Read Runyoro - rutooro Yos 3 Bible Online

Yos 3 - Runyoro - rutooro bible

Yos 3

¹Ekiro ekyakurasireho, Yoswa yaimuka n'abantu be boona Abaisirairi kuruga Sitimu, baahika ha kisaaru Yorudaani, baaraaraho batakambukire.

²Hanyuma y'ebiro bisatu, abalemi baaraba omurukande,

³baaragira abantu bati: “Obumuraarora banyakatagara Abaleevi nibatandika kuhimba Esanduuko ey'Endagaano, nainywe mugihondere,

⁴nukwo mumanye omuhanda ogumuraatoma, habwokuba omuhanda gunu, timukagurabamuga. Baitu mulekeho omwanya hagati yanyu nayo, omwanya nk'ogwa kilomita emu; mutagirra haihi.”

⁵Yoswa yagambira abantu ati: “Mweyeze, habwokuba nyenkya, MUKAMA naija kukora eby'amahano omuli inywe.”

⁶Yagambira banyakatagara ati: “Muhimbe Esanduuko ey'Endagaano murabeho mwebembere abantu.” Baahimba Esanduuko ey'endagaano baagenda beebembiire abantu.

⁷MUKAMA yagamba Yoswa ati: “Kiro kinu ninyija kukunyumiza omumaiso ga Isirairi yoona, nukwo bamanye ngu, nkooku nkaba ndi na Musa, nukwo ndaabaga na iwe.

⁸Kandi oragire banyakatagara abanyakuhimba Esanduuko y'Endagaano oti: ‘Obu muraahika harubaju rw'ekyambu Yorudaani, mwemerre omukyambu mutarukwetengeesa’ ”

⁹Kandi Yoswa yagambira abantu ba Isirairi ati: “Mwije hanu muhurre ebigambo bya MUKAMA Ruhanga wanyu.”

¹⁰Kandi ati: “Hanu nuho muraamanyira, Ruhanga atafa nkooku ali hagati omuli inywe kandi nkooku arukwija kubinga Abakanaani, Abahiiti, Abahiivi, Abaperezi, Abagirigaasi, Abamooni n'Abayebusi baruge omunsi yabo, inywe mutakahikiremu.

¹¹Murole Esanduuko ey'Endagaano ya MUKAMA ow'ensi yoona eraabarabaho ebeebembere, kutaaha omukyambu Yorudaani.

¹²Habweki hati mukome abasaija ikumi na babiri kuruga omu nganda za Isirairi, omusaija omu omu buli ruganda.

¹³Kandi banyakatagara abanyakuhimbire Esanduuko ya MUKAMA, MUKAMA ow'ensi yoona, obu baraarubata omumaizi ga Yorudaani, amaizi g'ekyambu garaayemerra galeke kugera, kandi amaizi agarukuruga eruguru garayetuuma entuumo.”

¹⁴Abantu obu baimukize kuruga omu heema zaabbu, baambuke Yorudaani hamu nabanyakatagara abahimbire Esanduuko y'Endagaano beebembiire abantu,

¹⁵abo abahimbire Esanduuko obubaahikire Yorudaani kandi obubaarubasire omukyambu; kandi obusuumi bwona obwigesa Yorudaani kyaboogaga kisandaara emiisa yakyo yoona,

¹⁶amaizi agasirimukaga gakeemerra gaimuka hansi hakiikaro Adamu orubuga orunyakuheriire Zalesaani, kandi agakaba nigagera kutaaha omunyanja Araba, niyo enyanja ey'ekisura, gaacwerwaho kimu, abantu baayambuka baroleriire Yeriko.

¹⁷Abaisirairi boona obu bakaba nibakyayambuka, nibarubata ha itaka eryomere, banyakatagara abaahimbire Esanduuko ey'Endagaano baikara beemeriire haitaka eryomere okuhikya ihanga lyona limazire kwambuka Yorudaani.