Read Runyoro - rutooro Yos 5 Bible Online

Yos 5 - Runyoro - rutooro bible

Yos 5

¹Abakama boona ab'Abamooli abakaba bali obuseeri bwa Yorudaani ha bukiizi bwa Bugwaizooba, abaana boona aba Kanaani abakaba bali haihi n'enyanja, obu baahuliire MUKAMA nkooku yayomeze amaizi aga Yorudaani habw'abantu ba Isirairi okuhikya boona obubaayambukire, obubaaboine Abaisirairi abo nibairra haihi, amaani gaabahwa.

²Kandi MUKAMA akagambira Yoswa ati: “Oheese emihyo ey'amabaale, osale abantu ba Isirairi obwakabiri.”

³Yoswa yaheesa emihyo ey'amabaale, yasara abantu ba Isirairi omukiikaro Gibeyasi-hararosi.[1]

⁴Yoswa akasara abasaija ba Isirairi habwokuba abo boona abarugire Misiri basazirwe, n'abasaija boona abaarwanaga obulemu, bakaba bafeeriire omumuhanda bali omwirungu, bamazire kuruga omunsi Misiri.

⁵Abantu boona abaarugireyo bakaba basazirwe, baitu abantu boona abazaalirwe omumuhanda bamazire kuruga omunsi Misiri, bakaba batasazirwe.

⁶Abantu ba Isirairi bakamara omwirungu emyaka amakumi ana okuhikya abasaija boona abaarugire Misiri, abaarwanaga obulemu obubaahwerekeriire, habwokuba batahurre MUKAMA yagambire. MUKAMA akaba abarahiriire ati: “Tindibaikiriza kurora ensi ei naraganiize baisenkuru inywe okugibaha, ensi enungi nka amata n'obwoki.”

⁷Habweki, abaana baabu nubo yagarwire omukiikaro kyabo, abo nubo Yoswa yasazire, habwokuba bakaba batakasarwaga; batasobole kusalirwa omumuhanda.

⁸Abantu boona obu baamazire kusarwa, baikara omurukande omubiikaro byabo, okuhikya obu baakizire.

⁹Nubwo MUKAMA yagambiire Yoswa ati: “Ekiro kya hati, mbaihireho ekijumo eky'Abamisiri.” Ekiikaro eki, nukwo kurukwa ibara [2]

¹⁰Abantu ba Isirairi obubakaba bakyali omu rukande omukiikaro Girigaali, omubyeya ebya Yeriko ha kiro ekya ikumi na bbina eky'okwezi omurwiririzi, baasemezaaga ekiro ekyokwijuka okuhingurwaho.

¹¹Ekiro ekyokwijuka okuhingurwaho obukyamaraga kuhwa, ekiro ekyakuratahoga baalyaga ebyokulya eby'omunsi egi, emigaati etatumbisiibwe, n'enjuma z'engano ekarangire.

¹²Obubaaliire ebyokulya eby'ensi egi, maanu yalekera aho kugwa; abantu ba Isirairi tibaagaruka kugwerwa maanu. Omwaka ogu gwona, baagumara nibalya ebyokulya eby'omunsi Kanaani.

¹³Yoswa obwakaba ali haihi na Yeriko, ahonaaho, yarora omusaija akwasire ekitara amwemeriire omumaiso; yamwirra haihi yamukaguza ati: “Iwe, oli waitu nandiki oli w'abanyanzigwa baitu?”

¹⁴Omusaija yagarukamu ati: “Nangwa, nyowe ndi hanu nk'engabwa ey'ihe rya MUKAMA, nikyo kindeesire hanu.” Yoswa yajuumara ha itaka yamuramya naagamba ati: “MUKAMA wange, nyowe omwiru wawe nondagira ki?”

¹⁵Mukuru w'ihe rya MUKAMA yagarukamu Yoswa ati: “Juura enkaito zaawe; habwokuba ekiikaro kinu ekyoyemeriireho, kiikaro ekirukwera.” Yoswa nukwo yakozire.