Read Runyoro - rutooro Yos 24 Bible Online

Yos 24 - Runyoro - rutooro bible

Yos 24

¹Nubwo Yoswa yasorooza enganda z'Abaisirairi zoona, omukiikaro Sekemu, yayeta abakuru, abeebembezi, abacwi b'emisango, n'abanyoro ba Isirairi; baija baayemerra omumaiso ga Ruhanga.

²Yoswa yagambira abantu boona ati: “MUKAMA Ruhanga owa Isirairi, naagamba ati: ‘Ira baisenkuru inywe, baikaraga obuseeri bw'ekyambu Efuraate, omu hali abo, nuwe Tera ise Abburahamu na Nahora; bakaheereza embandwa.

³Nubwo naihire isenkuru inywe Abburahamu nseeri y'ekyambu eki, namurabya omunsi Kanaani yoona, nakanyisa oruzaaro rwe. Nkamuha Isaaka;

⁴kandi Isaaka, namuha Yakobbo na Esau, Esau nkamuha ensi ey'ensozi eya Seyiri ebe ye habwe, baitu Yakobbo n'abaana be, bakagenda omunsi Misiri.

⁵Obuhaahingwireho akasumi, natumayo Musa na Arooni, nabonesa ensi Misiri emihito, n'ebintu ebinagikoliiremu; hanyuma, inywe nabaihayo.

⁶Naihayo na baisenkuru inywe, mwaija mwahika ha nyanja; Abanyamisiri abakaba batembere ebigaali n'embaraasi, baahondera baisenkuru inywe, baabasanga ha Nyanja Eyebitoogo.

⁷Baisenkuru inywe obu baateeriire MUKAMA enduuru, akaleeta omwirima hagati yanyu n'Abanyamisiri. Yabuutikira Abamisiri abo enyanja yabamira. Kandi mukarora ebinakozire ensi Misiri; mukamara omwirungu omwanya mukooto.

⁸Hanyuma nabaleeta omunsi ey'Abamooli abakaba bali Burugaizooba bwa Yorudaani; baabarwanisa, baitu nkababasinguza nabahwerekereza, ensi yabo mwagitwara.

⁹Hanyuma, Baraki mutabani wa Zipora omukama wa Mowabo, akaimuka yarwanisa Isirairi; yatuma abantu beete Balaamu mutabani wa Beyora abakyeene.

¹⁰Baitu ntahulirize Balaamu habweki, omukiikaro eky'okubakyeena, akabasabira omugisa; nukwo namubajunire nti.

¹¹Mukambuka ekyambu Yorudaani mwahika Yeriko, abantu aba Yeriko baabarwanisa, kandi mwarwanisibwa Abamooli, Abaperezi, Abanyakanaani, Abahiiti, Abagirigasi, Abahiivi, n'Abayebusi; abo boona nkababasinguza.

¹²Obumukaba mutakagenzire nkatuma enwa nabinga abakama ababiri ab'Abamooli nabaiha omubiikaro byabo inywe mutakahikireyo, mutababingise empirima rundi obuta bwanyu.

¹³Nkabaha ensi ei mutarakoliire n'embuga ezi mutarayombekere, hati nizo murumu, nimulya ebijuma eby'emizabbibbu n'ebya oliva ei mutarabyaire.’

¹⁴“Aho, nuho musigikire okutiina Ruhanga n'okumuheereza omu mananu noomu bwesige; mufuuhye embandwa ba isenkuru inywe ezi baaramyaga obuseeri bwa Efuraate n'omunsi Misiri, MUKAMA nuwe muheereze.

¹⁵Obu muraaba mutarukwenda kuheereza MUKAMA, kiro kya hati, mwekomere ou muraaheereza, rundi embandwa baisenkuru inywe ezabaaheerezaaga obuseeri bwa Efuraate, rundi ab'Abamooli ab'ensi ei murumu; baitu nyowe neeka yange turaaheerezaaga MUKAMA.”

