Read Runyoro - rutooro 1Tim 6 Bible Online

1Tim 6 - Runyoro - rutooro bible

1Tim 6

¹Boona abali omu bwiru, bamanye bakama baabo nkooku basemeriire kuheebwa ekitiinisa, nukwo ibara lya Ruhanga n'enyegesa yaitu bireke kugaywa.

²Abairu abaina bakama baabo abaikiriza, baleke kubagaya ngu, boona b'oruganda rumu; baitu babaheereze kurungi okukiraho habwokuba abo abarukugasirwa omulimo gwabo nubo abaikiriza kandi abagonzibwa. Ebi nibyo obeegese kandi obateererre.

³Baitu kakuba habaho arukwegesa ebitali ebi rundi atarukwikirraniza n'ebigambo ebihikire ebya MUKAMA waitu Yesu Kristo n'enyegesa erukwikirraniza n'enyikiriza yaitu.

⁴Aba ahinguraniize akwekuliriza, kandi taina eki amanyire. Aina n'omutima omubi ogw'okuhakaniza n'okuteera empaka ha bigambo ebizaara ihali, okwahukana, okuhangirra, okuteekerezaho kubi abantu,

⁵n'okuteeza empaka abantu abaina ebiteekerezo ebiramaire kandi abataina mazima, abarukuteekereza ngu, ediini nugwo muhanda ogw'okuguudahara.

⁶Nukwo, ediini erumu itungo lingi, baitu hali abo abaikara nibasiima ebi bainabyo.

⁷Omunsi tukaijamu tutaina kantu, kandi tuligirugamu tutarukutwara kantu;

⁸baitu obu tuba twina ebyokulya n'ebyokujwara, leka ebi bitumale.

⁹Abo abarurukira itungo bagwa omu kwohebwa n'omu mutego, batwalirizibwa okwegomba okutali kumu, okutarumu bwetegereza kandi okuleeta akabi, kukadikiza abantu omu kuhwerekerra, bakahwaho.

¹⁰Ningira omukoijo gw'omulingo ogu nugwo gwaihire abamu ha kwikiriza kwabu, emitima yabo baagireetera enaku nyingi.

¹¹Baitu iwe, omuntu wa Ruhanga, ebi byona obiirukege; omutima gwawe gwona ogute ha buhikiriire, ha kutiina Ruhanga, okwikiriza, okugonza okugumiisiriza na ha kukwata mpora.

¹²Rwana masaija obulemu bw'okwikiriza; ogumire ha bwomeezi obutahwaho obu wayetiirwe kandi obu wayatwire kurungi noorahira omumaiso g'abakaiso baingi.

¹³Hati nu, ninkuteererra omu maiso ga Ruhanga anyakwomeeza ebintu byona, n'omumaiso ga Kristo Yesu ayayatuliire kimu omumaiso ga Ponsiyo Pilaato nkooku ali kaiso ow'amazima,

¹⁴ohonderege eki nakuragiire, otaina kamogo kandi otaina eky'orukujunaanwa, okuhika MUKAMA waitu Yesu Kristo obu alizooka.

¹⁵Okuzooka kunu, omu kasumi kakwo, Rutakirwa wenka nuwe alikumanyisa. Nuwe MUKAMA w'abakama kandi Omulemi w'abalemi.

¹⁶Ogu wenka nuwe atafa kandi aikara omu musana ogutahikwaho, atakarorwahoga kandi atasobora kurorwa muntu n'omu. Aheebwe ekitiinisa kandi ahangirize ebiro n'ebiro. Amiina.

¹⁷Abaguuda ab'omunsi munu, obahabule baleke kwehurra, n'okuta emitima yabo ha itungo eritaikaraho; baitu bagite hali Ruhanga anyakutuheera kimu byona ebitusemeza.

¹⁸Abantu abo basemeriire kukora kurungi; bakole ebikorwa ebirungi bingi, babe benda kandi bagabe n'omutima gumu.

¹⁹Oku nukwo kweyombekera omusingi ogugumire ogw'ebiro ebiriija, nukwo basobole kutunga obwomeezi, nubwo bwomeezi obuhikire kwo.

²⁰Mwana wange Timoteho, linda eki wakwasiibwe. Wetentale orubazo orutarumu kutiina Ruhanga, n'empaka abantu abamu ezi beeta magezi, kandi kunu tikirikwo.

²¹Habwokuba abamu obu bahondera amagezi ago bahabira kimu, nibaruga omu muhanda ogw'okwikiriza. Embabazi za Ruhanga ziikale na iwe.