Read Runyoro - rutooro Yos 8 Bible Online

Yos 8 - Runyoro - rutooro bible

Yos 8

¹MUKAMA akagambira Yoswa ati: “Otatiina kandi otaterebuka, imuka ogende Ai hamu n'abasaija boona abarwani; omukama owa Ai mukuhaire omusingule, hamu n'abantu be, orubuga n'ensi ye.

²Orubuga Ai na mukama warwo, noija kurukora nkooku wakozire Yeriko na mukama warwo; ebintu byona, n'ente zoona, nibyo otwale, nugwo omugabo gwanyu, oyesereke haihi n'orubuga enyuma yarwo.”

³Kandi Yoswa yaimuka hamu n'abasaija abarwani baatoma ogwa Ai; yakomamu abasaija emanzi ab'amaani, yabatuma bagende ekiro.

⁴Yabaragira ati: “Mwesereke haihi n'orubuga enyuma yarwo; mutaruga harubuga mukagenda hara baitu mwikale mweteekaniize;

⁵nyowe hamu n'abantu boona aba nyina bo, nitwija kwirirra orubuga. Abantu aba Ai obu baraija kuturwanisa nkooku baakozire kara, nitwija kwiruka,

⁶nukwo batuhondere, okuhikya boona obubarakahwera kimu omurubuga; habwokuba nibaija kuteekereza bati ‘nibatwirukya nkooku baakozire kara.’ Nukwo turukwija kubairuka tuti;

⁷omu kasumi ako, itwe obuturaba nitwiruka, bali nibatwirukya, mwimuke na mbere mweserekere, muhambe orubuga; habwokuba MUKAMA Ruhanga wanyu naija kurubaha murusingule.

⁸Obumuraamara kuruhamba, murwokye, muhikirize MUKAMA ekiyaragiire. Mwetegereze ebi ndukubaragira.”

⁹Nubwo Yoswa yabatuma, baagenda nambere barayesereka, baikara hagati ya Beseri na Ai: baitu ekiro eki, Yoswa yakimara ali hamu n'abantu be.

¹⁰Yaimuka nyenkya yasorooza abantu be, baimukya baatoma ogwa Ai, beebembiirwe abakuru ba Isirairi.

¹¹Abasaija boona abarwani abaakaba ainabo, bairirra orubuga, baateera orukande ha bukiizi obwa Burugaizooba obwa Ai, nambere hakaba hali ekihanga hagati yabo na Ai.

¹²Yakwata abantu nk'enkumi itaano yabasereka hagati ya Beseri na Ai, harubaju orwa Bugwaizooba obw'orubuga.

¹³Amahe nukwo bagatekaniize bati, orukande orw'okubanza nurwo rwabaire Burugaizooba bw'orubuga, kandi abalinzi barwo baaba Bugwaizooba bw'orubuga.

¹⁴Omukama wa Ai obuyaboine eki, uwe n'abantu be ab'omurubuga baarahuka bwango, baagenda kurwanisa Abaisirairi, ha kasirimuko ka Araba; baitu atamanye nkooku hakaba haroho abantu abakaba bamweserekeriire kumurwanisa enyuma y'orubuga.

¹⁵Yoswa n'Abaisirairi boona baayeyoleka nk'abasingirwe, bairuka nibatoma ogw'obukiizi bw'irungu.

¹⁶Nubwo abantu boona abakaba bali omurubuga, baabasorooza baije babahondere, obubaabaga nibahondera Yoswa, ntamanya nibeeyongera kugenda hara n'orubuga.

¹⁷Hatabeho muntu noomu ayasigaire omu rubuga Ai rundi Beseri ataragenzire kuhambya Abaisirairi; orubuga bakaruleka rwonka rukingwiire rutaina ow'okurulinda.

¹⁸Nubwo MUKAMA yagambira Yoswa ati: “Icumu eri okwasire lyolekeze orubuga Ai; habwokuba ninyija kurukuha.” Yoswa, icumu eryakaba akwasire yalyolekeza orubuga.

¹⁹Obwakaba naagorra omukono ati, abantu abakaba beeserekere baimuka bwango, bairuka baataaha orubuga, baaruhamba, batabandaale baarwokya.

