Read Runyoro - rutooro Yos 9 Bible Online

Yos 9 - Runyoro - rutooro bible

Yos 9

¹Abakama boona abakaba bali obuseeri bwa Yorudaani omunsi ey'ensozi n'omukyeya, hamukungu ogw'Enyanja Enkooto enyakuroleriire Lebbanooni, Abahiiti, Abamooli, Abanyakanani, Abaperezi, Abahiivi n'Abayebusi, obubaahuliire ekigambo eki,

²baayesorooza baarwanise Yoswa n'Abaisirairi.

³Baitu abantu aba Gibbyoni obubahuliire eki Yoswa yakozire orubuga Yeriko na Ai,

⁴baacwa amagezi ag'obucwangya, baagenda baarora ebyokulya, baabipakira ha ndogoyi zaabbu, baijwekere eguniya n'endyanga z'amarwa enkuru kandi zibaziirwe,

⁵baajwara engoye n'enkaito enkuru, baakwata ebyokulya byabo ebyomere kandi bihumbire.

⁶Baataahirra Yoswa omurukande orwa Girigaali baamugambira hamu n'abantu ba Isirairi bati: “Nituruga omunsi ya hara muno; nitwenda tukole na inywe Endagaano.”

⁷Abantu ba Isirairi baagarukamu Abahiivi bati: “Kisoboka kita kukora na inywe Endagaano? Nimusobora kuba nimwikara hagati omuli itwe.”

⁸Baagarukamu Yoswa bati: “Tuli bairu bawe.”

⁹Yoswa yabakaguza ati: “Niinywe baha?” Bamugarukamu bati: “Itwe abairu bawe nituruga omunsi eya hara habwokuba tukahurraho MUKAMA Ruhanga wawe; tukahurra ebigambo ebyarukugambwaho, na byona ebiyakozire omunsi Misiri,

¹⁰n'ebiyakozire abakama ababiri abakaba bali buseeri bwa Yorudaani, Sihoni omukama wa Hesibooni, na Ogi omukama wa Basani ayaikaraga omunsi Asitarosi.

¹¹Abeebembezi baitu n'abantu boona ab'ihanga lyaitu bakatugambira bati: ‘Mwetwarre entanda ei muraaliira omumuhanda, mugende muhikeho Abaisirairi mubagambire muti: “Tuli bairu banyu, ka tukole na inywe Endagaano.” ’

¹²Murole ebyokulya byaitu; nambere twabihiire omuka eri ntanda ey'okuliira omumuhanda, ha kiro ekitwaimukiizeeho kwija hali inywe, bikaba nibikyatagata, baitu hati byomere kandi bihumbire.

¹³Endyanga zinu nambere twaziijuliize zikaba ziri mpyaaka, hati itemukire; eby'okujwara n'enkaito bikuzire, habw'orugendo rukooto orutumazire niturubata.”

¹⁴Aho abantu ba Isirairi baikiriza ebyokulya bali ebi baabahaire, batasiibe n'okwekaguza hali MUKAMA.

¹⁵Yoswa tiyabakora kabi, yaragaana nabo Endagaano okutabaita; abeebembezi ab'ekitebe ekya Isirairi baarahira okuhikiriza Endagaano egi.

¹⁶Ebiro bisatu obubyahoireho Endagaano emazire kukorwa, Abaisirairi bamanya abantu abo nkooku bali bataahi baabu kandi nkooku baikaire nabo.

¹⁷Nubwo Abaisirairi baimukya orugendo, ha kiro ekya kasatu baahika omu mbuga ez'abantu abo. Zinu nizo zikaba ziri mbuga zaabbu: Gibbyoni, Kefira, Berosi, na Kiryasi-yalimu.

¹⁸Kyonka batabaite, habwokuba abeebembezi b'ekitebe ky'Abaisirairi bakaba babarahiire, nibaatura ibara lya MUKAMA Ruhanga wa Isirairi. Nubwo ekitebe eky'Abaisirairi boona, kyahyeemera abeebembezi baakyo.

¹⁹Baitu abeebembezi boona baabagarukamu bati: “Tukabarahira, nitwatura ibara lya MUKAMA Ruhanga owa Isirairi, habweki, titusobora kubakoraho akabi.

²⁰Tikituhikiriire kubaita, habwokuba tukakora nabo Endagaano; kakuba tubaita, Ruhanga naija kutufubira habw'endahiro ei twabarahiire.”

²¹Abeebembezi b'Abaisirairi babaagambira bati: “Abantu abo mutabaita.” Tubahe omulimo gwabo gw'okutusenyeraga enku n'okutuleetera amaizi.

²²Kandi Yoswa yayeta abantu Abaagibyoni abo, yabakaguza ati: “Kiki ekyababiihabiihisize mwagamba muti: Nituruga hara muno kandi kunu mutuli haihi hanu?

²³Habweki okuruga hati, mukyenerwe, abamu omuli inywe, baraabaga bairu rubaale, baraayasaaga enku, baleetege n'amaizi agarukwetaagwa omunju eya Ruhanga wange.”

²⁴Baagarukamu Yoswa bati: “Ekyatukoleze eki, tukamanyira kimu amazima, MUKAMA Ruhanga wawe nkooku yanihiize Musa omwiru we nkooku arukwija kubaha ensi enu yoona, kandi aite abantu boona abanyakugirumu inywe mutakagitaahire; kandi nikyo twatiniire muno tuti mutaikara kutwita.

²⁵Hati, tuli mumikono yaawe; tukole kyoona ekyorukurora kihikire.”

²⁶Kinu nikyo Yoswa yabakozire, akabatabura Abaisirairi tibaabaita.

²⁷Ha kiro eki kyonyini, yabatandikisizaaho kusenya enku n'okuleeta amaizi ag'Abaisirairi n'ag'itambiro lya MUKAMA. Bakeyongera okukora omulimo ogu okuhikya na hati, omukiikaro kyoona MUKAMA eki aba asiimire.