Read Runyoro - rutooro Yos 22 Bible Online

Yos 22 - Runyoro - rutooro bible

Yos 22

¹Yoswa akeeta ab'oruganda rwa Rubbeni, orwa Gaadi, n'ekicweka eky'oruganda rwa Manaase

²yabagambira ati: “Mukahikiriza byona, ebi Musa omuheereza wa MUKAMA yabaragiire; mwakora kyona ekinabaragiire.

³Ebiro binu byona, bagenzi banyu timukabahemukiraga, okuhikya na hati mukataho omutima okuhikiriza MUKAMA Ruhanga wanyu ekiyabaragiire.

⁴Hati, MUKAMA Ruhanga wanyu, ahaire bagenzi banyu Abaisirairi obusinge nkooku yabaraganiize; habweki, mwimuke mugaruke omumaka ganyu, omunsi ey'omugabo gwanyu, Musa omuhereza wa MUKAMA ei yabahaire obuseeri bwa Yorudaani.

⁵Muteho muno omutima okukwata ebiragiro n'ebigambo, Musa omuheereza wa MUKAMA ebiyabaragiire: nukwo okugonza MUKAMA Ruhanga wanyu, okukora byona ebi agonza, okukwata ebiragiro bye, okumugumiraho, n'okumuheereza n'omutima gwanyu gwona, n'obwomezi bwanyu bwoona.”

⁶Nubwo, Yoswa yabaha omugisa, yabaraga, baagaruka owaabu.

⁷Ekicweka ekimu eky'oruganda rwa Manaase, Musa akaba akihaire ensi enyakuli Basani; ekicweka ekindi, akakiha ensi enyakuheeriire bagenzi babu omunsi enyakuli Bugwaizooba bwa Yorudaani. Yoswa obuyamazire kubaraga bagaruke owaabu bo, abasabiire n'omugisa, yabagambira ati:

⁸“Mwagaruka owanyu mumazire kuguudahara, mwina amagana maingi muno, mwina efeeza, zaabbu, omulinga, ebyoma, n'engoye nyingi; ebimwanyagireho abanyanzigwa banyu, mubagane na bagenzi banyu.”

⁹Nubwo, ab'oruganda rwa Rubbeni, Gaadi n'ekicweka eky'oruganda rwa Manaase, baagaruka owaabu bo, baayahukana n'Abaisirairi omukiikaro Siiro ekinyakuli omu nsi Kanaani, bagenda omunsi eya Giryadi, ensi ey'omugabo gwabo, MUKAMA ei yaragiire Musa kubaha, ebe nsi yabo mali.

¹⁰Obubaahikire omukicweeka ekinyakuheeriire Yorudaani, enyakuli omunsi Kanaani, baayombekaho itambiro erikooto rurangaanwa.

¹¹Eki, Abaisirairi baakimanya, baagamba bati: “Ab'oruganda rwa Rubbeni, orwa Gaadi n'ekicweka eky'oruganda rwa Manaase bombekere itambiro ha mutaano ogw'ensi ya Kanaani, omukicweeka ekinyakuheeriire Yorudaani, harubaju orw'ensi yaitu.”

¹²Abaisirairi obubaahuliire eki, boona baayesorooleza Siiro, babarwanise.

¹³Nubwo, Abaisirairi baakwata Finehaasi mutabani wa Eryeza nyakatagara, baamutumaho ab'oruganda rwa Rubbeni, orwa Gaadi n'ekicweka eky'oruganda rwa Manaase abakaba bali omunsi Giryadi.

¹⁴Baamutuma hamu n'abalemi ikumi, buli omu hali bo, akomerwe omubuli ruganda orwa Isirairi.

¹⁵Baaseesira ab'oruganda rwa Rubbeni, orwa Gaadi n'ekicweka eky'oruganda rwa Manaase abakaba bali omunsi Giryadi. Baabagambira bati:

¹⁶“Ekitebe kya MUKAMA kyona nikikaguza kiti: ‘Mukozire ki kinu okugobeza Ruhanga owa Isirairi nimwanga kuhondera MUKAMA kiro kya hati, nimweyombekera itambiro erirukwoleka nkooku mumujemiire?

¹⁷Nimwijuka ekibi kyaitu eki twakozire tuli omukiikaro Peyora? Ekibi eki, ekyaleetiire ekitebe kya MUKAMA omuhito, kikyaturoho na hati hoona.

¹⁸Na hati nikyo murukwangira kumukuratira? Hati obu murayemera MUKAMA, ijo naija kubiihirirwa ekitebe kyona ekya Abaisirairi.