¹⁶Nubwo abantu baagarukamu bati: “Nikikafuuhe, itwe okurugaho MUKAMA tukaramya abacweezi (baaruhanga abandi);

¹⁷habwokuba, MUKAMA Ruhanga waitu, nuwe yatwihire omunsi Misiri omubwiru obutukaba turumu hamu n'abaisenkuruitwe. Nuwe yakozire ebyamahano omumaiso gaitu, nuwe yatulindaga hoona ha twagendaga; noomu mahanga goona aga twarabamuga.

¹⁸MUKAMA ogu, yabingaga abantu ab'amahanga tutakagahikiremu; nk'Abamooli abakaba bali omunsi enu; habweki, naitwe MUKAMA ogu, nuwe turaheerezaaga, habwokuba nuwe Ruhanga waitu.”

¹⁹Baitu Yoswa yagambira abantu ati: “Timusobora kuheereza MUKAMA, habwokuba, nuwe Ruhanga Arukwera, nuwe Ruhanga ow'ihali, tarukwija kugumiisiriza ensobi zanyu n'ebibi byanyu.

²⁰Kakuba mumurugaho mukaheereza embandwa, alibakora akabi abahwerekereze, kandi kunu akabanza kubakorra ebirungi.”

²¹Abantu baagarukamu Yoswa bati: “Nangwa, MUKAMA nuwe turukwija kuheereza.”

²²Nubwo Yoswa yabagambira ati: “Inywe inywenka, niinywe baakaiso abarukugumya nkooku Mukama nuwe mwekomiire kuheereza.” Nabo bamugarukamu bati, “Ego, tuli baakaiso.”

²³Yabagambira ati: “Mufuuhye embandwa ezamahanga agandi eziri omuli inywe, omutima gwanyu mugumarre hali MUKAMA Ruhanga owa Isirairi.”

²⁴Abantu baagamba Yoswa bati: “MUKAMA Ruhanga waitu nuwe turukwija kuheereza, turaakwataga ebiragiro bye.”

²⁵Nubwo Yoswa, abantu abo yakora nabo endagaano, yabaha ebiragiro kandi yabagambira ebigambo bali omukiikaro Sekemu.

²⁶Ebigambo ebi, Yoswa yabihandiika omukitabu eky'ebiragiro bya Ruhanga; yakwata ibaale erikooto, yalita hansi y'omuti omuhomozi ogukaba guli omukiikaro kya Ruhanga ekirukwera.

²⁷Yoswa yagambira abantu boona ati: “Muboine ibaale linu muliboine liraabaga bwakaiso obw'okuturumiriza; habwokuba lihuliire ebigambo byona MUKAMA ebi atugambiire; nikyo liribeera bwakaiso obw'okubarumiriza, mutaliikara kugobeza Ruhanga wanyu.”

²⁸Nubwo Yoswa yaraga abantu, buli omu yagarukayo owaabu.

²⁹Ebi obubyahoire, Yoswa mutabani wa Nuuni omuheereza wa MUKAMA yafa, ahikize emyaka kikumi n'ikumi ey'obukuru.

³⁰Baamuziika omwitaka lye omukiikaro Timunasi-seera, ekinyakuli omunsi ey'ensozi ey'Efuraimu, ha bukiizi obw'emoso obw'orusozi Gaasi.

³¹Omu kasumi koona aka Yoswa, naha bw'akabakuru abaayomiire kumukira, kandi abakaba bamanyire byona MUKAMA ebiyakoliire Isirairi, Abaisirairi bakaheereza Mukama.

³²Amagufa ga Yosefu Abaisirairi aga baihire Misiri bakagaziika Sekemu omwitaka Yakobbo eri yaguzireho Hamora ise Sekemu; eriyaheeriire ebicweeka kikumi by'efeeza; lyafookera kimu itaka ly'abaijukuru ba Yosefu.

³³Hanyuma, Eryeza mutabani wa Arooni, na uwe yafa, baamuziika omu Gibeha, orubuga orwa mutabani we Finehaasi, orubakaba bamuhaire omunsi ey'ensozi ey'Efuraimu.