Read Runyoro - rutooro Yos 6 Bible Online

Yos 6 - Runyoro - rutooro bible

Yos 6

¹Omu kasumi ako, Yeriko yoona ekakingirwa kimu, haleke kubaho Omwisirairi noomu arukuturuka rundi arukutaaha.

²MUKAMA akagambira Yoswa ati: “Dora nakuha Yeriko n'abantu baayo ab'obusobozi mbakuhaire obasingule.

³Iwe n'abaserikale baawe mwehingulirize orubuga omurundi gumu. Mukole muti kumara ebiro mukaaga.

⁴Baanyakatagara musanju bakwate engwara musanju ez'amahembe ag'empaya z'entaama, bagende omumaiso ag'Esanduuko y'Endagaano; ha kiro ekya musanju mwehingulirize orubuga emirundi musanju, baanyakatagara nibateera engwara.

⁵Obubaliteera muno engwaara y'ihembe ery'empaya y'entaama, obumulihurra engwara muti, abantu boona batokere hamu; nubwo ekisiika eky'orubuga kyona kigwere kimu hansi, abaserikale n'abantu boona batahe omu rubuga barunyage.”

⁶Nubwo Yoswa mutabani wa Nuuni, yayeta banyakatagara yabagambira ati: “Muhimbe Esanduuko ey'Endagaano, baanyakatagara musanju, bakwate engwara musanju ez'amahembe ag'empaya z'entama, beebembere Esanduuko ey'Endagaano ya MUKAMA.”

⁷Yagambira abantu ati: “Mugende omumaiso mwehingulirize orubuga, abantu abanyakujwaire eby'okurwanisa, nubo beebembere Esanduuko ey'Endagaano ya MUKAMA.”

⁸Baanyakatagara musanju abakaba banyina engwara musanju omumaiso ga MUKAMA, baayebeembera nibazitera, bahondiirwe Esanduuko y'Endagaano ya MUKAMA, Yoswa nkooku yaragiire.

⁹Abasaija abakaba bajwaire ebyokurwanisa, baayebeembera baanyakatagara abaateeraga engwara. Orukarra rw'abantu orurukumalirra, rwaija rukuratiire Esanduuko, engwara niigamba obutalekerra.

¹⁰Baitu Yoswa yaragira abantu ati: “Mutatoka, muculeere, mutabaza kagambo na kamu, okuhikya obundibaikiriza; obu nubwo mulitoka.”

¹¹Nubwo yaragira abantu abahimbire Esanduuko y'Endagaano ya MUKAMA beehingulirize orubuga omurundi gumu; baagaruka, baataaha omu rukande ekiro eki nuho baaraara.

¹²Kandi Yoswa akazinduka nyenkya kara, baanyakatagara baahimba Esanduuko y'Endagaano ya MUKAMA.

¹³Baanyakatagara omusanju abakaba baina engwara musanju nibaziteera obutalekerra; abantu abanyakujwaire eby'okurwanisa baabeebembera, orukarra rw'abantu orurukumalirra rwakwata Esanduuko y'Endagaano ya MUKAMA, engwara niigamba obutalekerra.

¹⁴Ha kiro ekyakabiri bayehinguliriza omurundi gumu, bagaruka omurukande. Bakakora bati okumara ebiro mukaaga.

¹⁵Ha kiro ekya musanju, bakaimuka kara ha mamba nesara, baayehinguliriza orubuga emirundi musanju nkooku baakozire okubanza. Ekiro eki kyonka nubwo baayehinguliriize orubuga emirundi musanju.

¹⁶Ha murundi ogwa musanju, baanyakatagara obubaamazire kuteera engwara, Yoswa yaragira abantu ati: “Mutoke! Habwokuba orubuga runu, MUKAMA arubahaire.

¹⁷Orubuga na byona ebinyakururumu, biheebwe MUKAMA, bibe kihongwa kye, malaaya Rahabbu wenka, na boona abanyakuli hamu na uwe omunju ye, nubo baraakira, habwokuba akasereka abakwenda aba twatumire.

¹⁸Baitu mutatwara ha bintu ebinyakuhairweyo ebirukwija kuhwerekerezibwa; obumuraamara kubihayo, kandi hanyuma mukaihayo ebimu, nimwija kuhwerekereza orukande orw'abantu ba Isirairi, muruleetere akabi.

¹⁹Efeeza yoona, zaabbu, ebikwato eby'omulinga n'eby'ekyoma, bintu birukwera bya MUKAMA; bitwarwe omulyahurro lye.”

²⁰Abantu nukwo kutoka, engwara zaagamba. Ahonaaho, abantu obubaahuliire engwara niigamba, baatoka muno, ekisiika kyona kyagwera kimu hansi, abantu baataaha omurubuga, buli omu naraba haakaba ali, baarukwata.

²¹Ebintu byona eby'omurubuga baabihwerekereza; baita abasaija n'abakazi, abantu abato n'abakuru, ente, entaama, n'endogoyi baaziisa empirima.

²²Yoswa yagambira abasaija ababiri abaatataga ensi ati: “Mugende omunju ya malaaya oli, mumwiheyo n'abantu be boona, nkooku mwamurahiire.”

²³Abasaija abasigazi abakaba bali ntasi, baataaha omunju, baihamu Rahabbu, baihamu ise na nyina, na boona abayaikaraga nabo; baakwata ab'oruganda rwe boona, baabaiha omurubuga, babaleka aheeru y'orukande rwa Isirairi.

²⁴Orubuga na byona ebikaba birumu, baabyokya, baitu efeeza yonka n'ezaabbu, ebikwato eby'omulinga n'eby'ekyoma, nibyo baataire omulyahurro lya MUKAMA.

²⁵Baitu Rahabbu malaaya neeka ya ise yoona, na boona abayaikaraga na bo, Yoswa akabaganyira. Baijukuru be bakaikara omu Isirairi okuhikya na hati hoona, habwokuba Rahabbu akasereka abakwenda Yoswa aba yatumire kutata Yeriko.

²⁶Nubwo Yoswa yabagambira ati: “Omuntu weena alyemereza orubuga runu Yeriko akarwombeka buhyaka, MUKAMA amukyeene. Weena aliimukya omusingi gwarwo, alifwerwa omwana we omuzigaijo, aliimukya amalembo gaarwo aliferwa omwana we macura.”

²⁷MUKAMA nukwo yaikaire na Yoswa ati, kandi Yoswa yarangaanwa omunsi yoona.