Read Runyoro - rutooro Yos 7 Bible Online

Yos 7 - Runyoro - rutooro bible

Yos 7

¹Baitu abantu ba Isirairi bakasiisa obwesige bwabo hali MUKAMA, habwokuba bakatwara ebintu ebyasoroirwe kuhwerekerezibwa. Akani mutabani wa Karami, Karami mutabani wa Zabudi, Zabudi mutabani wa Zeera ow'oruganda rwa Yuda, akatwara ebimu ha bintu ebikaba bitangirwe, MUKAMA nukwo kubabiihirirwa muno.

²Yoswa akakwata abantu kuruga Yeriko, yabatuma Ai, enyakuheeraine na Besi-aveni, obukiizi obwa Buturukaizooba obwa Beseri, yabagambira ati: “Mugende mutate ensi eri.”

³Obubaagarukire, baamugambira bati: “Abantu boona baleke kugenda, hagendeho nk'enkumi ibiri rundi isatu, nubo baseesire Ani; boona batagendera kimu, habwokuba abantu bamwo bake.”

⁴Nubwo haarugaho abantu nk'enkumi isatu nubo baramaga. Abasaija aba Ai baabairukya, baabaturukya irembo,

⁵baabaitamu abantu makumi asatu na mukaaga, babasirimura orusozi baabahikya Sebalimu; abantu ba Isirairi baahoibwamu amaani, baatiina muno.

⁶Nubwo Yoswa yatemura ebyokujwara bye, yajuumara hansi omumaiso g'esanduko ey'Endagaano ya MUKAMA, yaikaraho okuhikya omu rwiririzi, uwe hamu n'abakuru ba Isirairi, baayeseesa ecuucu omu mitwe.

⁷Yoswa yagamba ati: “MUKAMA Ruhanga, kiki ekyakwambukisize abantu banu ekyambu Yorudaani, kwija kutuhayo omu mikono y'Abamooli kutuhwerekereza? Kyakubaire kirungi kakuba twaikaire obuseeri bwa Yorudaani!

⁸Ayi MUKAMA, hati ngambe ki okurora Abaisirairi nibabingwa abanyanzigwa baabu?

⁹Abakanaani n'enzaarwa zoona ez'ensi egi, nibaija kuhurra amakuru ago, nibaija kutugota batuhwerekereze, tuleke kugaruka kwijukwa omunsi. Oraakora ki okulinda ekitiinisa kyawe?”

¹⁰MUKAMA yagarukamu Yoswa ati: “Imuka, ojuumaliire ki oti okumara akasumi ako koona?

¹¹Abaisirairi bakakora ekibi baacwa Endagaano yange ei nabateereriire kuhikiriza, baatwara ebimu habintu ebikaba bisoroirwe kuhwerekerezibwa; ebintu ebi bakabiiba, baaterenganiza, baabiteeraniza n'ebintu byabo ebindi.

¹²Eki nikyo batarukusobora kwemerra bakarwanisa abanyanzigwa baabu, abanyanzigwa baabu nibababinga, habwokuba batairweho omukyeno ogw'okuhwerekerra. Tindukwija kwongera kwikara na inywe, okuhikya obumulikaihaho ebintu ebyasoroirwe kuhwerekerezibwa.

¹³Imuka oyeze abantu, obagambire oti: ‘Mweyeze, ekiro kya nyenkya kibasange nimwera; habwokuba MUKAMA Ruhanga wa Isirairi naagamba ati: “Inywe Abaisirairi mwina ebintu ebyatangirwe; timusobora kwemera abazigu banyu, rundi buli mumazire kweyihaho ebintu ebi ebyasoroirwe kuhwerekerezibwa.”

¹⁴Habweki, nyenkya mwije, buli ruganda rwemerre rwonka; oruganda MUKAMA oru araakomamu, nurwo ruraija mu maiso, ebitabu byarwo nkooku biri; ekitabu MUKAMA ekyaraakomamu, nikyo kirairra haihi nk'abantu baakyo oku bali, kandi abantu MUKAMA aba araakomamu, nubo baraija omumaiso.

¹⁵Omuntu ogu araasangwa n'ebintu ebi ebyasoroirwe kuhwerekerezibwa, ogu w'okwokya omumurro na byona ebi ainabyo, habwokuba akacwa Endagaano ya MUKAMA, yaswaaza Isirairi.’ ”

¹⁶Yoswa akaimuka nyenkya kara, yaleeta Abaisirairi, buli ruganda yarwemereza rwonka, haasororwamu oruganda rwa Yuda.

¹⁷Yaleeta omumaiso ebika eby'oruganda rwa Yuda, ekitabu ekya Abazerahi, nikyo kyasoroirwemu; yairiza haihi ekika eky'Abazerahi, yaleeta omuntu omu omu, haasororwamu Zabudi;

¹⁸yaleeta abantu ab'omunju ye omu Akani mutabani wa Karami, mutabani wa Zabudi nuwe yakomwamu.

¹⁹Aho Yoswa yamugambira ati: “Mwana wange, kugiza MUKAMA Ruhanga owa Isirairi kandi omuhaisanize. Hati ngambira eki wakozire, otansereka.”

²⁰Akani yagarukamu Yoswa ati: “Mazima kwo nkasobya hali MUKAMA Ruhanga owa Isirairi, kinu nikyo nakozire:

²¹Obunaboine omwenagiro omurungi muno ogwarugire Sinara omumunyago, kiloguraamu ibiri ez'efeeza, na zaabbu erukuhikya ekicweeka kya kiloguraamu, ebintu ebi nkabyegomba; nukwo kubitwara, nabisereka omu heema omwitaka, efeeza niyo ebandize hansi.”

²²Nubwo Yoswa yatuma abakwenda baahika bwango omu heema, basanga ebintu ebi biserekerwe, efeeza niyo eri hansi yabyo.

²³Baabiiha omu heema, baabireetera Yoswa n'abantu ba Isirairi boona; baabita omumaiso ga MUKAMA.

²⁴Yoswa n'Abaisirairi boona; batwara Akani mwijukuru wa Zera, baamutwara hamu na binu: efeeza, omwegereko, ekicweka ekya zaabbu, batabani be na bahara be, ente ze, endogoyi ze, entaama ze, eheema ye na byona ebyakaba ainabyo; baabireeta omukihanga ekya Akora.

²⁵Yoswa yamukaguza ati: “Habwaki, otuleetiire akabi akarukwingana hanu? Kiro kinu, na iwe MUKAMA naija kukuleetera akabi.” Abaisirairi baamuteera amabaale; abantu be na bo baabateera amabaale, baabookya, hamu n'ebintu bye byona.

²⁶Baamutaho entuumo ey'amabaale, ekiroho okuhikya na hati; MUKAMA nukwo kurugwaho ekiniga. Na hati hoona, ekiikaro eki, kyetwa ekiikaro kya Akora.