Read Runyoro - rutooro 1Tim 5 Bible Online

1Tim 5 - Runyoro - rutooro bible

1Tim 5

¹Otalicoomera musaija mukuru, baitu omuhabulege nkooku waakuhabwire sso. Abasigazi obakole kurungi nka bagenzi baawe,

²abakazi bakuru obakorre ebirungi nk'ebi wakukoliire nyoko, kandi abaisiki nka banyanyoko, omu burukwera bwona.

³Abafaakati nyakabara, obatemuga ekitiinisa.

⁴Omufaakati obu araaba aina abaana rundi abaijukuru, abaana abo leka babanze beetegereze ediini ebi erukubaragira kukorra ab'oruganda rwabo, n'ebi basemeriire kugarurra bazaire baabo; habwokuba eki nikyo Ruhanga arukusiima.

⁵Omufaakati nyakabara, ataina kiroleererwa, okunihira kwe kwona akutaire hali Ruhanga, aikara naayesengereza kandi naasaba ekiro na nyamusana.

⁶Baitu omufaakati anyakwenagiriza, asisana nk'afiire, noobu araaba akyali mwomeezi.

⁷Eki okibasoborre nukwo baleme kuba n'ebi barukujunaanwa.

⁸Kakuba habaho omuntu ataina eki arukukorra ab'obuzaale bwe, okukira muno ab'oruganda rwe mali, aba anagiire kimu okwikiriza, kandi aba ali mubi okukira ogu atakaikirizaaga.

⁹Anyakuhandiikwa nk'omufakaati nuwe ogu anyakuhikize emyaka nkaaga y'obukuru, ayaswirweho omusaija omu,

¹⁰kandi amanyirwe habw'ebikorwa ebirungi ebi akora, nk'ayayoroire kurungi abaana, ayakuniire abagenyi, ayanaabisize abantu ba Ruhanga ebigere, ayahumwize abali omu mihito, kandi ayayeheerireyo kimu okukora kurungi omu byona.

¹¹Baitu abafaakati abato otabaikiriza; habwokuba omubiri obu gubalemesa, gubaiha hali Kristo, bagonza kugaruka kuswerwa.

¹²Nukwo beeretera omusango habw'okutahikiriza ekiragaano kyabo eki baabandiize kuragaana na Kristo.

¹³Tikiri eki kyonka, baitu bataahirirwa n'obugara, batandika kwenjeera, nibaruga munu nibataaha muli. Tibuli bugara bwonka, nibabaza ebi bataakubaliize.

¹⁴Nahabweki naakugondeze abafaakati abato baswerwe, bazaale abaana, barolerre amaka gaabo, nukwo abanyanzigwa baleke kubona obwiho obw'okutubazaaho kubi.

¹⁵Ningira abamu omuli bo bakahaba ira, nibakuraatira Sitaani.

¹⁶Omuntu weena arukwikiriza, obu araaba aina abanyabuzale be abafaakati, abakoonyere; ekitebe ky'abaikiriza kireke kwetweka obulemeezi obu, nukwo kisobole kukoonyera abafaakati nyakabara.

¹⁷Abakuru abarukwebembera kurungi, leka baheebwe ekitiinisa okukira abandi, muno muno abo abarukukora omulimo ogw'okurangirra n'okwegesa.

¹⁸Ebihandiiko Ebirukwera bigamba biti: “Omuntu arukukugesira, aikirizibwa kutwara ha buro.” Kandi biti: “Omukozi asemeriire empeera ye.”

¹⁹Otaliikiriza eki barukujunaana omukuru w'ekitebe, rundi buli nikigumibwa abakaiso babiri rundi basatu.

²⁰Kandi abo abanyakulemera omu kibi, obahane omumaiso ga boona, nukwo abandi baikale nibatiina.

²¹Ninkuteererra omumaiso ga Ruhanga, n'aga Yesu Kristo, n'aga bamalaika abataraterebukire, ebiragiro binu obikwase boona atarukusoroora, nookora byona omu bwinganiza.

²²Otalyanguhiriza okutaho abantu emikono, kandi oleke kwetaba omu bibi by'omuntu ondi; oikalege n'omutima ogurukwera.

²³Otongera kunywa amaizi gonka, baitu onywehoga n'otwarwa tuke habw'enda yawe na habw'endwara yawe enyakwikara niimuka.

²⁴Ebibi eby'abamu bizooka bwango, byeyoleka batakacweriiwe musango, baitu eby'abandi bizooka haahingwireho akasumi.

²⁵Ebikorwa ebirungi nabyo nukwo bizooka bwango biti; noobu biba bitakazookere, baitu tibisobora kwikara biserekerwe.