Read Runyoro - rutooro 1Tim 1 Bible Online

1Tim 1 - Runyoro - rutooro bible

1Tim 1

¹Nyowe Paulo, omukwenda wa Kristo Yesu, ayakomerwe kandi natumwa Ruhanga ayatujunire na Kristo Yesu okunihira kwaitu.

²Ninkuhandiikira iwe Timoteho, omwana wange mali omu kwikiriza. Ninkugondeza emigisa, embabazi, n'obusinge ebiruga hali Ruhanga Isiitwe na Kristo Yesu MUKAMA waitu.

³Oikaleyo Efeeso nkooku nakuteereriire obu nkaba ningenda Makedoniya, nukwo otange abantu abamu, baleke kwegesa enyegesa endi.

⁴Baleker'aho n'okwemarra ha nganikyo ez'okwehangahanga, baleker'aho n'okurondooza eby'obwijukuru obutaina nambere bugarukira, ebirugwamu empaka, baitu bitarukumanyiza abantu engeso enungi ezirukuleetwa okwikiriza.

⁵Kandi kunu itwe eki turukugenderra omu nyegesa zaitu, nizo ngonzi eziruga omu mutima ogusemiire n'omu biteekerezo ebihikire, n'omu kwikiriza okutarumu obugobya.

⁶Abantu abamu abanyakuruga hali ebi, bahabira omu mpaka ezitaina makuru,

⁷bagonza kufooka beegesa b'ebiragiro, kunu tibarukwetegereza ebi barukwegesa rundi ebi barukugumya.

⁸Kyonka itwe tumanyire Ebiragiro nkooku biri birungi, kakuba omuntu abihondera omu mulingo oguhikire.

⁹Baitu kinu nikyo kisemeriire kwetegerezibwa: Ebiragiro tibiteebwaho habw'abarukukora kurungi, baitu biteebwaho habw'abeemi n'entahurra, habw'abatatiina Ruhanga n'abasiisi, habw'abatata mutima ha diini, n'abasiisa ebya Ruhanga, habw'abaita baisebo rundi banyinabo, na habw'abaisi b'abantu abandi,

¹⁰habw'abasiihani, abakuuhya, n'ababuza abantu, habw'ababiiha ebisuba n'abarahira ebisuba, n'ekindi kyona ekirukuhakaniza enyegesa enyakuhikire.

¹¹Egi niyo nyegesa erukwikirraniza n'Amakuru ago Amarungi kwo aga Ruhanga anyakuhaisanizibwa, nyowe aga nakwasiibwe.

¹²Ninsiima Kristo Yesu MUKAMA waitu ayampaire amaani ag'okukora omulimo gunu, habwokuba akarora nkooku ndi mwesigwa nukwo kunkoma kumuheereza,

¹³kara noobu ndiba namujumire, namuhiiganiza, kandi naamubazaaho kubi; baitu akangirra embabazi habwokuba ebi nkabikozesibwa obutamanya, ntakaikiriize.

¹⁴MUKAMA waitu akangirra embabazi nyingi, yampa okwikiriza n'engonzi ebi tutunga omu Kristo Yesu.

¹⁵Ekigambo kinu ky'amananu kandi kisemeriire kwikiririzibwa kimu, ekirukugamba kiti: Kristo Yesu akaija omunsi okujuna abasiisi. Kandi omuli abo, ninyowe ow'okubanza.

¹⁶Baitu eki nagiririrwe embabazi nikyo kinu: omuli nyowe omusiisi ow'okubanza, Yesu Kristo ayolekeremu okugumiisiriza kwe okutaina h'okugarukira, kube kyokurorraho ha bandi abarukwija kumwikiriza, basobole kutunga obwomeezi obutahwaho.

¹⁷Ruhanga omu wenka, MUKAMA ow'ebiro n'ebiro, atafa kandi atarorwa, ahaisanizibwe kandi aheebwe ekitiinisa ebiro n'ebiro! Amiina.

¹⁸Binu nibyo ndukukuteererra mwana wange Timoteho. Bihikaana n'ebi abarangi baakugambireho kara. Leka na hati bikuhe amaani ag'okurwana kurungi,

¹⁹ogumye okwikiriza, omutima gwawe nkooku gukuhabura. Abantu abamu habw'okutafaaho omutima ebi gurukubahabura, bakafeerwa okwikiriza kwabo.

²⁰Omuli abo nuho hali Himenaayo na Alekizanda, aba nalekiire Sitaani, nukwo beege kutajuma Ruhanga.