²⁰Abantu abaarugire omurubuga Ai obubaarozire enyuma, baarora orubuga nirucuuka omwika ogukaba niguhika omubicu; omukasumi ako, bakaba bataina magezi ag'okwiruka kutoma omuhanda gunu rundi guli, habwokuba Abaisirairi abairukire nibatoma ogw'irungu, bakakubuutuka kurwanisa abakaba nibabairukya.

²¹Yoswa n'Abaisirairi boona obubaaboine bataahi baabu abakaba beeserekere bamazire kukwata orubuga, kandi orubuga nirucuuka omwika, baakubutuuka baatandika kwita abantu ab'orubuga Ai.

²²Abandi baaruga omu rubuga baija kubarwanisa; habweki, abantu ab'orubuga Ai, bakarorra aho beehinguliriiziibwe Abaisirairi orubaju n'orubaju, baabaita boona, hatabeho noomu ayatabukire rundi ayairukire.

²³Baitu omukama wa Ai Abaisirairi bakamuhamba, baamuleeta hali Yoswa ali mwomeezi.

²⁴Abaisirairi obubaamazire kwita enzaarwa zoona ez'orubuga Ai, omwirungu nambere baabairukiize, boona bamazire kubaisa empirima, baakubuutukira orubuga Ai, abantu barwo nabo baabaisa empirima.

²⁵Abantu abaisirwe kiro eki, abasaija n'abakazi omutwaro gumu n'enkumi ibiri abo boona bantu b'omurubuga Ai.

²⁶Yoswa omukono gwe atagugarre enyuma, akaikara agugoroire okuhikya abantu boona ab'omurubuga Ai obubahwerekeriire.

²⁷Ente zonka n'ebintu nugwo omunyago Abaisirairi ogu baatwaire, MUKAMA nkooku yaragiire Yoswa.

²⁸Nubwo Yoswa yayokya orubuga Ai, yarufoora kifuruka eky'ebiro byona, nkooku ruli na hati hoona.

²⁹Omukama wa Ai yamuhanika hamuti, yaikaraho naalengiija okuhikya orwebagyo. Izooba obulikaba niritobera, Yoswa yaragira abantu bahanuule omutumbi gw'omukama wa Ai, baagunaga ha irembo ly'orubuga baagutuumaho entuumo y'amabaale enkooto muno; ekiroho okuhikya na hati.

³⁰Yoswa akombekera MUKAMA Ruhanga wa Isirairi itambiro harusozi Ebbali,

³¹nkooku Musa omuhereza wa MUKAMA yaragiire abantu ba Isirairi. Nkooku kyahandiikirwe omu kitabu eky'ebiragiro ebya Musa ngu: “Itambiro ery'amabaale agatarabaizirwe, omuntu agaatakatahoga kyoma”; niryo baahongiireho MUKAMA ebihongwa eby'okwokya, baatambiraho n'ebihongwa eby'okusaba obusinge.

³²Kandi omumaiso g'Abaisirairi boona, Yoswa nuho yahandiikiire ha mabaale kopi ey'ebiragiro Musa eyakaba ahandiikire.

³³Abaisirairi boona, abanyamahanga n'enzaarwa, hamu n'abakuru baabu, abalemi n'abacwi b'emisango baayemerra baroleriire Esanduuko y'Endagaano, omu maiso ga baanyakatagara Abaleevi abaagyetwekaga. Ekicweka ekimu eky'abantu kikemerra kitire orusozi Gerizimu amabega, ekindi, kyayemerra kiroleriire orusozi Ebbali, Musa omuheereza wa MUKAMA nkooku yaragiire okubanza, ngu basabire abantu ba Isirairi omugisa.

³⁴Hanyuma, Yoswa yasoma ebigambo byona eby'ebiragiro, n'ebirukubaza ha mugisa nahamukyeeno, byona ebyahandiikirwe omu kitabu eky'ebiragiro.

³⁵Hatabeho kigambo na kimu hali ebi Musa ebiyaragiire, Yoswa eki atarasomiire ekitebe kyona eky'abantu ba Isirairi, abakazi, abaana, n'abanyamahanga abaikaraga nabo.