Read Runyoro - rutooro 1Tim 3 Bible Online

1Tim 3 - Runyoro - rutooro bible

1Tim 3

¹Ekigambo kinu ky'amananu: Omuntu weena obu ayenda obukuru bw'oburoleerezi, aba ayegombere omulimo murungi muno.

²Habweki omuroleerezi asemeriire kuba muntu ataina kyona eki arukujunaanwa; musaija anyakuswire omukazi omu, omwerinzi, omwetegereza, ateekaine, w'amakune, kandi anyakusobora kwegesa.

³Atali mutamiizi, atarukujumbuutuka baitu mukwata mpora. Muntu atarukukungana kandi atarukwemarra ha sente.

⁴Asemeriire kulema kurungi eka ye naayegesa abaana be kumuhurra n'okumutamu ekitiinisa omu byona.

⁵Omuntu obu atamanya kulema kurungi eka ye, asobora ata kurolerra akitebe ky'abaikiriza Ruhanga?

⁶Asemeriire kuba muntu anyakumazire omwanya ahindukiire Kristo, taikara kwekuliriza muno akasingwa omusango ogwasingire Sitaani.

⁷Kandi asemeriire kuba muntu arukusiimwa n'abantu ab'aheeru, kuba kitaba kwo naija kujumwa kandi agwe omu mutego gw'Omwohi.

⁸Abaheereza [1] nabo basemeriire kuba bantu b'omutima ogugumire, abatali b'enkuru ibiri, abatarukunywa muno marwa, n'abataina mukoijo gw'ebintu.

⁹Basemeriire kulinda ensita z'okwikiriza n'omutima gumu.

¹⁰Baitu nabwo, babanze balengesebwe. Kakuba bazooka nkooku bahikire, batandike obuheereza bwabu.

¹¹Abaheerezakati nabo basemeriire kuba b'omutima ogugumire kandi abatarukugeya. Babe beerinzi kandi beesigwa omu byona.

¹²Abaheereza babe n'omukazi omu, baleme kurungi abaana babo hamu n'eka yabo;

¹³habwokuba abo abahikya kurungi obuheereza bwabo, beetungira ibara lirungi kandi abantu baabeesiga muno habw'okugumya okwikiriza oku baina omu Kristo Yesu.

¹⁴Ninihira kwija owaanyu bwango, baitu nkuhandiikire binu,

¹⁵kakuba nkererwa, nukwo osobole kumanya engeso abantu ezi basemeriire kuba nazo omu ka ya Ruhanga. Niryo iramizo lya Ruhanga omwomeezi, enyomyo kandi orugo orw'amazima.

¹⁶Na itwe leka twatule eby'ensita eby'enyikiriza yaitu nkooku biri bikuru mali. Nibyo ebirukugamba biti: Akafooka muntu, yagumibwa Mwoyo Ahikiire, yarorwa bamalaika, yarangirirwa omu mahanga, yaikirizibwa ab'omunsi yoona, yatwarwa omu iguru n'ekitiinisa.