹⁹Hafara-imu, Siyoni, Anaharasi,

²⁰Rabbisi, Kisyoni, Ebezi,

²¹Remesi, Eniganimu, Eni-hada, Besi-pazezi;

²²kandi gukwataho Tabora, Sahazuma, Besi-semesi, gugarukira ha kyambu Yorudaani, embuga ikumi na mukaaga hamu n'ebyaro byazo.

²³Egi niyo ensi eyahairwe oruganda rwa Isakara nkooku bakaba bali omu bitabu byabo, embuga ezi hamu n'ebyaro byazo.

²⁴Ensi eya kataano eyagabirwe, niyo eyahairwe oruganda rwa Aseri nkooku bakaba bali omu bitabu byabo.

²⁵Ensi yabo ekaba erumu ensi zinu: Herukasi, Hali, Beteni, Akisaafu,

²⁶Aramereki, Amadi na Misali, harubaju orwa Bugwaizooba, yahikahoga Karameeri, Sihora-Libunasi,

²⁷ekubuutukira harubaju orwa Burugaizooba, egenda ehika Besidagoni, ekwataho Zeburuni na hakihanga ekya Ifutaheri ha bukiizi obw'emoso egarukira Besimeki na Neyeri. Eyeyongerayo ha bukiizi obw'emoso ehika Kaburu,

²⁸Eburoni, Rehobu, Hamoni, Kana, egarukira ha Sidoni enkooto.

²⁹Ekubutukira Rama, egarukira harubuga orugumire orwa Taya; eyeheta ehika Hosa, egarukira ha nyanja; ihayo Maharabu, Akizibu,

³⁰Uma, Afeki na Rehobu embuga amakumi abiri na ibiri n'ebyaro byazo.

³¹Egi niyo ensi eyahairwe oruganda rwa Aseri, nooku bakaba bali omu bika byabo, embuga ezi hamu n'ebyaro byazo.

³²Ensi eya mukaaga, niyo eyahairwe oruganda rwa Nafutaali, nkooku bakaba bali omu bika byabo.

³³Omutaano gwayo gukatandikira Herefu, ha muti omuhomozi ogunyakuli omunsi Zaananimu, Adami-nekebu, na Yabuneeri okuhika Lakumu; gugarukira ha kyambu Yorudaani.

³⁴Okuruga aho, gwatoma ha bukiizi obwa Bugwaizooba, gwahika Azinosi-tabora, gwayeyongerayo okuhika Hukoki, gwakwataho Zebuluni ha bukiizi obw'obulyo, na Aseri ha bukiizi obwa Bugwaizooba, na Yuda ha bukiizi obwa Burugaizooba ha kyambu Yorudaani.

³⁵Embuga ezaayombekerwe zaagumibwa nizo zinu: Zidimu, Zere, Hamasi, Rakasi, Kenerosi,

³⁶Adama, Rama, Hazora,

³⁷Kedesi, Edereyi, Eni-hazoora;

³⁸Yironi Migidati-eri, Holemu, Besi anasi na Besisemesi embuga ikumi na mwenda hamu n'ebyaro byazo.

³⁹Egi niyo ensi eyahairwe oruganda rwa Nafutaali, nkooku ebika byayo biri, embuga ezi n'ebyaro byazo.

⁴⁰Ensi eya musanju niyo eyahairwe oruganda rwa Daani nkooku bakaba bali omu bika byabo.

⁴¹Ensi yabo erumu ebicweka binu: Zora, Esitaholi, Ire-semesi,

⁴²Sarabimu, Aiyaroni, Isira,

⁴³Eroni, Timuna, Ekuroni,

⁴⁴Ereteke, Gibesoni, Baarasi

⁴⁵Yehudi, Beneberaki, Gasirimoni,

⁴⁶Meyarakoni na Rakoni, hamu n'ensi enyakuherraine na Yopa.

⁴⁷Batabani ba Daani obubalemerirwe kwikara omunsi yabo, bakaseesira ensi Resemu baagirwanisa. Obubaamazire kwita abantu b'omunsi egi, bagyetwarra, baagiikaramu, baagiihaho ibara Resemu, baagyeta Daani, niryo ibara erya isenkuru bo Daani.

⁴⁸Egi niyo ensi eyahairwe oruganda rwa Daani nkooku bakaba bali omu bika byabo. Embuga ezi hamu n'ebyaro byazo.

⁴⁹Abaana ba Isirairi obu baamazire kubagana ensi, buli ruganda ruhairwe eyarwo, Yoswa mutabani wa Nuuni, na uwe baamuha eye.

⁵⁰Nkooku MUKAMA yaragiire, baamuha orubuga oruyasabire, nurwo Timunati-sera orunyakuli omunsi ey'ensozi eya Efuraimu. Yarwombeka buhyaka nuho yaikara.

⁵¹Eryeza nyakatagara, Yoswa mutabani wa Nuuni n'abeebembezi ab'ebika eby'enganda ez'Abaisirairi, ensi ezi bakaigaba nibateera oburuuru beekaguze hali MUKAMA, ha mulyango gw'Eheema ey'okutangatanganiramu omu Siiro. Abaana ba Isirairi nukwo bamalirirre kubagana ensi bati.