Read Runyoro - rutooro Yos 4 Bible Online

Yos 4 - Runyoro - rutooro bible

Yos 4

¹Abantu boona obu baamazire kwambuka Yorudaani, MUKAMA yagambira Yoswa ati:

²“Omukitebe ky'abantu eki, oihemu abasaija ikumi na babiri, omu buli ruganda oihemu omusaija omu,

³obaragire oti: ‘Mwihe amabaale ikumi n'abiri, mwihe omukyambu Yorudaani, mugaihe omukiikaro kyonyini nambere banyakatagara baayemeriire mugatwale mugate omukiikaro eki muraagonyamu kiro kya hati.’ ”

⁴Nubwo Yoswa yayeta abasaija ikumi na babiri kuruga omu nganda za Isirairi,

⁵yabagambira ati: “Mugende mwebembere Esanduuko ey'Endagaano eya MUKAMA Ruhanga wanyu, mugwerre mu kyambu Yorudaani, buli omu agende ataire ibaale haibega, amabaale agarukwingana omuhendo gw'enganda z'abantu ba Isirairi.

⁶Amabaale ago nugo kijukyo kyanyu, omu biro eby'omumaiso, abaana banyu obu balibakaguza bati: ‘Amabaale ago, hali inywe, gaina makuru ki?’

⁷Mulibagarukamu muti: Esanduuko ey'Endagaano ya MUKAMA obwekaba neeyambuka Yorudaani amaizi aga Yorudaani gakeebaganizaamu omumaiso gaayo. Habweki amabaale ganu, abantu ba Isirairi nugo baraijukirwahoga ebiro byoona.”

⁸Abantu ba Isirairi baakora nkooku Yoswa yabaragiire, baiha amabaale omukyambu Yorudaani nk'omuhendo gw'enganda zaabbu okuziri, nkooku MUKAMA yaragiire Yoswa. Bageetweeka kugatwara omukiikaro baagonyeremu bagatuura aho.

⁹Na Yoswa yabyaara amabaale omukiikaro kyonyini baanyakatagara abaahimbaga Esanduuko ey'Endagaano ekibaayemeriiremu; okuhikya na hati gakyaliyo.

¹⁰Nubwo baanyakatagara abaahimbaga Esanduuko ey'Endagaano, bakeemerra omukyambu Yorudaani okuhikya byona MUKAMA ebiyaragiire Yoswa kugambira abantu ba Isirairi obubyahoire, nkooku Musa akaba aragiire Yoswa. Abantu baayambuka bwango Yorudaani;

¹¹obu baamazire kwambuka, Esanduko ya MUKAMA hamu na baanyakatagara nubwo barabireho bayebembera abantu.

¹²Abaana aba Rubbeni n'aba Gaadi n'ekicweka eky'oruganda rwa Manaase, baayebeembera abantu ba Isirairi bajwaire eby'okurwanisa, nkooku Musa yabaragiire.

¹³Abantu emitwaro ena abakaba beeteekaniize kurwana, baaraba omumaiso ga MUKAMA, baagenda ha bulemu, omukyeeya ekya Yeriko.

¹⁴Ha kiro eki, MUKAMA yanyumiza Yoswa omumaiso g'Abaisirairi boona; okuruga obu baatandika kumutiina nkooku baatiinaga Musa obwomeezi bwabo.

¹⁵MUKAMA akagambira Yoswa ati:

¹⁶“Ragira baanyakatagara abanyakwetwekere Esanduuko ey'Endagaano, baruge Yorudaani baije hanu.”

¹⁷Yoswa nukwo kubaragira ati: “Murugeyo.”

¹⁸Baanyakatagara abakaba bahimbire Esanduuko ey'Endagaano ya Mukama obubaarugire Yorudaani, beemeriire ha bwerre, amaizi aga Yorudaani gaagaruka omukiikaro kyago, gaasandaara, gaabooga, gaamira emyegeego yakyo yoona nka kara.

¹⁹Ha kiro ekya ikumi eky'okwezi okw'okubanza, nubwo abantu baasaabukire Yorudaani, baateera orukande Girigaali, ha mutaano gwa Yeriko.

²⁰Amabaale ikumi n'abiri aga baihire Yorudaani, aho nuho Yoswa yagasimbire.

²¹Yagambira Abaisirairi ati: “Omu biro eby'omumaiso, abaana banyu obubalibakaguza bati: ‘Amabaale ago ganyina makuru ki?’

²²Mulibamanyisa muti: ‘Abaisirairi bakambuka ekyambu kinu nibarubata haitaka eryoomere.’

²³Habwokuba MUKAMA Ruhanga wanyu, akabomeza ekyambu Yorudaani okuhikya inywena obumwamazire kwambuka nkooku yakozire Enyanja Ey'ebitoogo; Enyanja ei yatwomiize okuhikya itwena obutwayambukire,

²⁴nukwo abantu boona ab'omunsi bamanye MUKAMA nkooku ali w'obusobozi, na inywena nukwo mutiinege MUKAMA Ruhanga wanyu; kandi mumutiinege ebiro byoona.”