¹⁹Ensi yanyu obweraaba etali nungi, mugende omunsi ya MUKAMA nambere hali Eheema ye, nuho mwikale hamu na itwe, kyonka mutalirengaho mukamwemera, rundi na itwe kutufoora beemi nimwombeka itambiro erindi eritali lya MUKAMA Ruhanga waitu.

²⁰Mwijuke Akani mutabani wa Zera nkooku yacwire ekiragiro ekyatairweho habw'ebintu ebisemeriire kuhwerekerezibwa: ekitebe kyona ekya Isirairi nkooku twafubiirwe habw'ekigambo eki? Mutagira Akani wenka nuwe yafubiirwe habw'ekibi kye eki.’ ”

²¹Nubwo abaana ba Rubbeni naaba Gaadi, n'ekicweka eky'oruganda rwa Manaase, baagarukamu bakuru b'ebika bya Isirairi bati

²²“Ow'obusobozi ali omu, nuwe MUKAMA Ruhanga! Amanyire! Kandi Isirairi nayo esemeriire kumumanya! Obu tuliba twayemere titwaba beesigwa hali MUKAMA, mutwite hati.

²³Obutuliba twayangire kuhurra MUKAMA, twayeyombekera itambiro okwokezaaho ebyonzira rundi ebihongwa eby'ebyokulya rundi eby'okuteerana hamu, MUKAMA wonyini atufubire.

²⁴Ekyatukoleze eki, tukateekereza tuti omu biro eby'omumaiso, abaijukuru banyu balikaguza abantu bati: ‘MUKAMA Ruhanga owa Isirairi mumwinaho bukwatane ki?

²⁵Yorudaani, niyo yafoire mutaano ogurukwahukaniza itwe hali inywe abantu ba Rubbeni n'aba Gaadi, inywe timwina mugabo MUKAMA oguyabahaire.’ Nubwo, abaana banyu, balirekesa abaitu kuramya MUKAMA.

²⁶Nukwo kucwamu tuti: ‘Ka tweyombekere itambiro, tiriri ly'okwokezaaho ebihongwa rundi ebyonzira,

²⁷baitu bwakaiso hali itwe na hali inywe, na ha bantu ab'obusinge obuliija itwe tutakyaroho, nkooku turamyakwo MUKAMA omumaiso ag'Eheema ye erukwera, nituhonga ebihongwa eby'okwokya n'ebyonzira, n'ebihongwa eby'okuteerana hamu. Ekyatukoleze eki, nukwo kutanga abaijukuru banyu kugamba ngu: “abantu tibanyina mugabo MUKAMA oguyabahaire.”’

²⁸Tukateekereza tuti: Obuhalibaho arukutugamba ekigambo eki rundi kukigamba abaijukuru baitu omu biro eby'omumaiso, baligamba bati: ‘Murole, ba isenkuru itwe bakombeka itambiro erirukusisanira kimu itambiro lya MUKAMA. Itambiro eri, litabe ly'okwokezaaho ebihongwa eby'okwokya rundi ebyonzira, baitu libe bwakaiso obw'abantu baitu n'abanyu.’

²⁹Nikikafuuhe, itwe okwemera MUKAMA n'okuleka kumukuraatira, nitwombeka itambiro ery'okwokezaaho ebihongwa eby'okwokya, rundi ebyonzira, eritali itambiro lya MUKAMA Ruhanga waitu erinyakwemeriire omumaiso ag'Eheema ye.”

³⁰Finehaasi nyakatagara n'abeebembezi b'ekitebe, abakuru ab'ebitabu eby'enganda ez'Abaisirairi abakaba bali hamu na uwe, baahurra ebigambo abantu ba Rubbeni, aba Gaadi n'aba Manaase ebi baagambire, babisiima muno.

³¹Finehaasi mutabani wa Eryeza nyakatagara yagambira abantu ba Rubbeni, aba Gaadi naaba Manaase ati: “Kiro kinu twamanya MUKAMA nkooku ali na itwe, habwokuba mutamugobeze; nikyo mwajuniire Isirairi ekifubiro kye.”

³²Nubwo Finehaasi n'abeebembezi, baaleka abantu ba Rubbeni naaba Gaadi omunsi Giryadi, baagaruka Kanaani omu Baisirairi babasoborra

³³ebigambo Finehaasi n'abeebembezi ebibaagambiire Abaisirairi, Abaisirairi bakabisiima, nukwo kuhaisaniza MUKAMA, tibaagaruka kubaza ha bulemu obw'okuhwerekereza ensi y'abantu ba Rubbeni naaba Gaadi ei bakaba barumu.

³⁴Itambiro eri, baaliruka ibara “Bwakaiso.” Habwokuba bakagamba bati: “Itambiro linu, niritunanura nkooku MUKAMA ali Ruhanga.”