Read Runyoro - rutooro 2Bat 2 Bible Online

2Bat 2 - Runyoro - rutooro bible

2Bat 2

¹Bagenzi bange, ha kigambo eky'okugaruka kwa MUKAMA waitu Yesu Kristo n'okusorrokana kwaitu kumutangirra, nitubeesengereza

²muleke kucwekwa enkizi rundi kukangwa ebintu byona ebirukumanyisa ngu, ekiro kya MUKAMA kihikire; noobu byakuleetwa abarangi b'ebisuba, rundi orugambo rw'abantu, rundi ebbaruha erukusisana nk'erugire hali itwe.

³Mutaliikiriza muntu n'omu kubabiihabiiha omu mulingo gwona. Ekiro eki tikirukwija kuhika obwemi butakacwekere, kandi Omwemi atakoolekerwe. Nuwe ogu ow'okuhwerekerra,

⁴anyakuhakaniza kyona ekyetwa ruhanga rundi ekiramibwa. Naayenyumiriza kukira byona, nukwo aikarre omunju ya Ruhanga naayeyeta Ruhanga.

⁵Timurukwijuka eki nkooku nakibagambiire obu nkaba nkyali na inywe?

⁶Ekimutangire kuzooka hati, mukimanyire; nukwo asobole kwolekwa akasumi ke obu kalihika.

⁷Habwokuba obwemi bukatandika ira, nibukora omu nsita; baitu Kristo anyakubutanga, araikaraga naabutanga okuhika obu alikaihwaho.

⁸Obu nubwo Omwemi alizooka, kandi MUKAMA Yesu alimwisa orwoya orw'akanwa ke, amuhwerekereze n'okumuliikana okw'okwija kwe.

⁹Omwemi ogu aliija omu busobozi bwa Sitaani, aina amaani ag'okukora ebihuniriza ebirukuhabisa, n'ebyamasano,

¹⁰hamu n'ebindi byona ebirisobora kuhabisa abo abali b'okuhwerekerra, habwokuba bakanga kugonza amazima agaakubajunire.

¹¹Nikyo Ruhanga abalekera bahabisibwa, baikirize ebisuba ebi.

¹²Nukwo boona abataraikiriize amazima, baitu baasiima obubi, bacwerwe omusango, gubasinge.

¹³Bagenzi bange abagonzibwa MUKAMA, kituhikiriire kusiima Ruhanga butoosa habwanyu, habwokuba okuruga kara na kara Ruhanga akabakomera okujunwa, mwezibwe Mwoyo Ahikiriire kandi mwikirize amazima.

¹⁴Eki nikyo yabeetiire naayekoonyeza okurangirra kwaitu okw'Amakuru Amarungi, nukwo musobole kubagana ha kitiinisa kya MUKAMA waitu Yesu Kristo.

¹⁵Nahabweki bagenzi bange mugume, mukwatire kimu byona ebi twabeegeseze na kanwa kaitu rundi ebi twabahandiikiire.

¹⁶MUKAMA waitu Yesu Kristo wonyini, na Ruhanga Isiitwe ayatugondeze, yatuha ekihuumuro eky'ebiro n'ebiro n'okunihira okugumire habw'embabazi ze,

¹⁷ahuumuze emitima yanyu kandi abagumye omu birungi byona ebi mukora n'ebi mugamba.