Read Runyoro - rutooro 2Bat 3 Bible Online

2Bat 3 - Runyoro - rutooro bible

2Bat 3

¹Eky'okumalirra bagenzi bange, mutusabire, nukwo ekigambo kya MUKAMA kyanguhe kuraranga hoona kandi kisingule, nkooku kyasingwire omuli inywe;

²na itwe tusobole kutabuka abantu ababi kandi engumangani, habwokuba boona tibaina okwikiriza.

³Baitu MUKAMA mwesigwa; alibaha amaani kandi abajune Omubi.

⁴Nitubeesiga omu MUKAMA, habwokuba nimukora kandi mulyongera kukora ebintu ebi turukubaragira.

⁵MUKAMA aterekereze emitima yanyu omu ngonzi za Ruhanga n'omu kugumiisiriza kwa Kristo.

⁶Bagenzi bange, nitubaragira omu ibara lya MUKAMA waitu Yesu Kristo, mwecweho ow'oruganda weena atarukwenda kukora emirimo kandi atarukukuraatira engeso ezi twabamanyize.

⁷Inywe inywenka mumanyire nkooku musemeriire kutukuraatira. Obu tukaba tuli na inywe tukaba tutali bagara,

⁸tutaliire busa ebyokulya by'omuntu weena, baitu twatalibanaga, twajwahaga kandi twakoraga nyamusana n'ekiro, nukwo tuleke kulemeera omuntu n'omu omuli inywe.

⁹Tikuli kugamba ngu, tukaba tutaina bulyo obw'okubikolerwa, baitu tukagonza kubaha ekyokurorraho omu ngeso zaitu, eki muraakuraatira.

¹⁰Obu tukaba tuli na inywe, tukabaha ekiragiro ekirukugamba ngu: Atarukwenda kukora, aleke kulya.

¹¹Habwokuba nituhurra abamu omuli inywe nkooku bali bagara, beetaahya omu by'abandi, tibagira eki bakora.

¹²Abantu nk'abo nitubaragira kandi nitubateererra omu MUKAMA Yesu Kristo, bakole emirimo yabo hataroho bwogo, beetungire ebyokulya byabo nyabwabu.

¹³Ab'oruganda, mutajwaha omu kukora ebirungi.

¹⁴Kakuba habaho arukwanga kukwata ebi turukugamba omu bbaruha enu, omuntu ogu mumwetegereze, mutongera kukorrana nawe, nukwo akwatwe ensoni.

¹⁵Muleke kumurora nk'omunyanzigwa, baitu mumuhabule nka mugenzi wanyu.

¹⁶MUKAMA w'obusinge wonyini, abahe obusinge obusumi bwona n'omu bintu byona. MUKAMA abe nainywe inywena.

¹⁷Okuraga kunu nkwehandiikire nyenka n'omukono gwange: Ninyowe Paulo. Kanu nuko karorwaho omu bbaruha zange zoona; nukwo mpandiika nti.

¹⁸Embabazi za MUKAMA waitu Yesu Kristo ziikalege na inywe inywena.