Read Runyoro - rutooro Yos 23 Bible Online

Yos 23 - Runyoro - rutooro bible

Yos 23

¹Obu haahingwireho omwanya mukooto, MUKAMA yahuumuza Abaisirairi, yabajuna abanyanzigwa baabu abakaba babeehinguliriize. Baitu Yoswa akaba akuzire muno,

²nukwo kweeta Abaisirairi boona, bakuru baabu n'abeebembezi, abacwi b'Emisango n'abalemi. Yabagambira ati: “Hati, nimurora nkooku nkuzire muno.

³Murozire byona MUKAMA Ruhanga wanyu akozire amahanga ganu goona habwanyu, habwokuba, nuwe yabarwaniriire.

⁴Enganda zanyu, nzihaire ensi ez'amahanga ago aganyakusigaireho, hamu n'ezi ez'amahanga aganasingwiire, zibe nsi zanyu, okurugirra ha kisaaru Yorudaani okugarukira ha Nyanja Enkooto enyakuli Bugwaizooba.

⁵MUKAMA Ruhanga wanyu naija kubairiza kubabinga mutakahikire omunsi yabo, nukwo inywe mutwaale ensi haiguru, nkooku yabaraganiize.

⁶Habweki, mumalirirre kimu okukwata n'okukora byona ebyahandiikirwe omukitabu kya Musa eky'ebiragiro, mutarukukora ekimurukwegondeza.

⁷Nukwo muleke kwetaba n'abantu ab'amahanga ganu aganyakusigaire na inywe, rundi kubazaaho amabara ag'embandwa zaabo rundi kubarahira, rundi kubaheereza, rundi kubaramya.

⁸Baitu mugumire hali MUKAMA Ruhanga wanyu nkooku mutaaha nimukora okuhikya na hati.

⁹MUKAMA nuwe yabingire amahanga amakooto kandi ag'amaani omunsi, inywe mutakagitaahiremu, busaho noomu ayasoboire kuberengeerra okuhikya na hati.

¹⁰Omuntu omu omuli inywe, asobora kubinga abantu rukumi, habwokuba MUKAMA Ruhanga wanyu nuwe arukubarwanirra nkooku yabaraganiize.

¹¹Habweki, muteho muno omutima, kumugonza.

¹²Baitu kakuba mugaruka enyuma mukateerana n'abantu ab'amahanga ganu aga musigaire nago, mukaswerrana, mukabasweraamu abakazi nabo bakabasweramu abandi,

¹³mumanyire kimu, MUKAMA Ruhanga wanyu nkooku atalyongera kubabingira abantu abo, balibafookera buhya, balibafookera mutego ogw'okubakwata, balibafookera kibbooko ez'okubateera, balibafookera mahwa ag'okubacumita amaiso, okuhikya obu mulikahwerekerra, mukahwera kimu omunsi enungi MUKAMA Ruhanga wanyu ei yabahaire.

¹⁴“Hati, ndi haihi n'okufa, nkooku abantu boona bafa. Inywena omumitima yanyu noomu biteekerezo byanyu, nimumanyira kimu kurungi, ha bintu byona ebirungi MUKAMA Ruhanga wanyu ebi yanihiize, busaho na kimu ekyabuzireho.

¹⁵Nkooku MUKAMA Ruhanga wanyu yahikiriize ebintu ebirungi byona ebiyabaraganiize, nukwo asobora kubaleetera ebintu ebibi okuhikya abahwerekeriize akabamara omunsi enu enungi ei yabahaire.

¹⁶Kakuba mucwa Endagaano ye ei yabaragiire kukwata, mukaramya embandwa, obwalibabiihirirwa muno, ensi enungi enu ei yabahaire, muligiihwaamu bwango.”