Read Runyoro - rutooro Yos 2 Bible Online

Yos 2 - Runyoro - rutooro bible

Yos 2

¹Yoswa mutabani wa Nuuni, akatuma abasaija babiri omunsita, baaruga Sitimu, yabagamba ati: “Mugende mutate ensi, okukira muno orubuga Yeriko.” Baagenda baataaha omunju ya malaaya ibara lye Rahabbu, nuho baagonya.

²Abantu baagambira omukama wa Yeriko bati: “Kiro kinu abasaija abamu, Abaisirairi baizire hanu kutata ensi yaitu.”

³Nubwo omukama wa Yeriko yatumaho Rahabbu, naagamba ati: “Oleete abasaija abanyakwizire owawe kandi bataaha omunju yawe, habwokuba baizire kutata ensi yoona.”

⁴Baitu omukazi akaba atwaire abasaija abo ababiri, abaserekere, yagarukamu ati: “Mazima kwo abasaija baizirege owange; baitu timmanyire nambere barugire,

⁵baitu omu kairirizi, irembo ly'orubuga obulibaire nirigya kukingwa, baturukirege baagenda, nambere bagenzire timmanyireyo; mubahondere bwango, nimwija kubakwata.”

⁶Baitu akaba abatembeze hanju eruguru yabasereka omubiba by'obugoigo ebyakaba atembekeraniize kurungi.

⁷Habweki, abasaija abaatumirwe baabahondera omumuhanda ogw'ekyambu Yorudaani okuhikira kimu ha lyambukiro; abarukubahondera obubakaba baakaturuka, irembo lyakingwa.

⁸Abasaija entasi obubakaba batakabyamire, omukazi yaija nambere bakaba bali hanju eruguru.

⁹Yabagambira ati, “Mmanyire nkooku MUKAMA abahaire ensi, kandi itwe tubatiinire, abantu boona abarukwikara omunsi enu emitima ebahweriire.

¹⁰Habwokuba obumwarugaga Misiri, tukahurra nkooku MUKAMA yayomeze amaizi g'enyanja Ey'ebitoogo omumaiso ganyu, kandi tuhuliire ebi mwakozire Sihoni na Ogi abakama ababiri ab'Abamooli abakaba bali obuseeri bwa Yorudaani, abamwahwerekereriize kimu.

¹¹Ahonaaho obu twahuliire ebi, emitima yatuhwerra kandi buli omu amaani gaamuhwa habwokubatiina; habwokuba MUKAMA Ruhanga wanyu nuwe ogu anyakuli haiguru muno kandi anyakuli hansi okuzimu.

¹²Hati nu mundahire MUKAMA, nkooku mbakoliire eby'embabazi, na inywe nukwo mulikorra eka ya ise nyowe eby'embabazi; mumpe akarorwaho akarukuunanura,

¹³ngu mulijuna ise nyowe, nyina nyowe, banyanya nyowe na bagenzi bange, n'abantu baabu boona, mujune obwomeezi bwaitu okutafa”

¹⁴Abasaija bamugarukamu bati: “MUKAMA naakatwite! Kakuba otaatura ensita yaitu enu, MUKAMA obwalituha ensi enu, tulikukorra eby'embabazi kandi eby'obwesige.”

¹⁵Nubwo yabasirimwire noomuguha, yabarabya omwidirisa, habwokuba enju ye ekaba eyombekerwe hakisiika ky'orubuga omunda.

¹⁶Yabagambira ati: “Mwesereke omubusozi, abarukubahondera bataija kubasanga omumuhanda; mumale ebiro bisatu mweserekere; okuhikya abarukubahondera obubarakagaruka; hanyuma nubwo mugende.”

¹⁷Abasaija baamugambira bati: “Nitwija kuhikiriza ekyoturahiize.

¹⁸Kinu nikyo olikora obu tulihika omunsi enu, obohe akayondo kanu akarukutukura haidirisa, eriwatusirimuliireho, kandi Sso na nyoko, banyanyoko, n'abantu boona ab'enju ya Sso obasorooleze omunju yaawe.

¹⁹Obuhalibaho omuntu arukuruga omunju yaawe akagenda omuruguudo, omusango guliba gumusingire, itwe tituliba na musango. Baitu akabi kakuba kahikaho omuntu anyakuli na iwe omunju, guliba musango gwaitu.

²⁰Baitu kakuba ogambira abantu ekituleesire, naitwe titulisobora kuhikiriza Endagaano eyoturahiize.”

²¹Na uwe yagamba ati: “Kibe nkooku mugambire.” Yabaraga, nabo baagenda; omukazi yaboha omuyondo ogurukutukura omwidirisa.

²²Baayahukana, abasaija baagenda omubusozi, baikara oku okumara ebiro bisatu, okuhikya abaabahondiire bagarukire, habwokuba abahondiire bakaserra omumuhanda hoona tibaabazoora.

²³Hanyuma abasaija ababiri, baaruga ha busozi, baagaruka hali Yoswa mutabani wa Nuuni, baamugambira byona ebyababaireho.

²⁴Baamugambira bati: “Mazima kwo, ensi yoona MUKAMA agituhaire; ekindi, abantu boona abarukwiikara omunsi egi, nibatutiina muno.”